1. கம்மகரணவக்³கோ³

1. வஜ்ஜஸுத்தம்

1. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘த்³வேமானி, பி⁴க்க²வே, வஜ்ஜானி. கதமானி த்³வே? தி³ட்ட²த⁴ம்மிகஞ்ச வஜ்ஜம் ஸம்பராயிகஞ்ச வஜ்ஜம். கதமஞ்ச, பி⁴க்க²வே, தி³ட்ட²த⁴ம்மிகம் வஜ்ஜம்? இத⁴, பி⁴க்க²வே, ஏகச்சோ பஸ்ஸதி சோரம் ஆகு³சாரிம் ராஜானோ க³ஹேத்வா விவிதா⁴ கம்மகாரணா [விவிதா⁴னி கம்மகரணானி (க.)] காரேந்தே; கஸாஹிபி தாளேந்தே, வேத்தேஹிபி தாளேந்தே, அத்³த⁴த³ண்ட³கேஹிபி தாளேந்தே, ஹத்த²ம்பி சி²ந்த³ந்தே, பாத³ம்பி சி²ந்த³ந்தே, ஹத்த²பாத³ம்பி சி²ந்த³ந்தே, கண்ணம்பி சி²ந்த³ந்தே, நாஸம்பி சி²ந்த³ந்தே, கண்ணனாஸம்பி சி²ந்த³ந்தே, பி³லங்க³தா²லிகம்பி கரோந்தே, ஸங்க²முண்டி³கம்பி கரோந்தே, ராஹுமுக²ம்பி கரோந்தே, ஜோதிமாலிகம்பி கரோந்தே, ஹத்த²பஜ்ஜோதிகம்பி கரோந்தே, ஏரகவத்திகம்பி கரோந்தே, சீரகவாஸிகம்பி கரோந்தே, ஏணேய்யகம்பி கரோந்தே, ப³ளிஸமம்ஸிகம்பி கரோந்தே, கஹாபணிகம்பி கரோந்தே, கா²ராபதச்சி²கம்பி [கா²ராபடிச்ச²கம்பி (ஸ்யா. கம். க.)] கரோந்தே, பலிக⁴பரிவத்திகம்பி கரோந்தே, பலாலபீட²கம்பி [பலாலபிட்டி²கம்பி (ஸீ.)] கரோந்தே, தத்தேனபி தேலேன ஓஸிஞ்சந்தே, ஸுனகே²ஹிபி கா²தா³பேந்தே, ஜீவந்தம்பி ஸூலே உத்தாஸேந்தே, அஸினாபி ஸீஸம் சி²ந்த³ந்தே.

‘‘தஸ்ஸ ஏவம் ஹோதி – ‘யதா²ரூபானம் கோ² பாபகானம் கம்மானம் ஹேது சோரம் ஆகு³சாரிம் ராஜானோ க³ஹேத்வா விவிதா⁴ கம்மகாரணா காரேந்தி; கஸாஹிபி தாளேந்தி, வேத்தேஹிபி தாளேந்தி, அத்³த⁴த³ண்ட³கேஹிபி தாளேந்தி, ஹத்த²ம்பி சி²ந்த³ந்தி, பாத³ம்பி சி²ந்த³ந்தி, ஹத்த²பாத³ம்பி சி²ந்த³ந்தி, கண்ணம்பி சி²ந்த³ந்தி, நாஸம்பி சி²ந்த³ந்தி, கண்ணனாஸம்பி சி²ந்த³ந்தி, பி³லங்க³தா²லிகம்பி கரோந்தி, ஸங்க²முண்டி³கம்பி கரோந்தி, ராஹுமுக²ம்பி கரோந்தி, ஜோதிமாலிகம்பி கரோந்தி, ஹத்த²பஜ்ஜோதிகம்பி கரோந்தி, ஏரகவத்திகம்பி கரோந்தி, சீரகவாஸிகம்பி கரோந்தி, ஏணேய்யகம்பி கரோந்தி, ப³ளிஸமம்ஸிகம்பி கரோந்தி, கஹாபணிகம்பி கரோந்தி, கா²ராபதச்சி²கம்பி கரோந்தி, பலிக⁴பரிவத்திகம்பி கரோந்தி, பலாலபீட²கம்பி கரோந்தி, தத்தேனபி தேலேன ஓஸிஞ்சந்தி, ஸுனகே²ஹிபி கா²தா³பேந்தி, ஜீவந்தம்பி ஸூலே உத்தாஸேந்தி, அஸினாபி ஸீஸம் சி²ந்த³ந்தி. அஹஞ்சேவ [அஹஞ்சே (?)] கோ² பன ஏவரூபம் பாபகம்மம் கரேய்யம், மம்பி ராஜானோ க³ஹேத்வா ஏவரூபா விவிதா⁴ கம்மகாரணா காரேய்யும்; கஸாஹிபி தாளேய்யும்…பே… அஸினாபி ஸீஸம் சி²ந்தே³ய்யு’ந்தி. ஸோ தி³ட்ட²த⁴ம்மிகஸ்ஸ வஜ்ஜஸ்ஸ பீ⁴தோ ந பரேஸம் பாப⁴தம் விலும்பந்தோ சரதி. இத³ம் வுச்சதி, பி⁴க்க²வே, தி³ட்ட²த⁴ம்மிகம் வஜ்ஜம்.

‘‘கதமஞ்ச, பி⁴க்க²வே, ஸம்பராயிகம் வஜ்ஜம்? இத⁴, பி⁴க்க²வே, ஏகச்சோ இதி படிஸஞ்சிக்க²தி – ‘காயது³ச்சரிதஸ்ஸ கோ² பன பாபகோ து³க்கோ² விபாகோ அபி⁴ஸம்பராயம், வசீது³ச்சரிதஸ்ஸ பாபகோ து³க்கோ² விபாகோ அபி⁴ஸம்பராயம், மனோது³ச்சரிதஸ்ஸ பாபகோ து³க்கோ² விபாகோ அபி⁴ஸம்பராயம். அஹஞ்சேவ கோ² பன காயேன து³ச்சரிதம் சரேய்யம், வாசாய து³ச்சரிதம் சரேய்யம், மனஸா து³ச்சரிதம் சரேய்யம். கிஞ்ச தம் யாஹம் ந காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்ய’ந்தி. ஸோ ஸம்பராயிகஸ்ஸ வஜ்ஜஸ்ஸ பீ⁴தோ காயது³ச்சரிதம் பஹாய காயஸுசரிதம் பா⁴வேதி, வசீது³ச்சரிதம் பஹாய வசீஸுசரிதம் பா⁴வேதி, மனோது³ச்சரிதம் பஹாய மனோஸுசரிதம் பா⁴வேதி, ஸுத்³த⁴ம் அத்தானம் பரிஹரதி. இத³ம் வுச்சதி, பி⁴க்க²வே, ஸம்பராயிகம் வஜ்ஜம். ‘‘இமானி கோ², பி⁴க்க²வே, த்³வே வஜ்ஜானி. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘தி³ட்ட²த⁴ம்மிகஸ்ஸ வஜ்ஜஸ்ஸ பா⁴யிஸ்ஸாம, ஸம்பராயிகஸ்ஸ வஜ்ஜஸ்ஸ பா⁴யிஸ்ஸாம, வஜ்ஜபீ⁴ருனோ ப⁴விஸ்ஸாம வஜ்ஜப⁴யத³ஸ்ஸாவினோ’தி. ஏவஞ்ஹி வோ, பி⁴க்க²வே, ஸிக்கி²தப்³ப³ம். வஜ்ஜபீ⁴ருனோ, பி⁴க்க²வே, வஜ்ஜப⁴யத³ஸ்ஸாவினோ ஏதம் பாடிகங்க²ம் யம் பரிமுச்சிஸ்ஸதி ஸப்³ப³வஜ்ஜேஹீ’’தி. பட²மம்.

2. பதா⁴னஸுத்தம்

2. ‘‘த்³வேமானி, பி⁴க்க²வே, பதா⁴னானி து³ரபி⁴ஸம்ப⁴வானி லோகஸ்மிம். கதமானி த்³வே? யஞ்ச கி³ஹீனம் அகா³ரம் அஜ்ஜா²வஸதம் சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானுப்பதா³னத்த²ம் பதா⁴னம், யஞ்ச அகா³ரஸ்மா அனகா³ரியம் பப்³ப³ஜிதானம் ஸப்³பூ³பதி⁴படினிஸ்ஸக்³க³த்த²ம் பதா⁴னம். இமானி கோ², பி⁴க்க²வே, த்³வே பதா⁴னானி து³ரபி⁴ஸம்ப⁴வானி லோகஸ்மிம்.

‘‘ஏதத³க்³க³ம், பி⁴க்க²வே, இமேஸம் த்³வின்னம் பதா⁴னானம் யதி³த³ம் ஸப்³பூ³பதி⁴படினிஸ்ஸக்³க³த்த²ம் பதா⁴னம். தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘ஸப்³பூ³பதி⁴படினிஸ்ஸக்³க³த்த²ம் பதா⁴னம் பத³ஹிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியம்.

3. தபனீயஸுத்தம்

3. ‘‘த்³வேமே, பி⁴க்க²வே, த⁴ம்மா தபனீயா. கதமே த்³வே? இத⁴, பி⁴க்க²வே, ஏகச்சஸ்ஸ காயது³ச்சரிதம் கதம் ஹோதி, அகதம் ஹோதி காயஸுசரிதம்; வசீது³ச்சரிதம் கதம் ஹோதி; அகதம் ஹோதி வசீஸுசரிதம்; மனோது³ச்சரிதம் கதம் ஹோதி, அகதம் ஹோதி மனோஸுசரிதம். ஸோ ‘காயது³ச்சரிதம் மே கத’ந்தி தப்பதி, ‘அகதம் மே காயஸுசரித’ந்தி தப்பதி; ‘வசீது³ச்சரிதம் மே கத’ந்தி தப்பதி, ‘அகதம் மே வசீஸுசரித’ந்தி தப்பதி; ‘மனோது³ச்சரிதம் மே கத’ந்தி தப்பதி, ‘அகதம் மே மனோஸுசரித’ந்தி தப்பதி. இமே கோ², பி⁴க்க²வே, த்³வே த⁴ம்மா தபனீயா’’தி. ததியம்.

4. அதபனீயஸுத்தம்

4. ‘‘த்³வேமே, பி⁴க்க²வே, த⁴ம்மா அதபனீயா. கதமே த்³வே? இத⁴, பி⁴க்க²வே, ஏகச்சஸ்ஸ காயஸுசரிதம் கதம் ஹோதி, அகதம் ஹோதி காயது³ச்சரிதம்; வசீஸுசரிதம் கதம் ஹோதி, அகதம் ஹோதி வசீது³ச்சரிதம்; மனோஸுசரிதம் கதம் ஹோதி, அகதம் ஹோதி மனோது³ச்சரிதம். ஸோ ‘காயஸுசரிதம் மே கத’ந்தி ந தப்பதி, ‘அகதம் மே காயது³ச்சரித’ந்தி ந தப்பதி; ‘வசீஸுசரிதம் மே கத’ந்தி ந தப்பதி, ‘அகதம் மே வசீது³ச்சரித’ந்தி ந தப்பதி; ‘மனோஸுசரிதம் மே கத’ந்தி ந தப்பதி, ‘அகதம் மே மனோது³ச்சரித’ந்தி ந தப்பதி. இமே கோ², பி⁴க்க²வே, த்³வே த⁴ம்மா அதபனீயா’’தி. சதுத்த²ம்.

5. உபஞ்ஞாதஸுத்தம்

5. ‘‘த்³வின்னாஹம், பி⁴க்க²வே, த⁴ம்மானம் உபஞ்ஞாஸிம் – யா ச அஸந்துட்டி²தா குஸலேஸு த⁴ம்மேஸு, யா ச அப்படிவானிதா பதா⁴னஸ்மிம். அப்படிவானீ ஸுதா³ஹம், பி⁴க்க²வே, பத³ஹாமி – ‘காமம் தசோ ச ந்ஹாரு [நஹாரு (ஸீ. ஸ்யா. கம். பீ.)] ச அட்டி² ச அவஸிஸ்ஸது, ஸரீரே உபஸுஸ்ஸது மம்ஸலோஹிதம், யம் தம் புரிஸதா²மேன புரிஸவீரியேன புரிஸபரக்கமேன பத்தப்³ப³ம் ந தம் அபாபுணித்வா வீரியஸ்ஸ ஸண்டா²னம் ப⁴விஸ்ஸதீ’தி. தஸ்ஸ மய்ஹம், பி⁴க்க²வே, அப்பமாதா³தி⁴க³தா ஸம்போ³தி⁴, அப்பமாதா³தி⁴க³தோ அனுத்தரோ யோக³க்கே²மோ. தும்ஹே சேபி, பி⁴க்க²வே, அப்படிவானம் பத³ஹேய்யாத² – ‘காமம் தசோ ச ந்ஹாரு ச அட்டி² ச அவஸிஸ்ஸது, ஸரீரே உபஸுஸ்ஸது மம்ஸலோஹிதம், யம் தம் புரிஸதா²மேன புரிஸவீரியேன புரிஸபரக்கமேன பத்தப்³ப³ம் ந தம் அபாபுணித்வா வீரியஸ்ஸ ஸண்டா²னம் ப⁴விஸ்ஸதீ’தி, தும்ஹேபி, பி⁴க்க²வே, நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸத². தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அப்படிவானம் பத³ஹிஸ்ஸாம. காமம் தசோ ச ந்ஹாரு ச அட்டி² ச அவஸிஸ்ஸது, ஸரீரே உபஸுஸ்ஸது மம்ஸலோஹிதம், யம் தம் புரிஸதா²மேன புரிஸவீரியேன புரிஸபரக்கமேன பத்தப்³ப³ம் ந தம் அபாபுணித்வா வீரியஸ்ஸ ஸண்டா²னம் ப⁴விஸ்ஸதீ’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பஞ்சமம்.

6. ஸம்யோஜனஸுத்தம்

6. ‘‘த்³வேமே, பி⁴க்க²வே, த⁴ம்மா. கதமே த்³வே? யா ச ஸம்யோஜனியேஸு த⁴ம்மேஸு அஸ்ஸாதா³னுபஸ்ஸிதா, யா ச ஸம்யோஜனியேஸு த⁴ம்மேஸு நிப்³பி³தா³னுபஸ்ஸிதா. ஸம்யோஜனியேஸு, பி⁴க்க²வே, த⁴ம்மேஸு அஸ்ஸாதா³னுபஸ்ஸீ விஹரந்தோ ராக³ம் ந பஜஹதி, தோ³ஸம் ந பஜஹதி, மோஹம் ந பஜஹதி. ராக³ம் அப்பஹாய, தோ³ஸம் அப்பஹாய, மோஹம் அப்பஹாய ந பரிமுச்சதி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ந பரிமுச்சதி து³க்க²ஸ்மாதி வதா³மி.

‘‘ஸம்யோஜனியேஸு, பி⁴க்க²வே, த⁴ம்மேஸு நிப்³பி³தா³னுபஸ்ஸீ விஹரந்தோ ராக³ம் பஜஹதி, தோ³ஸம் பஜஹதி, மோஹம் பஜஹதி. ராக³ம் பஹாய, தோ³ஸம் பஹாய, மோஹம் பஹாய, பரிமுச்சதி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. பரிமுச்சதி து³க்க²ஸ்மாதி வதா³மி. இமே கோ², பி⁴க்க²வே, த்³வே த⁴ம்மா’’தி. ச²ட்ட²ம்.

7. கண்ஹஸுத்தம்

7. ‘‘த்³வேமே, பி⁴க்க²வே, த⁴ம்மா கண்ஹா. கதமே த்³வே? அஹிரிகஞ்ச அனோத்தப்பஞ்ச. இமே கோ², பி⁴க்க²வே, த்³வே த⁴ம்மா கண்ஹா’’தி. ஸத்தமம்.

8. ஸுக்கஸுத்தம்

8. ‘‘த்³வேமே, பி⁴க்க²வே, த⁴ம்மா ஸுக்கா. கதமே த்³வே? ஹிரீ [ஹிரி (ஸீ. ஸ்யா. கம். பீ.)] ச ஓத்தப்பஞ்ச. இமே கோ², பி⁴க்க²வே, த்³வே த⁴ம்மா ஸுக்கா’’தி. அட்ட²மம்.

9. சரியஸுத்தம்

9. ‘‘த்³வேமே, பி⁴க்க²வே, த⁴ம்மா ஸுக்கா லோகம் பாலேந்தி. கதமே த்³வே? ஹிரீ ச ஓத்தப்பஞ்ச. இமே கோ², பி⁴க்க²வே, த்³வே ஸுக்கா த⁴ம்மா லோகம் ந பாலேய்யும், நயித⁴ பஞ்ஞாயேத² மாதாதி வா மாதுச்சா²தி வா மாதுலானீதி வா ஆசரியப⁴ரியாதி வா க³ரூனம் தா³ராதி வா. ஸம்பே⁴த³ம் லோகோ அக³மிஸ்ஸ, யதா² அஜேளகா குக்குடஸூகரா ஸோணஸிங்கா³லா [ஸோணஸிகா³லா (ஸீ. ஸ்யா. கம். பீ.)]. யஸ்மா ச கோ², பி⁴க்க²வே, இமே த்³வே ஸுக்கா த⁴ம்மா லோகம் பாலேந்தி தஸ்மா பஞ்ஞாயதி [பஞ்ஞாயந்தி (ஸீ.)] மாதாதி வா மாதுச்சா²தி வா மாதுலானீதி வா ஆசரியப⁴ரியாதி வா க³ரூனம் தா³ராதி வா’’தி. நவமம்.

10. வஸ்ஸூபனாயிகஸுத்தம்

10. ‘‘த்³வேமா, பி⁴க்க²வே, வஸ்ஸூபனாயிகா. கதமா த்³வே? புரிமிகா ச பச்சி²மிகா ச. இமா கோ², பி⁴க்க²வே, த்³வே வஸ்ஸூபனாயிகா’’தி. த³ஸமம்.

கம்மகரணவக்³கோ³ பட²மோ.

தஸ்ஸுத்³தா³னம் –

வஜ்ஜா பதா⁴னா த்³வே தபனீயா, உபஞ்ஞாதேன பஞ்சமம்;

ஸம்யோஜனஞ்ச கண்ஹஞ்ச, ஸுக்கம் சரியா வஸ்ஸூபனாயிகேன வக்³கோ³.