(20) 5. அபரபுக்³க³லவக்³கோ³

நஸேவிதப்³பா³தி³ஸுத்தானி

199. ‘‘த³ஸஹி, பி⁴க்க²வே, த⁴ம்மேஹி ஸமன்னாக³தோ புக்³க³லோ ந ஸேவிதப்³போ³. கதமேஹி த³ஸஹி? பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி, அபி⁴ஜ்ஜா²லு ஹோதி, ப்³யாபன்னசித்தோ ஹோதி, மிச்சா²தி³ட்டி²கோ ஹோதி – இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ புக்³க³லோ ந ஸேவிதப்³போ³.

‘‘த³ஸஹி, பி⁴க்க²வே, த⁴ம்மேஹி ஸமன்னாக³தோ புக்³க³லோ ஸேவிதப்³போ³. கதமேஹி த³ஸஹி? பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி, அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி²கோ ஹோதி – இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ புக்³க³லோ ஸேவிதப்³போ³’’.

200-209. ‘‘த³ஸஹி, பி⁴க்க²வே, த⁴ம்மேஹி ஸமன்னாக³தோ புக்³க³லோ ந ப⁴ஜிதப்³போ³…பே… ப⁴ஜிதப்³போ³… ந பயிருபாஸிதப்³போ³… பயிருபாஸிதப்³போ³… ந புஜ்ஜோ ஹோதி… புஜ்ஜோ ஹோதி… ந பாஸம்ஸோ ஹோதி… பாஸம்ஸோ ஹோதி… அகா³ரவோ ஹோதி… கா³ரவோ ஹோதி… அப்பதிஸ்ஸோ ஹோதி… ஸப்பதிஸ்ஸோ ஹோதி… ந ஆராத⁴கோ ஹோதி… ஆராத⁴கோ ஹோதி… ந விஸுஜ்ஜ²தி… விஸுஜ்ஜ²தி… மானம் நாதி⁴போ⁴தி [நாபி⁴போ⁴தி (ஸீ.) அ. நி. 10.156-166] … மானம் அதி⁴போ⁴தி… பஞ்ஞாய ந வட்³ட⁴தி… பஞ்ஞாய வட்³ட⁴தி…பே….

210. ‘‘த³ஸஹி, பி⁴க்க²வே, த⁴ம்மேஹி ஸமன்னாக³தோ புக்³க³லோ ப³ஹும் அபுஞ்ஞம் பஸவதி… ப³ஹும் புஞ்ஞம் பஸவதி. கதமேஹி த³ஸஹி? பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி, அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி²கோ ஹோதி – இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ புக்³க³லோ ப³ஹும் புஞ்ஞம் பஸவதீ’’தி.

அபரபுக்³க³லவக்³கோ³ பஞ்சமோ.