2. ஸாரணீயஸுத்தம்

12. ‘‘தீணிமானி, பி⁴க்க²வே, ரஞ்ஞோ க²த்தியஸ்ஸ முத்³தா⁴வஸித்தஸ்ஸ யாவஜீவம் ஸாரணீயானி [ஸரணீயானி (ஸீ. ஸ்யா. கம். பீ.)] ப⁴வந்தி. கதமானி தீணி? யஸ்மிம், பி⁴க்க²வே, பதே³ஸே ராஜா க²த்தியோ முத்³தா⁴வஸித்தோ ஜாதோ ஹோதி. இத³ம், பி⁴க்க²வே, பட²மம் ரஞ்ஞோ க²த்தியஸ்ஸ முத்³தா⁴வஸித்தஸ்ஸ யாவஜீவம் ஸாரணீயம் ஹோதி.

‘‘புன சபரம், பி⁴க்க²வே, யஸ்மிம் பதே³ஸே ராஜா க²த்தியோ முத்³தா⁴வஸித்தோ ஹோதி. இத³ம், பி⁴க்க²வே, து³தியம் ரஞ்ஞோ க²த்தியஸ்ஸ முத்³தா⁴வஸித்தஸ்ஸ யாவஜீவம் ஸாரணீயம் ஹோதி.

‘‘புன சபரம், பி⁴க்க²வே, யஸ்மிம் பதே³ஸே ராஜா க²த்தியோ முத்³தா⁴வஸித்தோ ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி. இத³ம், பி⁴க்க²வே, ததியம் ரஞ்ஞோ க²த்தியஸ்ஸ முத்³தா⁴வஸித்தஸ்ஸ யாவஜீவம் ஸாரணீயம் ஹோதி. இமானி கோ², பி⁴க்க²வே, தீணி ரஞ்ஞோ க²த்தியஸ்ஸ முத்³தா⁴வஸித்தஸ்ஸ யாவஜீவம் ஸாரணீயானி ப⁴வந்தி.

‘‘ஏவமேவம் கோ², பி⁴க்க²வே, தீணிமானி பி⁴க்கு²ஸ்ஸ யாவஜீவம் ஸாரணீயானி ப⁴வந்தி. கதமானி தீணி? யஸ்மிம், பி⁴க்க²வே, பதே³ஸே பி⁴க்கு² கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜிதோ ஹோதி. இத³ம், பி⁴க்க²வே, பட²மம் பி⁴க்கு²ஸ்ஸ யாவஜீவம் ஸாரணீயம் ஹோதி.

‘‘புன சபரம், பி⁴க்க²வே, யஸ்மிம் பதே³ஸே பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. இத³ம், பி⁴க்க²வே, து³தியம் பி⁴க்கு²ஸ்ஸ யாவஜீவம் ஸாரணீயம் ஹோதி.

‘‘புன சபரம், பி⁴க்க²வே, யஸ்மிம் பதே³ஸே பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இத³ம், பி⁴க்க²வே, ததியம் பி⁴க்கு²ஸ்ஸ யாவஜீவம் ஸாரணீயம் ஹோதி. இமானி கோ², பி⁴க்க²வே, தீணி பி⁴க்கு²ஸ்ஸ யாவஜீவம் ஸாரணீயானி ப⁴வந்தீ’’தி. து³தியம்.