5. பட²மஅத⁴ம்மஸுத்தம்

171. [அ. நி. 10.113] ‘‘அத⁴ம்மோ ச, பி⁴க்க²வே, வேதி³தப்³போ³ அனத்தோ² ச; த⁴ம்மோ ச வேதி³தப்³போ³ அத்தோ² ச. அத⁴ம்மஞ்ச விதி³த்வா அனத்த²ஞ்ச, த⁴ம்மஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³ம்.

‘‘கதமோ ச, பி⁴க்க²வே, அத⁴ம்மோ ச அனத்தோ² ச? பாணாதிபாதோ, அதி³ன்னாதா³னம், காமேஸுமிச்சா²சாரோ, முஸாவாதோ³, பிஸுணா வாசா, ப²ருஸா வாசா, ஸம்ப²ப்பலாபோ, அபி⁴ஜ்ஜா², ப்³யாபாதோ³, மிச்சா²தி³ட்டி² – அயம் வுச்சதி, பி⁴க்க²வே, அத⁴ம்மோ ச அனத்தோ² ச.

‘‘கதமோ ச, பி⁴க்க²வே, த⁴ம்மோ ச அத்தோ² ச? பாணாதிபாதா வேரமணீ, அதி³ன்னாதா³னா வேரமணீ, காமேஸுமிச்சா²சாரா வேரமணீ, முஸாவாதா³ வேரமணீ, பிஸுணாய வாசாய வேரமணீ, ப²ருஸாய வாசாய வேரமணீ, ஸம்ப²ப்பலாபா வேரமணீ, அனபி⁴ஜ்ஜா², அப்³யாபாதோ³, ஸம்மாதி³ட்டி² – அயம் வுச்சதி, பி⁴க்க²வே, த⁴ம்மோ ச அத்தோ² ச.

‘‘‘அத⁴ம்மோ ச, பி⁴க்க²வே, வேதி³தப்³போ³ அனத்தோ² ச; த⁴ம்மோ ச வேதி³தப்³போ³ அத்தோ² ச. அத⁴ம்மஞ்ச விதி³த்வா அனத்த²ஞ்ச, த⁴ம்மஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³’ந்தி, இதி யம் தம் வுத்தம், இத³மேதம் படிச்ச வுத்த’’ந்தி. பஞ்சமம்.