10. சுந்த³ஸுத்தம்

176. ஏவம் மே ஸுதம் – ஏகம் ஸமயம் ப⁴க³வா பாவாயம் [சம்பாயம் (க. ஸீ.) தீ³. நி. 2.189 பஸ்ஸிதப்³ப³ம்] விஹரதி சுந்த³ஸ்ஸ கம்மாரபுத்தஸ்ஸ அம்ப³வனே. அத² கோ² சுந்தோ³ கம்மாரபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² சுந்த³ம் கம்மாரபுத்தம் ப⁴க³வா ஏதத³வோச – ‘‘கஸ்ஸ நோ த்வம், சுந்த³, ஸோசேய்யானி ரோசேஸீ’’தி? ‘‘ப்³ராஹ்மணா, ப⁴ந்தே, பச்சா²பூ⁴மகா கமண்ட³லுகா ஸேவாலமாலிகா [ஸேவாலமாலகா (ஸீ. ஸ்யா. பீ.)] அக்³கி³பரிசாரிகா உத³கோரோஹகா ஸோசேய்யானி பஞ்ஞபேந்தி; தேஸாஹம் ஸோசேய்யானி ரோசேமீ’’தி.

‘‘யதா² கத²ம் பன, சுந்த³, ப்³ராஹ்மணா பச்சா²பூ⁴மகா கமண்ட³லுகா ஸேவாலமாலிகா அக்³கி³பரிசாரிகா உத³கோரோஹகா ஸோசேய்யானி பஞ்ஞபேந்தீ’’தி? ‘‘இத⁴, ப⁴ந்தே, ப்³ராஹ்மணா பச்சா²பூ⁴மகா கமண்ட³லுகா ஸேவாலமாலிகா அக்³கி³பரிசாரிகா உத³கோரோஹகா. தே ஸாவகம் [ஸாவகே (ஸ்யா. க.)] ஏவம் ஸமாத³பேந்தி – ‘ஏஹி த்வம், அம்போ⁴ புரிஸ, காலஸ்ஸேவ [ஸகாலஸ்ஸேவ (ஸ்யா.)] உட்ட²ஹந்தோவ [உட்ட²ஹந்தோ (ஸ்யா.), வுட்ட²ஹந்தோவ (பீ. க.)] ஸயனம்ஹா பத²விம் ஆமஸேய்யாஸி; நோ சே பத²விம் ஆமஸேய்யாஸி, அல்லானி கோ³மயானி ஆமஸேய்யாஸி; நோ சே அல்லானி கோ³மயானி ஆமஸேய்யாஸி, ஹரிதானி திணானி ஆமஸேய்யாஸி; நோ சே ஹரிதானி திணானி ஆமஸேய்யாஸி, அக்³கி³ம் பரிசரேய்யாஸி; நோ சே அக்³கி³ம் பரிசரேய்யாஸி, பஞ்ஜலிகோ ஆதி³ச்சம் நமஸ்ஸேய்யாஸி; நோ சே பஞ்ஜலிகோ ஆதி³ச்சம் நமஸ்ஸேய்யாஸி, ஸாயததியகம் உத³கம் ஓரோஹேய்யாஸீ’தி. ஏவம் கோ², ப⁴ந்தே, ப்³ராஹ்மணா பச்சா²பூ⁴மகா கமண்ட³லுகா ஸேவாலமாலிகா அக்³கி³பரிசாரிகா உத³கோரோஹகா ஸோசேய்யானி பஞ்ஞபேந்தி; தேஸாஹம் ஸோசேய்யானி ரோசேமீ’’தி.

‘‘அஞ்ஞதா² கோ², சுந்த³, ப்³ராஹ்மணா பச்சா²பூ⁴மகா கமண்ட³லுகா ஸேவாலமாலிகா அக்³கி³பரிசாரிகா உத³கோரோஹகா ஸோசேய்யானி பஞ்ஞபேந்தி, அஞ்ஞதா² ச பன அரியஸ்ஸ வினயே ஸோசேய்யம் ஹோதீ’’தி. ‘‘யதா² கத²ம் பன, ப⁴ந்தே, அரியஸ்ஸ வினயே ஸோசேய்யம் ஹோதி? ஸாது⁴ மே, ப⁴ந்தே, ப⁴க³வா ததா² த⁴ம்மம் தே³ஸேது யதா² அரியஸ்ஸ வினயே ஸோசேய்யம் ஹோதீ’’தி.

‘‘தேன ஹி, சுந்த³, ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² சுந்தோ³ கம்மாரபுத்தோ ப⁴க³வதோ பச்சஸ்ஸோஸி. ப⁴க³வா ஏதத³வோச –

‘‘திவித⁴ம் கோ², சுந்த³, காயேன அஸோசேய்யம் ஹோதி; சதுப்³பி³த⁴ம் வாசாய அஸோசேய்யம் ஹோதி; திவித⁴ம் மனஸா அஸோசேய்யம் ஹோதி.

‘‘கத²ஞ்ச, சுந்த³, திவித⁴ம் காயேன அஸோசேய்யம் ஹோதி? ‘‘இத⁴, சுந்த³, ஏகச்சோ பாணாதிபாதீ ஹோதி லுத்³தோ³ லோஹிதபாணி ஹதபஹதே நிவிட்டோ² அத³யாபன்னோ ஸப்³ப³பாணபூ⁴தேஸு [பாணபூ⁴தேஸு (க.)].

‘‘அதி³ன்னாதா³யீ ஹோதி. யம் தம் பரஸ்ஸ பரவித்தூபகரணம் கா³மக³தம் வா அரஞ்ஞக³தம் வா தம் அதி³ன்னம் தே²ய்யஸங்கா²தம் ஆதா³தா ஹோதி.

‘‘காமேஸுமிச்சா²சாரீ ஹோதி. யா தா மாதுரக்கி²தா பிதுரக்கி²தா மாதாபிதுரக்கி²தா [நத்தி² ஸீ. ஸ்யா. பீ. போத்த²கேஸு] பா⁴துரக்கி²தா ப⁴கி³னிரக்கி²தா ஞாதிரக்கி²தா கோ³த்தரக்கி²தா [நத்தி² ஸீ. ஸ்யா. பீ. போத்த²கேஸு] த⁴ம்மரக்கி²தா ஸஸாமிகா ஸபரித³ண்டா³ அந்தமஸோ மாலாகு³ளபரிக்கி²த்தாபி, ததா²ரூபாஸு சாரித்தம் ஆபஜ்ஜிதா ஹோதி. ஏவம் கோ², சுந்த³, திவித⁴ம் காயேன அஸோசேய்யம் ஹோதி.

‘‘கத²ஞ்ச, சுந்த³, சதுப்³பி³த⁴ம் வாசாய அஸோசேய்யம் ஹோதி? இத⁴, சுந்த³, ஏகச்சோ முஸாவாதீ³ ஹோதி. ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யம் ஜானாஸி தம் வதே³ஹீ’தி [ஸோ அஜானம் வா அஹம் ஜானாமீதி, ஜானம் வா அஹம் ந ஜானாமீதி, அபஸ்ஸம் வா அஹம் பஸ்ஸாமீதி, பஸ்ஸம் வா அஹம் ந பஸ்ஸாமீதி (பீ. க.) ஏவமுபரிபி], ஸோ அஜானம் வா ஆஹ ‘ஜானாமீ’தி, ஜானம் வா ஆஹ ‘ந ஜானாமீ’தி; அபஸ்ஸம் வா ஆஹ ‘பஸ்ஸாமீ’தி, பஸ்ஸம் வா ஆஹ ‘ந பஸ்ஸாமீ’தி [ஸோ அஜானம் வா அஹம் ஜானாமீதி, ஜானம் வா அஹம் ந ஜானாமீதி, அபஸ்ஸம் வா அஹம் பஸ்ஸாமீதி, பஸ்ஸம் வா அஹம் ந பஸ்ஸாமீதி (பீ. க.) ஏவமுபரிபி]. இதி அத்தஹேது வா பரஹேது வா ஆமிஸகிஞ்சிக்க²ஹேது வா ஸம்பஜானமுஸா பா⁴ஸிதா ஹோதி.

‘‘பிஸுணவாசோ ஹோதி. இதோ ஸுத்வா அமுத்ர அக்கா²தா இமேஸம் பே⁴தா³ய, அமுத்ர வா ஸுத்வா இமேஸம் அக்கா²தா அமூஸம் பே⁴தா³ய. இதி ஸமக்³கா³னம் வா பே⁴த்தா [பே⁴தா³தா (க.)], பி⁴ன்னானம் வா அனுப்பதா³தா, வக்³கா³ராமோ வக்³க³ரதோ வக்³க³னந்தீ³ வக்³க³கரணிம் வாசம் பா⁴ஸிதா ஹோதி.

‘‘ப²ருஸவாசோ ஹோதி. யா ஸா வாசா அண்ட³கா கக்கஸா பரகடுகா பராபி⁴ஸஜ்ஜனீ கோத⁴ஸாமந்தா அஸமாதி⁴ஸம்வத்தனிகா, ததா²ரூபிம் வாசம் பா⁴ஸிதா ஹோதி.

‘‘ஸம்ப²ப்பலாபீ ஹோதி அகாலவாதீ³ அபூ⁴தவாதீ³ அனத்த²வாதீ³ அத⁴ம்மவாதீ³ அவினயவாதீ³; அனிதா⁴னவதிம் வாசம் பா⁴ஸிதா ஹோதி அகாலேன அனபதே³ஸம் அபரியந்தவதிம் அனத்த²ஸம்ஹிதம். ஏவம் கோ², சுந்த³, சதுப்³பி³த⁴ம் வாசாய அஸோசேய்யம் ஹோதி.

‘‘கத²ஞ்ச, சுந்த³, திவித⁴ம் மனஸா அஸோசேய்யம் ஹோதி? இத⁴, சுந்த³, ஏகச்சோ அபி⁴ஜ்ஜா²லு ஹோதி. யம் தம் பரஸ்ஸ பரவித்தூபகரணம் தம் அபி⁴ஜ்ஜா²தா [அபி⁴ஜ்ஜி²தா (க.) ம. நி. 1.440 பஸ்ஸிதப்³ப³ம்] ஹோதி – ‘அஹோ வத யம் பரஸ்ஸ தம் மமஸ்ஸா’தி.

‘‘ப்³யாபன்னசித்தோ ஹோதி பது³ட்ட²மனஸங்கப்போ – ‘இமே ஸத்தா ஹஞ்ஞந்து வா ப³ஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா வா அஹேஸு’ந்தி [மா வா அஹேஸும் இதி வா தி (ஸீ. பீ. க.)].

‘‘மிச்சா²தி³ட்டி²கோ ஹோதி விபரீதத³ஸ்ஸனோ – ‘நத்தி² தி³ன்னம், நத்தி² யிட்ட²ம், நத்தி² ஹுதம், நத்தி² ஸுகடது³க்கடானம் [நத்தே²த்த² பாட²பே⁴தோ³] கம்மானம் ப²லம் விபாகோ, நத்தி² அயம் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ஏவம் கோ², சுந்த³, மனஸா திவித⁴ம் அஸோசேய்யம் ஹோதி.

‘‘இமே கோ², சுந்த³, த³ஸ அகுஸலகம்மபதா² [அகுஸலா கம்மபதா² (?)]. இமேஹி கோ², சுந்த³, த³ஸஹி அகுஸலேஹி கம்மபதே²ஹி ஸமன்னாக³தோ காலஸ்ஸேவ உட்ட²ஹந்தோவ ஸயனம்ஹா பத²விம் சேபி ஆமஸதி, அஸுசியேவ ஹோதி; நோ சேபி பத²விம் ஆமஸதி, அஸுசியேவ ஹோதி.

‘‘அல்லானி சேபி கோ³மயானி ஆமஸதி, அஸுசியேவ ஹோதி; நோ சேபி அல்லானி கோ³மயானி ஆமஸதி, அஸுசியேவ ஹோதி.

‘‘ஹரிதானி சேபி திணானி ஆமஸதி, அஸுசியேவ ஹோதி; நோ சேபி ஹரிதானி திணானி ஆமஸதி, அஸுசியேவ ஹோதி.

‘‘அக்³கி³ம் சேபி பரிசரதி, அஸுசியேவ ஹோதி, நோ சேபி அக்³கி³ம் பரிசரதி, அஸுசியேவ ஹோதி.

‘‘பஞ்ஜலிகோ சேபி ஆதி³ச்சம் நமஸ்ஸதி, அஸுசியேவ ஹோதி; நோ சேபி பஞ்ஜலிகோ ஆதி³ச்சம் நமஸ்ஸதி, அஸுசியேவ ஹோதி.

‘‘ஸாயததியகம் சேபி உத³கம் ஓரோஹதி, அஸுசியேவ ஹோதி; நோ சேபி ஸாயததியகம் உத³கம் ஓரோஹதி, அஸுசியேவ ஹோதி. தம் கிஸ்ஸ ஹேது? இமே, சுந்த³, த³ஸ அகுஸலகம்மபதா² அஸுசீயேவ [அஸுசிச்சேவ (ஸ்யா.)] ஹோந்தி அஸுசிகரணா ச.

‘‘இமேஸம் பன, சுந்த³, த³ஸன்னம் அகுஸலானம் கம்மபதா²னம் ஸமன்னாக³மனஹேது நிரயோ பஞ்ஞாயதி, திரச்சா²னயோனி பஞ்ஞாயதி, பேத்திவிஸயோ பஞ்ஞாயதி, யா வா [யா ச (க.)] பனஞ்ஞாபி காசி து³க்³க³தியோ [து³க்³க³தி ஹோதி (ஸ்யா. க.)].

‘‘திவித⁴ம் கோ², சுந்த³, காயேன ஸோசேய்யம் ஹோதி; சதுப்³பி³த⁴ம் வாசாய ஸோசேய்யம் ஹோதி; திவித⁴ம் மனஸா ஸோசேய்யம் ஹோதி.

‘‘கத²ம், சுந்த³, திவித⁴ம் காயேன ஸோசேய்யம் ஹோதி? இத⁴, சுந்த³, ஏகச்சோ பாணாதிபாதம் பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ², லஜ்ஜீ த³யாபன்னோ, ஸப்³ப³பாணபூ⁴தஹிதானுகம்பீ விஹரதி.

‘‘அதி³ன்னாதா³னம் பஹாய, அதி³ன்னாதா³னா படிவிரதோ ஹோதி. யம் தம் பரஸ்ஸ பரவித்தூபகரணம் கா³மக³தம் வா அரஞ்ஞக³தம் வா, ந தம் அதி³ன்னம் [தம் நாதி³ன்னம் (க. ஸீ., ம. நி. 1.441)] தே²ய்யஸங்கா²தம் ஆதா³தா ஹோதி.

‘‘காமேஸுமிச்சா²சாரம் பஹாய, காமேஸுமிச்சா²சாரா படிவிரதோ ஹோதி யா தா மாதுரக்கி²தா பிதுரக்கி²தா மாதாபிதுரக்கி²தா பா⁴துரக்கி²தா ப⁴கி³னிரக்கி²தா ஞாதிரக்கி²தா கோ³த்தரக்கி²தா த⁴ம்மரக்கி²தா ஸஸாமிகா ஸபரித³ண்டா³ அந்தமஸோ மாலாகு³ளபரிக்கி²த்தாபி, ததா²ரூபாஸு ந சாரித்தம் ஆபஜ்ஜிதா ஹோதி. ஏவம் கோ², சுந்த³, திவித⁴ம் காயேன ஸோசேய்யம் ஹோதி.

‘‘கத²ஞ்ச, சுந்த³, சதுப்³பி³த⁴ம் வாசாய ஸோசேய்யம் ஹோதி? இத⁴, சுந்த³, ஏகச்சோ முஸாவாத³ம் பஹாய முஸாவாதா³ படிவிரதோ ஹோதி. ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யம் ஜானாஸி தம் வதே³ஹீ’தி, ஸோ அஜானம் வா ஆஹ ‘ந ஜானாமீ’தி, ஜானம் வா ஆஹ ‘ஜானாமீ’தி, அபஸ்ஸம் வா ஆஹ ‘ந பஸ்ஸாமீ’தி, பஸ்ஸம் வா ஆஹ ‘பஸ்ஸாமீ’தி. இதி அத்தஹேது வா பரஹேது வா ஆமிஸகிஞ்சிக்க²ஹேது வா ந ஸம்பஜானமுஸா பா⁴ஸிதா ஹோதி.

‘‘பிஸுணம் வாசம் பஹாய, பிஸுணாய வாசாய படிவிரதோ ஹோதி – ந இதோ ஸுத்வா அமுத்ர அக்கா²தா இமேஸம் பே⁴தா³ய, ந அமுத்ர வா ஸுத்வா இமேஸம் அக்கா²தா அமூஸம் பே⁴தா³ய. இதி பி⁴ன்னானம் வா ஸந்தா⁴தா ஸஹிதானம் வா அனுப்பதா³தா ஸமக்³கா³ராமோ ஸமக்³க³ரதோ ஸமக்³க³னந்தீ³ ஸமக்³க³கரணிம் வாசம் பா⁴ஸிதா ஹோதி.

‘‘ப²ருஸம் வாசம் பஹாய, ப²ருஸாய வாசாய படிவிரதோ ஹோதி. யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிம் வாசம் பா⁴ஸிதா ஹோதி.

‘‘ஸம்ப²ப்பலாபம் பஹாய, ஸம்ப²ப்பலாபா படிவிரதோ ஹோதி காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³; நிதா⁴னவதிம் வாசம் பா⁴ஸிதா ஹோதி காலேன ஸாபதே³ஸம் பரியந்தவதிம் அத்த²ஸம்ஹிதம். ஏவம் கோ², சுந்த³, சதுப்³பி³த⁴ம் வாசாய ஸோசேய்யம் ஹோதி.

‘‘கத²ஞ்ச, சுந்த³, திவித⁴ம் மனஸா ஸோசேய்யம் ஹோதி? இத⁴, சுந்த³, ஏகச்சோ அனபி⁴ஜ்ஜா²லு ஹோதி. யம் தம் பரஸ்ஸ பரவித்தூபகரணம் தம் அனபி⁴ஜ்ஜி²தா ஹோதி – ‘அஹோ வத யம் பரஸ்ஸ தம் மமஸ்ஸா’தி.

‘‘அப்³யாபன்னசித்தோ ஹோதி அப்பது³ட்ட²மனஸங்கப்போ – ‘இமே ஸத்தா அவேரா ஹோந்து [இத³ம் பத³ம் ஸீ. ஸ்யா. பீ. போத்த²கேஸு நத்தி², ததா² ம. நி. 1.441] அப்³யாபஜ்ஜா, அனீகா⁴ ஸுகீ² அத்தானம் பரிஹரந்தூ’தி.

‘‘ஸம்மாதி³ட்டி²கோ ஹோதி அவிபரீதத³ஸ்ஸனோ – ‘அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகடது³க்கடானம் கம்மானம் ப²லம் விபாகோ, அத்தி² அயம் லோகோ, அத்தி² பரோ லோகோ, அத்தி² மாதா, அத்தி² பிதா, அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ஏவம் கோ², சுந்த³, திவித⁴ம் மனஸா ஸோசேய்யம் ஹோதி.

‘‘இமே கோ², சுந்த³, த³ஸ குஸலகம்மபதா². இமேஹி கோ², சுந்த³, த³ஸஹி குஸலேஹி கம்மபதே²ஹி ஸமன்னாக³தோ காலஸ்ஸேவ உட்ட²ஹந்தோவ ஸயனம்ஹா பத²விம் சேபி ஆமஸதி, ஸுசியேவ ஹோதி; நோ சேபி பத²விம் ஆமஸதி, ஸுசியேவ ஹோதி.

‘‘அல்லானி சேபி கோ³மயானி ஆமஸதி, ஸுசியேவ ஹோதி; நோ சேபி அல்லானி கோ³மயானி ஆமஸதி, ஸுசியேவ ஹோதி.

‘‘ஹரிதானி சேபி திணானி ஆமஸதி, ஸுசியேவ ஹோதி; நோ சேபி ஹரிதானி திணானி ஆமஸதி, ஸுசியேவ ஹோதி.

‘‘அக்³கி³ம் சேபி பரிசரதி, ஸுசியேவ ஹோதி; நோ சேபி அக்³கி³ம் பரிசரதி, ஸுசியேவ ஹோதி.

‘‘பஞ்ஜலிகோ சேபி ஆதி³ச்சம் நமஸ்ஸதி, ஸுசியேவ ஹோதி; நோ சேபி பஞ்ஜலிகோ ஆதி³ச்சம் நமஸ்ஸதி, ஸுசியேவ ஹோதி.

‘‘ஸாயததியகம் சேபி உத³கம் ஓரோஹதி, ஸுசியேவ ஹோதி; நோ சேபி ஸாயததியகம் உத³கம் ஓரோஹதி, ஸுசியேவ ஹோதி. தம் கிஸ்ஸ ஹேது? இமே, சுந்த³, த³ஸ குஸலகம்மபதா² ஸுசீயேவ ஹோந்தி ஸுசிகரணா ச.

‘‘இமேஸம் பன, சுந்த³, த³ஸன்னம் குஸலானம் கம்மபதா²னம் ஸமன்னாக³மனஹேது தே³வா பஞ்ஞாயந்தி, மனுஸ்ஸா பஞ்ஞாயந்தி, யா வா பனஞ்ஞாபி காசி ஸுக³தியோ’’தி [ஸுக³தி ஹோதீதி (ஸ்யா.), ஸுக³தி ஹோதி (க.)].

ஏவம் வுத்தே சுந்தோ³ கம்மாரபுத்தோ ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே…பே… உபாஸகம் மம், ப⁴ந்தே, ப⁴க³வா தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. த³ஸமம்.