1. பட²மனிரயஸக்³க³ஸுத்தம்

211. ‘‘த³ஸஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி த³ஸஹி? இத⁴, பி⁴க்க²வே, ஏகச்சோ பாணாதிபாதீ ஹோதி லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ ஸப்³ப³பாணபூ⁴தேஸு [நத்தே²த்த² பாட²பே⁴தோ³].

‘‘அதி³ன்னாதா³யீ ஹோதி. யம் தம் பரஸ்ஸ பரவித்தூபகரணம் கா³மக³தம் வா அரஞ்ஞக³தம் வா, தம் அதி³ன்னம் தே²ய்யஸங்கா²தம் ஆதா³தா ஹோதி.

‘‘காமேஸு மிச்சா²சாரீ ஹோதி. யா தா மாதுரக்கி²தா பிதுரக்கி²தா மாதாபிதுரக்கி²தா பா⁴துரக்கி²தா ப⁴கி³னிரக்கி²தா ஞாதிரக்கி²தா கோ³த்தரக்கி²தா த⁴ம்மரக்கி²தா ஸஸாமிகா ஸபரித³ண்டா³ அந்தமஸோ மாலாகு³ளபரிக்கி²த்தாபி, ததா²ரூபாஸு சாரித்தம் ஆபஜ்ஜிதா ஹோதி.

‘‘முஸாவாதீ³ ஹோதி. ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யம் ஜானாஸி தம் வதே³ஹீ’தி, ஸோ அஜானம் வா ஆஹ ‘ஜானாமீ’தி, ஜானம் வா ஆஹ ‘ந ஜானாமீ’தி, அபஸ்ஸம் வா ஆஹ ‘பஸ்ஸாமீ’தி, பஸ்ஸம் வா ஆஹ ‘ந பஸ்ஸாமீ’தி. இதி அத்தஹேது வா பரஹேது வா ஆமிஸகிஞ்சிக்க²ஹேது வா ஸம்பஜானமுஸா பா⁴ஸிதா ஹோதி.

‘‘பிஸுணவாசோ ஹோதி – இதோ ஸுத்வா அமுத்ர அக்கா²தா இமேஸம் பே⁴தா³ய, அமுத்ர வா ஸுத்வா இமேஸம் அக்கா²தா அமூஸம் பே⁴தா³ய. இதி ஸமக்³கா³னம் வா பே⁴த்தா பி⁴ன்னானம் வா அனுப்பதா³தா வக்³கா³ராமோ வக்³க³ரதோ வக்³க³னந்தீ³, வக்³க³கரணிம் வாசம் பா⁴ஸிதா ஹோதி.

‘‘ப²ருஸவாசோ ஹோதி – யா ஸா வாசா அண்ட³கா கக்கஸா பரகடுகா பராபி⁴ஸஜ்ஜனீ கோத⁴ஸாமந்தா அஸமாதி⁴ஸம்வத்தனிகா, ததா²ரூபிம் வாசம் பா⁴ஸிதா ஹோதி.

‘‘ஸம்ப²ப்பலாபீ ஹோதி அகாலவாதீ³ அபூ⁴தவாதீ³ அனத்த²வாதீ³ அத⁴ம்மவாதீ³ அவினயவாதீ³, அனிதா⁴னவதிம் வாசம் பா⁴ஸிதா ஹோதி அகாலேன அனபதே³ஸம் அபரியந்தவதிம் அனத்த²ஸம்ஹிதம்.

‘‘அபி⁴ஜ்ஜா²லு ஹோதி. யம் தம் பரஸ்ஸ பரவித்தூபகரணம் தம் அபி⁴ஜ்ஜா²தா ஹோதி – ‘அஹோ வத யம் பரஸ்ஸ தம் மம அஸ்ஸா’தி.

‘‘ப்³யாபன்னசித்தோ ஹோதி பது³ட்ட²மனஸங்கப்போ – ‘இமே ஸத்தா ஹஞ்ஞந்து வா ப³ஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா வா அஹேஸு’ந்தி.

‘‘மிச்சா²தி³ட்டி²கோ ஹோதி விபரீதத³ஸ்ஸனோ – ‘நத்தி² தி³ன்னம், நத்தி² யிட்ட²ம், நத்தி² ஹுதம், நத்தி² ஸுகதது³க்கடானம் கம்மானம் ப²லம் விபாகோ, நத்தி² அயம் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘த³ஸஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி த³ஸஹி? இத⁴, பி⁴க்க²வே, ஏகச்சோ பாணாதிபாதம் பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ, ஸப்³ப³பாணபூ⁴தஹிதானுகம்பீ விஹரதி.

‘‘அதி³ன்னாதா³னம் பஹாய அதி³ன்னாதா³னா படிவிரதோ ஹோதி. யம் தம் பரஸ்ஸ பரவித்தூபகரணம் கா³மக³தம் வா அரஞ்ஞக³தம் வா, ந தம் அதி³ன்னம் தே²ய்யஸங்கா²தம் ஆதா³தா ஹோதி.

‘‘காமேஸுமிச்சா²சாரம் பஹாய காமேஸுமிச்சா²சாரா படிவிரதோ ஹோதி. யா தா மாதுரக்கி²தா…பே… அந்தமஸோ மாலாகு³ளபரிக்கி²த்தாபி, ததா²ரூபாஸு ந சாரித்தம் ஆபஜ்ஜிதா ஹோதி.

‘‘முஸாவாத³ம் பஹாய முஸாவாதா³ படிவிரதோ ஹோதி. ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யம் ஜானாஸி தம் வதே³ஹீ’தி, ஸோ அஜானம் வா ஆஹ ‘ந ஜானாமீ’தி, ஜானம் வா ஆஹ ‘ஜானாமீ’தி, அபஸ்ஸம் வா ஆஹ ‘ந பஸ்ஸாமீ’தி, பஸ்ஸம் வா ஆஹ ‘பஸ்ஸாமீ’தி. இதி அத்தஹேது வா பரஹேது வா ஆமிஸகிஞ்சிக்க²ஹேது வா ந ஸம்பஜானமுஸா பா⁴ஸிதா ஹோதி.

‘‘பிஸுணவாசம் பஹாய பிஸுணாய வாசாய படிவிரதோ ஹோதி – ந இதோ ஸுத்வா அமுத்ர அக்கா²தா இமேஸம் பே⁴தா³ய, அமுத்ர வா ஸுத்வா இமேஸம் அக்கா²தா அமூஸம் பே⁴தா³ய. இதி பி⁴ன்னானம் வா ஸந்தா⁴தா ஸஹிதானம் வா அனுப்பதா³தா ஸமக்³கா³ராமோ ஸமக்³க³ரதோ ஸமக்³க³னந்தீ³, ஸமக்³க³கரணிம் வாசம் பா⁴ஸிதா ஹோதி.

‘‘ப²ருஸவாசம் பஹாய ப²ருஸாய வாசாய படிவிரதோ ஹோதி. யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிம் வாசம் பா⁴ஸிதா ஹோதி.

‘‘ஸம்ப²ப்பலாபம் பஹாய ஸம்ப²ப்பலாபா படிவிரதோ ஹோதி காலவாதீ³ பூ⁴தவாதீ³, அத்த²வாதீ³ த⁴ம்மவாதீ³ வினயவாதீ³, நிதா⁴னவதிம் வாசம் பா⁴ஸிதா ஹோதி காலேன ஸாபதே³ஸம் பரியந்தவதிம் அத்த²ஸம்ஹிதம்.

‘‘அனபி⁴ஜ்ஜா²லு ஹோதி. யம் தம் பரஸ்ஸ பரவித்தூபகரணம் தம் அனபி⁴ஜ்ஜா²தா ஹோதி – ‘அஹோ வத யம் பரஸ்ஸ தம் மம அஸ்ஸா’தி.

‘‘அப்³யாபன்னசித்தோ ஹோதி அப்பது³ட்ட²மனஸங்கப்போ – ‘இமே ஸத்தா அவேரா ஹோந்து அப்³யாபஜ்ஜா அனீகா⁴, ஸுகீ² அத்தானம் பரிஹரந்தூ’தி.

‘‘ஸம்மாதி³ட்டி²கோ ஹோதி அவிபரீதத³ஸ்ஸனோ – ‘அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகடது³க்கடானம் கம்மானம் ப²லம் விபாகோ, அத்தி² அயம் லோகோ, அத்தி² பரோ லோகோ, அத்தி² மாதா, அத்தி² பிதா, அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. பட²மம்.