8. மனஸிகாரஸுத்தம்

8. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச –

‘‘ஸியா நு கோ², ப⁴ந்தே, பி⁴க்கு²னோ ததா²ரூபோ ஸமாதி⁴படிலாபோ⁴ யதா² ந சக்கு²ம் மனஸி கரேய்ய, ந ரூபம் மனஸி கரேய்ய, ந ஸோதம் மனஸி கரேய்ய, ந ஸத்³த³ம் மனஸி கரேய்ய, ந கா⁴னம் மனஸி கரேய்ய, ந க³ந்த⁴ம் மனஸி கரேய்ய, ந ஜிவ்ஹம் மனஸி கரேய்ய, ந ரஸம் மனஸி கரேய்ய, ந காயம் மனஸி கரேய்ய, ந போ²ட்ட²ப்³ப³ம் மனஸி கரேய்ய, ந பத²விம் மனஸி கரேய்ய, ந ஆபம் மனஸி கரேய்ய, ந தேஜம் மனஸி கரேய்ய, ந வாயம் மனஸி கரேய்ய, ந ஆகாஸானஞ்சாயதனம் மனஸி கரேய்ய, ந விஞ்ஞாணஞ்சாயதனம் மனஸி கரேய்ய, ந ஆகிஞ்சஞ்ஞாயதனம் மனஸி கரேய்ய, ந நேவஸஞ்ஞானாஸஞ்ஞாயதனம் மனஸி கரேய்ய, ந இத⁴லோகம் மனஸி கரேய்ய, ந பரலோகம் மனஸி கரேய்ய, யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா, தம்பி ந மனஸி கரேய்ய; மனஸி ச பன கரேய்யா’’தி?

‘‘ஸியா, ஆனந்த³, பி⁴க்கு²னோ ததா²ரூபோ ஸமாதி⁴படிலாபோ⁴ யதா² ந சக்கு²ம் மனஸி கரேய்ய, ந ரூபம் மனஸி கரேய்ய, ந ஸோதம் மனஸி கரேய்ய, ந ஸத்³த³ம் மனஸி கரேய்ய, ந கா⁴னம் மனஸி கரேய்ய, ந க³ந்த⁴ம் மனஸி கரேய்ய, ந ஜிவ்ஹம் மனஸி கரேய்ய, ந ரஸம் மனஸி கரேய்ய, ந காயம் மனஸி கரேய்ய, ந போ²ட்ட²ப்³ப³ம் மனஸி கரேய்ய, ந பத²விம் மனஸி கரேய்ய, ந ஆபம் மனஸி கரேய்ய, ந தேஜம் மனஸி கரேய்ய, ந வாயம் மனஸி கரேய்ய, ந ஆகாஸானஞ்சாயதனம் மனஸி கரேய்ய, ந விஞ்ஞாணஞ்சாயதனம் மனஸி கரேய்ய, ந ஆகிஞ்சஞ்ஞாயதனம் மனஸி கரேய்ய, ந நேவஸஞ்ஞானாஸஞ்ஞாயதனம் மனஸி கரேய்ய, ந இத⁴லோகம் மனஸி கரேய்ய, ந பரலோகம் மனஸி கரேய்ய, யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா, தம்பி ந மனஸி கரேய்ய; மனஸி ச பன கரேய்யா’’தி.

‘‘யதா² கத²ம் பன, ப⁴ந்தே, ஸியா பி⁴க்கு²னோ ததா²ரூபோ ஸமாதி⁴படிலாபோ⁴ யதா² ந சக்கு²ம் மனஸி கரேய்ய, ந ரூபம் மனஸி கரேய்ய… யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா, தம்பி ந மனஸி கரேய்ய; மனஸி ச பன கரேய்யா’’தி?

‘‘இதா⁴னந்த³, பி⁴க்கு² ஏவம் மனஸி கரோதி – ‘ஏதம் ஸந்தம் ஏதம் பணீதம், யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஏவம் கோ², ஆனந்த³, ஸியா பி⁴க்கு²னோ ததா²ரூபோ ஸமாதி⁴படிலாபோ⁴ யதா² ந சக்கு²ம் மனஸி கரேய்ய, ந ரூபம் மனஸி கரேய்ய…பே… யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா, தம்பி ந மனஸி கரேய்ய; மனஸி ச பன கரேய்யா’’தி. அட்ட²மம்.