1. பா³லவக்³கோ³

1. ப⁴யஸுத்தம்

1. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே [ப⁴த்³த³ந்தே (க.)]’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘யானி கானிசி, பி⁴க்க²வே, ப⁴யானி உப்பஜ்ஜந்தி ஸப்³பா³னி தானி பா³லதோ உப்பஜ்ஜந்தி, நோ பண்டி³ததோ. யே கேசி உபத்³த³வா உப்பஜ்ஜந்தி ஸப்³பே³ தே பா³லதோ உப்பஜ்ஜந்தி, நோ பண்டி³ததோ. யே கேசி உபஸக்³கா³ உப்பஜ்ஜந்தி ஸப்³பே³ தே பா³லதோ உப்பஜ்ஜந்தி, நோ பண்டி³ததோ. ஸேய்யதா²பி, பி⁴க்க²வே, நளாகா³ரா வா திணாகா³ரா வா [நளாகா³ரம் வா திணாகா³ரம் வா (ஸீ.)] அக்³கி³ முத்தோ [அக்³கி³முக்கோ (ஸீ.), அக்³கி³ முக்கோ (ஸ்யா. கம். பீ.)] கூடாகா³ரானிபி ட³ஹதி உல்லித்தாவலித்தானி நிவாதானி பு²ஸிதக்³க³ளானி பிஹிதவாதபானானி; ஏவமேவம் கோ², பி⁴க்க²வே, யானி கானிசி ப⁴யானி உப்பஜ்ஜந்தி ஸப்³பா³னி தானி பா³லதோ உப்பஜ்ஜந்தி, நோ பண்டி³ததோ. யே கேசி உபத்³த³வா உப்பஜ்ஜந்தி ஸப்³பே³ தே பா³லதோ உப்பஜ்ஜந்தி, நோ பண்டி³ததோ. யே கேசி உபஸக்³கா³ உப்பஜ்ஜந்தி ஸப்³பே³ தே பா³லதோ உப்பஜ்ஜந்தி, நோ பண்டி³ததோ.

‘‘இதி கோ², பி⁴க்க²வே, ஸப்படிப⁴யோ பா³லோ, அப்படிப⁴யோ பண்டி³தோ. ஸஉபத்³த³வோ பா³லோ, அனுபத்³த³வோ பண்டி³தோ. ஸஉபஸக்³கோ³ பா³லோ, அனுபஸக்³கோ³ பண்டி³தோ. நத்தி², பி⁴க்க²வே, பண்டி³ததோ ப⁴யம், நத்தி² பண்டி³ததோ உபத்³த³வோ, நத்தி² பண்டி³ததோ உபஸக்³கோ³.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘யேஹி தீஹி த⁴ம்மேஹி ஸமன்னாக³தோ பா³லோ வேதி³தப்³போ³ தே தயோ த⁴ம்மே அபி⁴னிவஜ்ஜேத்வா, யேஹி தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³ தே தயோ த⁴ம்மே ஸமாதா³ய வத்திஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பட²மம்.

2. லக்க²ணஸுத்தம்

2. ‘‘கம்மலக்க²ணோ, பி⁴க்க²வே, பா³லோ, கம்மலக்க²ணோ பண்டி³தோ, அபதா³னஸோப⁴னீ [அபதா³னே ஸோப⁴தி (ஸ்யா. கம். பீ.)] பஞ்ஞாதி [பஞ்ஞத்தி (?)]. தீஹி, பி⁴க்க²வே, த⁴ம்மேஹி ஸமன்னாக³தோ பா³லோ வேதி³தப்³போ³. கதமேஹி தீஹி? காயது³ச்சரிதேன, வசீது³ச்சரிதேன, மனோது³ச்சரிதேன. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பா³லோ வேதி³தப்³போ³.

‘‘தீஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வேதி³தப்³போ³. கதமேஹி தீஹி? காயஸுசரிதேன, வசீஸுசரிதேன, மனோஸுசரிதேன. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘யேஹி தீஹி த⁴ம்மேஹி ஸமன்னாக³தோ பா³லோ வேதி³தப்³போ³ தே தயோ த⁴ம்மே அபி⁴னிவஜ்ஜேத்வா, யேஹி தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³ தே தயோ த⁴ம்மே ஸமாதா³ய வத்திஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியம்.

3. சிந்தீஸுத்தம்

3. ‘‘தீணிமானி, பி⁴க்க²வே, பா³லஸ்ஸ பா³லலக்க²ணானி பா³லனிமித்தானி பா³லாபதா³னானி. கதமானி தீணி? இத⁴, பி⁴க்க²வே, பா³லோ து³ச்சிந்திதசிந்தீ ச ஹோதி து³ப்³பா⁴ஸிதபா⁴ஸீ ச து³க்கடகம்மகாரீ ச. நோ சேத³ம் [நோ சேதம் (ஸ்யா. கம். க.)], பி⁴க்க²வே, பா³லோ து³ச்சிந்திதசிந்தீ ச அப⁴விஸ்ஸ து³ப்³பா⁴ஸிதபா⁴ஸீ ச து³க்கடகம்மகாரீ ச, கேன நம் பண்டி³தா ஜானேய்யும் [தேன நம் பண்டி³தா ந ஜானேய்யும் (க.), ந நம் பண்டி³தா ஜானேய்யும் (?)] – ‘பா³லோ அயம் ப⁴வம் அஸப்புரிஸோ’தி? யஸ்மா ச கோ², பி⁴க்க²வே, பா³லோ து³ச்சிந்திதசிந்தீ ச ஹோதி து³ப்³பா⁴ஸிதபா⁴ஸீ ச து³க்கடகம்மகாரீ ச தஸ்மா நம் பண்டி³தா ஜானந்தி – ‘பா³லோ அயம் ப⁴வம் அஸப்புரிஸோ’தி. இமானி கோ², பி⁴க்க²வே, தீணி பா³லஸ்ஸ பா³லலக்க²ணானி பா³லனிமித்தானி பா³லாபதா³னானி.

‘‘தீணிமானி, பி⁴க்க²வே, பண்டி³தஸ்ஸ பண்டி³தலக்க²ணானி பண்டி³தனிமித்தானி பண்டி³தாபதா³னானி. கதமானி தீணி? இத⁴, பி⁴க்க²வே, பண்டி³தோ ஸுசிந்திதசிந்தீ ச ஹோதி ஸுபா⁴ஸிதபா⁴ஸீ ச ஸுகதகம்மகாரீ ச. நோ சேத³ம், பி⁴க்க²வே, பண்டி³தோ ஸுசிந்திதசிந்தீ ச அப⁴விஸ்ஸ ஸுபா⁴ஸிதபா⁴ஸீ ச ஸுகதகம்மகாரீ ச, கேன நம் பண்டி³தா ஜானேய்யும் – ‘பண்டி³தோ அயம் ப⁴வம் ஸப்புரிஸோ’தி? யஸ்மா ச கோ², பி⁴க்க²வே, பண்டி³தோ ஸுசிந்திதசிந்தீ ச ஹோதி ஸுபா⁴ஸிதபா⁴ஸீ ச ஸுகதகம்மகாரீ ச தஸ்மா நம் பண்டி³தா ஜானந்தி – ‘பண்டி³தோ அயம் ப⁴வம் ஸப்புரிஸோ’தி. இமானி கோ², பி⁴க்க²வே, தீணி பண்டி³தஸ்ஸ பண்டி³தலக்க²ணானி பண்டி³தனிமித்தானி பண்டி³தாபதா³னானி. தஸ்மாதிஹ…. ததியம்.

4. அச்சயஸுத்தம்

4. ‘‘தீஹி, பி⁴க்க²வே, த⁴ம்மேஹி ஸமன்னாக³தோ பா³லோ வேதி³தப்³போ³. கதமேஹி தீஹி? அச்சயம் அச்சயதோ ந பஸ்ஸதி, அச்சயம் அச்சயதோ தி³ஸ்வா யதா²த⁴ம்மம் நப்படிகரோதி, பரஸ்ஸ கோ² பன அச்சயம் தே³ஸேந்தஸ்ஸ யதா²த⁴ம்மம் நப்படிக்³க³ண்ஹாதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பா³லோ வேதி³தப்³போ³.

‘‘தீஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வேதி³தப்³போ³. கதமேஹி தீஹி? அச்சயம் அச்சயதோ பஸ்ஸதி, அச்சயம் அச்சயதோ தி³ஸ்வா யதா²த⁴ம்மம் படிகரோதி, பரஸ்ஸ கோ² பன அச்சயம் தே³ஸேந்தஸ்ஸ யதா²த⁴ம்மம் படிக்³க³ண்ஹாதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³. தஸ்மாதிஹ…. சதுத்த²ம்.

5. அயோனிஸோஸுத்தம்

5. ‘‘தீஹி, பி⁴க்க²வே, த⁴ம்மேஹி ஸமன்னாக³தோ பா³லோ வேதி³தப்³போ³. கதமேஹி தீஹி? அயோனிஸோ பஞ்ஹம் கத்தா ஹோதி, அயோனிஸோ பஞ்ஹம் விஸ்ஸஜ்ஜேதா ஹோதி, பரஸ்ஸ கோ² பன யோனிஸோ பஞ்ஹம் விஸ்ஸஜ்ஜிதம் பரிமண்ட³லேஹி பத³ப்³யஞ்ஜனேஹி ஸிலிட்டே²ஹி உபக³தேஹி நாப்³ப⁴னுமோதி³தா ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பா³லோ வேதி³தப்³போ³.

‘‘தீஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வேதி³தப்³போ³. கதமேஹி தீஹி? யோனிஸோ பஞ்ஹம் கத்தா ஹோதி, யோனிஸோ பஞ்ஹம் விஸ்ஸஜ்ஜேதா ஹோதி, பரஸ்ஸ கோ² பன யோனிஸோ பஞ்ஹம் விஸ்ஸஜ்ஜிதம் பரிமண்ட³லேஹி பத³ப்³யஞ்ஜனேஹி ஸிலிட்டே²ஹி உபக³தேஹி அப்³ப⁴னுமோதி³தா ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³. தஸ்மாதிஹ…. பஞ்சமம்.

6. அகுஸலஸுத்தம்

6. ‘‘தீஹி, பி⁴க்க²வே, த⁴ம்மேஹி ஸமன்னாக³தோ பா³லோ வேதி³தப்³போ³. கதமேஹி தீஹி? அகுஸலேன காயகம்மேன, அகுஸலேன வசீகம்மேன, அகுஸலேன மனோகம்மேன. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பா³லோ வேதி³தப்³போ³.

‘‘தீஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வேதி³தப்³போ³. கதமேஹி தீஹி? குஸலேன காயகம்மேன, குஸலேன வசீகம்மேன, குஸலேன மனோகம்மேன. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³. தஸ்மாதிஹ…. ச²ட்ட²ம்.

7. ஸாவஜ்ஜஸுத்தம்

7. ‘‘தீஹி, பி⁴க்க²வே, த⁴ம்மேஹி ஸமன்னாக³தோ பா³லோ வேதி³தப்³போ³. கதமேஹி தீஹி? ஸாவஜ்ஜேன காயகம்மேன, ஸாவஜ்ஜேன வசீகம்மேன, ஸாவஜ்ஜேன மனோகம்மேன…பே… அனவஜ்ஜேன காயகம்மேன, அனவஜ்ஜேன வசீகம்மேன, அனவஜ்ஜேன மனோகம்மேன…பே…. ஸத்தமம்.

8. ஸப்³யாப³ஜ்ஜ²ஸுத்தம்

8. ‘‘தீஹி, பி⁴க்க²வே, த⁴ம்மேஹி ஸமன்னாக³தோ பா³லோ வேதி³தப்³போ³. கதமேஹி தீஹி? ஸப்³யாப³ஜ்ஜே²ன காயகம்மேன, ஸப்³யாப³ஜ்ஜே²ன வசீகம்மேன, ஸப்³யாப³ஜ்ஜே²ன மனோகம்மேன…பே… அப்³யாப³ஜ்ஜே²ன காயகம்மேன, அப்³யாப³ஜ்ஜே²ன வசீகம்மேன, அப்³யாப³ஜ்ஜே²ன மனோகம்மேன. இமேஹி, கோ², பி⁴க்க²வே, தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘யேஹி தீஹி த⁴ம்மேஹி ஸமன்னாக³தோ பா³லோ வேதி³தப்³போ³ தே தயோ த⁴ம்மே அபி⁴னிவஜ்ஜேத்வா, யேஹி தீஹி த⁴ம்மேஹி ஸமன்னாக³தோ பண்டி³தோ வேதி³தப்³போ³ தே தயோ த⁴ம்மே ஸமாதா³ய வத்திஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. அட்ட²மம்.

9. க²தஸுத்தம்

9. ‘‘தீஹி, பி⁴க்க²வே, த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. கதமேஹி தீஹி? காயது³ச்சரிதேன, வசீது³ச்சரிதேன, மனோது³ச்சரிதேன. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி.

‘‘தீஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. கதமேஹி தீஹி? காயஸுசரிதேன, வசீஸுசரிதேன, மனோஸுசரிதேன. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதீ’’தி. நவமம்.

10. மலஸுத்தம்

10. ‘‘தீஹி, பி⁴க்க²வே, த⁴ம்மேஹி ஸமன்னாக³தோ தயோ மலே அப்பஹாய யதா²ப⁴தம் நிக்கி²த்தோ ஏவம் நிரயே. கதமேஹி தீஹி? து³ஸ்ஸீலோ ச ஹோதி, து³ஸ்ஸீல்யமலஞ்சஸ்ஸ அப்பஹீனம் ஹோதி; இஸ்ஸுகீ ச ஹோதி, இஸ்ஸாமலஞ்சஸ்ஸ அப்பஹீனம் ஹோதி; மச்ச²ரீ ச ஹோதி, மச்சே²ரமலஞ்சஸ்ஸ அப்பஹீனம் ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ இமே தயோ மலே அப்பஹாய யதா²ப⁴தம் நிக்கி²த்தோ ஏவம் நிரயே.

‘‘தீஹி, பி⁴க்க²வே, த⁴ம்மேஹி ஸமன்னாக³தோ தயோ மலே பஹாய யதா²ப⁴தம் நிக்கி²த்தோ ஏவம் ஸக்³கே³. கதமேஹி தீஹி? ஸீலவா ச ஹோதி, து³ஸ்ஸீல்யமலஞ்சஸ்ஸ பஹீனம் ஹோதி; அனிஸ்ஸுகீ ச ஹோதி, இஸ்ஸாமலஞ்சஸ்ஸ பஹீனம் ஹோதி; அமச்ச²ரீ ச ஹோதி, மச்சே²ரமலஞ்சஸ்ஸ பஹீனம் ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ இமே தயோ மலே பஹாய யதா²ப⁴தம் நிக்கி²த்தோ ஏவம் ஸக்³கே³’’தி. த³ஸமம்.

பா³லவக்³கோ³ பட²மோ.