7. பட²மஸஞ்சேதனிகஸுத்தம்

217. ‘‘நாஹம், பி⁴க்க²வே, ஸஞ்சேதனிகானம் கம்மானம் கதானம் உபசிதானம் அப்படிஸம்வேதி³த்வா [அப்படிஸம்விதி³த்வா (ஸீ. ஸ்யா. பீ.)] ப்³யந்தீபா⁴வம் வதா³மி. தஞ்ச கோ² தி³ட்டே²வ த⁴ம்மே உபபஜ்ஜே வா [உபபஜ்ஜம் வா (க.) அ. நி. 6.63 பஸ்ஸிதப்³ப³ம், உபபஜ்ஜ வா (ம. நி. 3.303)] அபரே வா பரியாயே. ந த்வேவாஹம், பி⁴க்க²வே, ஸஞ்சேதனிகானம் கம்மானம் கதானம் உபசிதானம் அப்படிஸம்வேதி³த்வா து³க்க²ஸ்ஸந்தகிரியம் வதா³மி.

‘‘தத்ர, பி⁴க்க²வே, திவிதா⁴ காயகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா [அகுஸலம் ஸஞ்சேதனிகம் து³க்கு²த்³ரயம் து³க்க²விபாகம் (க.)] ஹோதி; சதுப்³பி³தா⁴ வசீகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி; திவிதா⁴ மனோகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி.

‘‘கத²ஞ்ச, பி⁴க்க²வே, திவிதா⁴ காயகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி? இத⁴, பி⁴க்க²வே, ஏகச்சோ பாணாதிபாதீ ஹோதி லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ ஸப்³ப³பாணபூ⁴தேஸு.

‘‘அதி³ன்னாதா³யீ ஹோதி. யம் தம் பரஸ்ஸ பரவித்தூபகரணம் கா³மக³தம் வா அரஞ்ஞக³தம் வா, தம் அதி³ன்னம் தே²ய்யஸங்கா²தம் ஆதா³தா ஹோதி.

‘‘காமேஸுமிச்சா²சாரீ ஹோதி. யா தா மாதுரக்கி²தா…பே… அந்தமஸோ மாலாகு³ளபரிக்கி²த்தாபி, ததா²ரூபாஸு சாரித்தம் ஆபஜ்ஜிதா ஹோதி. ஏவம் கோ², பி⁴க்க²வே, திவிதா⁴ காயகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி.

‘‘கத²ஞ்ச, பி⁴க்க²வே, சதுப்³பி³தா⁴ வசீகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி? இத⁴, பி⁴க்க²வே, ஏகச்சோ முஸாவாதீ³ ஹோதி. ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² ‘ஏஹம்போ⁴ புரிஸ, யம் ஜானாஸி தம் வதே³ஹீ’தி, ஸோ அஜானம் வா ஆஹ ‘ஜானாமீ’தி, ஜானம் வா ஆஹ ‘ந ஜானாமீ’தி, அபஸ்ஸம் வா ஆஹ ‘பஸ்ஸாமீ’தி, பஸ்ஸம் வா ஆஹ ‘ந பஸ்ஸாமீ’தி, இதி அத்தஹேது வா பரஹேது வா ஆமிஸகிஞ்சிக்க²ஹேது வா ஸம்பஜானமுஸா பா⁴ஸிதா ஹோதி.

‘‘பிஸுணவாசோ ஹோதி. இதோ ஸுத்வா அமுத்ர அக்கா²தா இமேஸம் பே⁴தா³ய, அமுத்ர வா ஸுத்வா இமேஸம் அக்கா²தா அமூஸம் பே⁴தா³ய. இதி ஸமக்³கா³னம் வா பே⁴த்தா பி⁴ன்னானம் வா அனுப்பதா³தா வக்³கா³ராமோ வக்³க³ரதோ வக்³க³னந்தீ³, வக்³க³கரணிம் வாசம் பா⁴ஸிதா ஹோதி.

‘‘ப²ருஸவாசோ ஹோதி. யா ஸா வாசா அண்ட³கா கக்கஸா பரகடுகா பராபி⁴ஸஜ்ஜனீ கோத⁴ஸாமந்தா. அஸமாதி⁴ஸம்வத்தனிகா, ததா²ரூபிம் வாசம் பா⁴ஸிதா ஹோதி.

‘‘ஸம்ப²ப்பலாபீ ஹோதி அகாலவாதீ³ அபூ⁴தவாதீ³ அனத்த²வாதீ³ அத⁴ம்மவாதீ³ அவினயவாதீ³, அனிதா⁴னவதிம் வாசம் பா⁴ஸிதா ஹோதி அகாலேன அனபதே³ஸம் அபரியந்தவதிம் அனத்த²ஸம்ஹிதம். ஏவம் கோ², பி⁴க்க²வே, சதுப்³பி³தா⁴ வசீகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி.

‘‘கத²ஞ்ச, பி⁴க்க²வே, திவிதா⁴ மனோகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி? இத⁴, பி⁴க்க²வே, ஏகச்சோ அபி⁴ஜ்ஜா²லு ஹோதி. யம் தம் பரஸ்ஸ பரவித்தூபகரணம், தம் அபி⁴ஜ்ஜா²தா ஹோதி – ‘அஹோ வத, யம் பரஸ்ஸ தம் மம அஸ்ஸா’தி.

‘‘ப்³யாபன்னசித்தோ ஹோதி பது³ட்ட²மனஸங்கப்போ – ‘இமே ஸத்தா ஹஞ்ஞந்து வா ப³ஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா வா அஹேஸு’ந்தி.

மிச்சா²தி³ட்டி²கோ ஹோதி விபரீதத³ஸ்ஸனோ – ‘நத்தி² தி³ன்னம்…பே. … யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ஏவம் கோ², பி⁴க்க²வே, திவிதா⁴ மனோகம்மந்தஸந்தோ³ஸப்³யாபத்தி அகுஸலஸஞ்சேதனிகா து³க்கு²த்³ரயா து³க்க²விபாகா ஹோதி.

‘‘திவித⁴ காயகம்மந்தஸந்தோ³ஸப்³யாபத்தி அகுஸலஸஞ்சேதனிகாஹேது [… ஸஞ்சேதனிகஹேது (க.)] வா, பி⁴க்க²வே, ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி; சதுப்³பி³த⁴வசீகம்மந்தஸந்தோ³ஸப்³யாபத்தி அகுஸலஸஞ்சேதனிகாஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி; திவித⁴மனோகம்மந்தஸந்தோ³ஸப்³யாபத்தி அகுஸலஸஞ்சேதனிகாஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி.

‘‘ஸேய்யதா²பி, பி⁴க்க²வே, அபண்ணகோ மணி உத்³த⁴ம்கி²த்தோ யேன யேனேவ பதிட்டா²தி ஸுப்பதிட்டி²தம்யேவ பதிட்டா²தி; ஏவமேவம் கோ², பி⁴க்க²வே, திவித⁴காயகம்மந்தஸந்தோ³ஸப்³யாபத்தி அகுஸலஸஞ்சேதனிகாஹேது வா ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி; சதுப்³பி³த⁴வசீகம்மந்தஸந்தோ³ஸப்³யாபத்தி அகுஸலஸஞ்சேதனிகாஹேது வா ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தி; திவித⁴மனோகம்மந்தஸந்தோ³ஸப்³யாபத்தி அகுஸலஸஞ்சேதனிகாஹேது வா ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தீதி.

‘‘நாஹம், பி⁴க்க²வே, ஸஞ்சேதனிகானம் கம்மானம் கதானம் உபசிதானம் அப்படிஸம்வேதி³த்வா ப்³யந்தீபா⁴வம் வதா³மி, தஞ்ச கோ² தி³ட்டே²வ த⁴ம்மே உபபஜ்ஜே வா அபரே வா பரியாயே. ந த்வேவாஹம், பி⁴க்க²வே, ஸஞ்சேதனிகானம் கம்மானம் கதானம் உபசிதானம் அப்படிஸம்வேதி³த்வா து³க்க²ஸ்ஸந்தகிரியம் வதா³மி.

‘‘தத்ர, பி⁴க்க²வே, திவிதா⁴ காயகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி; சதுப்³பி³தா⁴ வசீகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி; திவிதா⁴ மனோகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி.

‘‘கத²ஞ்ச, பி⁴க்க²வே, திவிதா⁴ காயகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி? இத⁴, பி⁴க்க²வே, ஏகச்சோ பாணாதிபாதம் பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ, ஸப்³ப³பாணபூ⁴தஹிதானுகம்பீ விஹரதி…பே….

‘‘அதி³ன்னாதா³னம் பஹாய, அதி³ன்னாதா³னா படிவிரதோ ஹோதி. யம் தம் பரஸ்ஸ பரவித்தூபகரணம் கா³மக³தம் வா அரஞ்ஞக³தம் வா, ந தம் அதி³ன்னம் தே²ய்யஸங்கா²தம் ஆதா³தா ஹோதி.

‘‘காமேஸுமிச்சா²சாரம் பஹாய, காமேஸுமிச்சா²சாரா படிவிரதோ ஹோதி. யா தா மாதுரக்கி²தா …பே… அந்தமஸோ மாலாகு³ளபரிக்கி²த்தாபி, ததா²ரூபாஸு ந சாரித்தம் ஆபஜ்ஜிதா ஹோதி. ஏவம் கோ², பி⁴க்க²வே, திவிதா⁴ காயகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி.

‘‘கத²ஞ்ச, பி⁴க்க²வே, சதுப்³பி³தா⁴ வசீகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி? இத⁴, பி⁴க்க²வே, ஏகச்சோ முஸாவாத³ம் பஹாய முஸாவாதா³ படிவிரதோ ஹோதி. ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² ‘ஏஹம்போ⁴ புரிஸ, யம் ஜானாஸி தம் வதே³ஹீ’தி, ஸோ அஜானம் வா ஆஹ ‘ந ஜானாமீ’தி, ஜானம் வா ஆஹ ‘ஜானாமீ’தி, அபஸ்ஸம் வா ஆஹ ‘ந பஸ்ஸாமீ’தி, பஸ்ஸம் வா ஆஹ ‘பஸ்ஸாமீ’தி, இதி அத்தஹேது வா பரஹேது வா ஆமிஸகிஞ்சிக்க²ஹேது வா ந ஸம்பஜானமுஸா பா⁴ஸிதா ஹோதி.

‘‘பிஸுணம் வாசம் பஹாய, பிஸுணாய வாசாய படிவிரதோ ஹோதி – ந இதோ ஸுத்வா அமுத்ர அக்கா²தா இமேஸம் பே⁴தா³ய, அமுத்ர வா ஸுத்வா ந இமேஸம் அக்கா²தா அமூஸம் பே⁴தா³ய. இதி பி⁴ன்னானம் வா ஸந்தா⁴தா ஸஹிதானம் வா அனுப்பதா³தா ஸமக்³கா³ராமோ ஸமக்³க³ரதோ ஸமக்³க³னந்தி³ம், ஸமக்³க³கரணிம் வாசம் பா⁴ஸிதா ஹோதி.

‘‘ப²ருஸம் வாசம் பஹாய, ப²ருஸாய வாசாய படிவிரதோ ஹோதி. யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிம் வாசம் பா⁴ஸிதா ஹோதி.

‘‘ஸம்ப²ப்பலாபம் பஹாய, ஸம்ப²ப்பலாபா படிவிரதோ ஹோதி காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³, நிதா⁴னவதிம் வாசம் பா⁴ஸிதா ஹோதி காலேன ஸாபதே³ஸம் பரியந்தவதிம் அத்த²ஸம்ஹிதம். ஏவம் கோ², பி⁴க்க²வே, சதுப்³பி³தா⁴ வசீகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி.

‘‘கத²ஞ்ச, பி⁴க்க²வே, திவிதா⁴ மனோகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி? இத⁴, பி⁴க்க²வே, ஏகச்சோ அனபி⁴ஜ்ஜா²லு ஹோதி. யம் தம் பரஸ்ஸ பரவித்தூபகரணம் தம் அனபி⁴ஜ்ஜா²தா ஹோதி – ‘அஹோ வத, யம் பரஸ்ஸ தம் மமஸ்ஸா’தி.

‘‘அப்³யாபன்னசித்தோ ஹோதி அப்பது³ட்ட²மனஸங்கப்போ – ‘இமே ஸத்தா அவேரா ஹோந்து அப்³யாபஜ்ஜா அனீகா⁴, ஸுகீ² அத்தானம் பரிஹரந்தூ’தி.

‘‘ஸம்மாதி³ட்டி²கோ ஹோதி அவிபரீதத³ஸ்ஸனோ – ‘அத்தி² தி³ன்னம், அத்தி² யிட்ட²ம்…பே… யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ஏவம் கோ², பி⁴க்க²வே, திவிதா⁴ மனோகம்மந்தஸம்பத்தி குஸலஸஞ்சேதனிகா ஸுகு²த்³ரயா ஸுக²விபாகா ஹோதி.

‘‘திவித⁴காயகம்மந்தஸம்பத்திகுஸலஸஞ்சேதனிகாஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி; சதுப்³பி³த⁴வசீகம்மந்தஸம்பத்திகுஸலஸஞ்சேதனிகாஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி; திவித⁴மனோகம்மந்தஸம்பத்திகுஸலஸஞ்சேதனிகாஹேது வா, பி⁴க்க²வே, ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி.

‘‘ஸேய்யதா²பி, பி⁴க்க²வே, அபண்ணகோ மணி உத்³த⁴ம்கி²த்தோ யேன யேனேவ பதிட்டா²தி ஸுப்பதிட்டி²தம்யேவ பதிட்டா²தி; ஏவமேவம் கோ², பி⁴க்க²வே, திவித⁴காயகம்மந்தஸம்பத்திகுஸலஸஞ்சேதனிகாஹேது வா ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி; சதுப்³பி³த⁴வசீகம்மந்தஸம்பத்திகுஸலஸஞ்சேதனிகாஹேது வா ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி; திவித⁴மனோகம்மந்தஸம்பத்திகுஸலஸஞ்சேதனிகாஹேது வா ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தி. நாஹம், பி⁴க்க²வே, ஸஞ்சேதனிகானம் கம்மானம் கதானம் உபசிதானம் அப்படிஸம்வேதி³த்வா ப்³யந்தீபா⁴வம் வதா³மி. தஞ்ச கோ² தி³ட்டே²வ த⁴ம்மே உபபஜ்ஜே வா அபரே வா பரியாயே. ந த்வேவாஹம், பி⁴க்க²வே, ஸஞ்சேதனிகானம் கம்மானம் கதானம் உபசிதானம் அப்படிஸம்வேதி³த்வா து³க்க²ஸ்ஸந்தகிரியம் வதா³மீ’’தி. ஸத்தமம். [அட்ட²கதா²யம் பன அட்ட²மஸுத்தம்பி ஏத்தே²வ பரியாபன்னம் விய ஸம்வண்ணனா தி³ஸ்ஸதி]