5. ஸசேதனஸுத்தம்

15. ஏகம் ஸமயம் ப⁴க³வா பா³ராணஸியம் விஹரதி இஸிபதனே மிக³தா³யே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘பூ⁴தபுப்³ப³ம், பி⁴க்க²வே, ராஜா அஹோஸி ஸசேதனோ [பசேதனோ (ஸீ. ஸ்யா. கம். பீ.)] நாம. அத² கோ², பி⁴க்க²வே, ராஜா ஸசேதனோ ரத²காரம் ஆமந்தேஸி – ‘இதோ மே, ஸம்ம ரத²கார, ச²ன்னம் மாஸானம் அச்சயேன ஸங்கா³மோ ப⁴விஸ்ஸதி. ஸக்கி²ஸ்ஸஸி [ஸக்க²ஸி (ஸ்யா. கம். பீ.)] மே, ஸம்ம ரத²கார, நவம் சக்கயுக³ம் காது’ந்தி? ‘ஸக்கோமி தே³வா’தி கோ², பி⁴க்க²வே, ரத²காரோ ரஞ்ஞோ ஸசேதனஸ்ஸ பச்சஸ்ஸோஸி. அத² கோ², பி⁴க்க²வே, ரத²காரோ ச²ஹி மாஸேஹி சா²ரத்தூனேஹி ஏகம் சக்கம் நிட்டா²பேஸி. அத² கோ², பி⁴க்க²வே, ராஜா ஸசேதனோ ரத²காரம் ஆமந்தேஸி – ‘இதோ மே, ஸம்ம ரத²கார, ச²ன்னம் தி³வஸானம் அச்சயேன ஸங்கா³மோ ப⁴விஸ்ஸதி, நிட்டி²தம் நவம் சக்கயுக³’ந்தி? ‘இமேஹி கோ², தே³வ, ச²ஹி மாஸேஹி சா²ரத்தூனேஹி ஏகம் சக்கம் நிட்டி²த’ந்தி. ‘ஸக்கி²ஸ்ஸஸி பன மே, ஸம்ம ரத²கார, இமேஹி ச²ஹி தி³வஸேஹி து³தியம் சக்கம் நிட்டா²பேது’ந்தி? ‘ஸக்கோமி தே³வா’தி கோ², பி⁴க்க²வே, ரத²காரோ ச²ஹி தி³வஸேஹி து³தியம் சக்கம் நிட்டா²பேத்வா நவம் சக்கயுக³ம் ஆதா³ய யேன ராஜா ஸசேதனோ தேனுபஸங்கமி; உபஸங்கமித்வா ராஜானம் ஸசேதனம் ஏதத³வோச – ‘இத³ம் தே, தே³வ, நவம் சக்கயுக³ம் நிட்டி²த’ந்தி. ‘யஞ்ச தே இத³ம், ஸம்ம ரத²கார, சக்கம் ச²ஹி மாஸேஹி நிட்டி²தம் சா²ரத்தூனேஹி யஞ்ச தே இத³ம் சக்கம் ச²ஹி தி³வஸேஹி நிட்டி²தம், இமேஸம் கிம் நானாகரணம்? நேஸாஹம் கிஞ்சி நானாகரணம் பஸ்ஸாமீ’தி. ‘அத்தே²ஸம், தே³வ, நானாகரணம். பஸ்ஸது தே³வோ நானாகரண’’’ந்தி.

‘‘அத² கோ², பி⁴க்க²வே, ரத²காரோ யம் தம் சக்கம் ச²ஹி தி³வஸேஹி நிட்டி²தம் தம் பவத்தேஸி. தம் பவத்திதம் ஸமானம் யாவதிகா அபி⁴ஸங்கா²ரஸ்ஸ க³தி தாவதிகம் க³ந்த்வா சிங்கு³லாயித்வா பூ⁴மியம் பபதி. யம் பன தம் சக்கம் ச²ஹி மாஸேஹி நிட்டி²தம் சா²ரத்தூனேஹி தம் பவத்தேஸி. தம் பவத்திதம் ஸமானம் யாவதிகா அபி⁴ஸங்கா²ரஸ்ஸ க³தி தாவதிகம் க³ந்த்வா அக்கா²ஹதம் மஞ்ஞே அட்டா²ஸி.

‘‘‘கோ நு கோ², ஸம்ம ரத²கார, ஹேது கோ பச்சயோ யமித³ம் [யதி³த³ம் (க.)] சக்கம் ச²ஹி தி³வஸேஹி நிட்டி²தம் தம் பவத்திதம் ஸமானம் யாவதிகா அபி⁴ஸங்கா²ரஸ்ஸ க³தி தாவதிகம் க³ந்த்வா சிங்கு³லாயித்வா பூ⁴மியம் பபதி? கோ பன, ஸம்ம ரத²கார, ஹேது கோ பச்சயோ யமித³ம் சக்கம் ச²ஹி மாஸேஹி நிட்டி²தம் சா²ரத்தூனேஹி தம் பவத்திதம் ஸமானம் யாவதிகா அபி⁴ஸங்கா²ரஸ்ஸ க³தி தாவதிகம் க³ந்த்வா அக்கா²ஹதம் மஞ்ஞே அட்டா²ஸீ’தி? ‘யமித³ம், தே³வ, சக்கம் ச²ஹி தி³வஸேஹி நிட்டி²தம் தஸ்ஸ நேமிபி ஸவங்கா ஸதோ³ஸா ஸகஸாவா, அராபி ஸவங்கா ஸதோ³ஸா ஸகஸாவா, நாபி⁴பி ஸவங்கா ஸதோ³ஸா ஸகஸாவா. தம் நேமியாபி ஸவங்கத்தா ஸதோ³ஸத்தா ஸகஸாவத்தா, அரானம்பி ஸவங்கத்தா ஸதோ³ஸத்தா ஸகஸாவத்தா, நாபி⁴யாபி ஸவங்கத்தா ஸதோ³ஸத்தா ஸகஸாவத்தா பவத்திதம் ஸமானம் யாவதிகா அபி⁴ஸங்கா²ரஸ்ஸ க³தி தாவதிகம் க³ந்த்வா சிங்கு³லாயித்வா பூ⁴மியம் பபதி. யம் பன தம், தே³வ, சக்கம் ச²ஹி மாஸேஹி நிட்டி²தம் சா²ரத்தூனேஹி தஸ்ஸ நேமிபி அவங்கா அதோ³ஸா அகஸாவா, அராபி அவங்கா அதோ³ஸா அகஸாவா, நாபி⁴பி அவங்கா அதோ³ஸா அகஸாவா. தம் நேமியாபி அவங்கத்தா அதோ³ஸத்தா அகஸாவத்தா, அரானம்பி அவங்கத்தா அதோ³ஸத்தா அகஸாவத்தா, நாபி⁴யாபி அவங்கத்தா அதோ³ஸத்தா அகஸாவத்தா பவத்திதம் ஸமானம் யாவதிகா அபி⁴ஸங்கா²ரஸ்ஸ க³தி தாவதிகம் க³ந்த்வா அக்கா²ஹதம் மஞ்ஞே அட்டா²ஸீ’’’தி.

‘‘ஸியா கோ² பன, பி⁴க்க²வே, தும்ஹாகம் ஏவமஸ்ஸ – ‘அஞ்ஞோ நூன தேன ஸமயேன ஸோ ரத²காரோ அஹோஸீ’தி! ந கோ² பனேதம், பி⁴க்க²வே, ஏவம் த³ட்ட²ப்³ப³ம். அஹம் தேன ஸமயேன ஸோ ரத²காரோ அஹோஸிம். ததா³ஹம், பி⁴க்க²வே, குஸலோ தா³ருவங்கானம் தா³ருதோ³ஸானம் தா³ருகஸாவானம். ஏதரஹி கோ² பனாஹம், பி⁴க்க²வே, அரஹம் ஸம்மாஸம்பு³த்³தோ⁴ குஸலோ காயவங்கானம் காயதோ³ஸானம் காயகஸாவானம், குஸலோ வசீவங்கானம் வசீதோ³ஸானம் வசீகஸாவானம், குஸலோ மனோவங்கானம் மனோதோ³ஸானம் மனோகஸாவானம். யஸ்ஸ கஸ்ஸசி, பி⁴க்க²வே, பி⁴க்கு²ஸ்ஸ வா பி⁴க்கு²னியா வா காயவங்கோ அப்பஹீனோ காயதோ³ஸோ காயகஸாவோ, வசீவங்கோ அப்பஹீனோ வசீதோ³ஸோ வசீகஸாவோ, மனோவங்கோ அப்பஹீனோ மனோதோ³ஸோ மனோகஸாவோ, ஏவம் பபதிதா தே, பி⁴க்க²வே, இமஸ்மா த⁴ம்மவினயா, ஸேய்யதா²பி தம் சக்கம் ச²ஹி தி³வஸேஹி நிட்டி²தம்.

‘‘யஸ்ஸ கஸ்ஸசி, பி⁴க்க²வே, பி⁴க்கு²ஸ்ஸ வா பி⁴க்கு²னியா வா காயவங்கோ பஹீனோ காயதோ³ஸோ காயகஸாவோ, வசீவங்கோ பஹீனோ வசீதோ³ஸோ வசீகஸாவோ, மனோவங்கோ பஹீனோ மனோதோ³ஸோ மனோகஸாவோ, ஏவம் பதிட்டி²தா தே, பி⁴க்க²வே, இமஸ்மிம் த⁴ம்மவினயே, ஸேய்யதா²பி தம் சக்கம் ச²ஹி மாஸேஹி நிட்டி²தம் சா²ரத்தூனேஹி.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘காயவங்கம் பஜஹிஸ்ஸாம காயதோ³ஸம் காயகஸாவம், வசீவங்கம் பஜஹிஸ்ஸாம வசீதோ³ஸம் வசீகஸாவம், மனோவங்கம் பஜஹிஸ்ஸாம மனோதோ³ஸம் மனோகஸாவ’ந்தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பஞ்சமம்.