9. பட²மகோஸலஸுத்தம்

29. ‘‘யாவதா, பி⁴க்க²வே, காஸிகோஸலா, யாவதா ரஞ்ஞோ பஸேனதி³ஸ்ஸ கோஸலஸ்ஸ விஜிதம் [விஜிதே (ஸீ. க.)], ராஜா தத்த² பஸேனதி³ கோஸலோ அக்³க³மக்கா²யதி. ரஞ்ஞோபி கோ², பி⁴க்க²வே, பஸேனதி³ஸ்ஸ கோஸலஸ்ஸ அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

‘‘யாவதா, பி⁴க்க²வே, சந்தி³மஸூரியா பரிஹரந்தி தி³ஸா ப⁴ந்தி விரோசமானா, தாவ ஸஹஸ்ஸதா⁴ லோகோ. தஸ்மிம் ஸஹஸ்ஸதா⁴ லோகே ஸஹஸ்ஸம் சந்தா³னம் ஸஹஸ்ஸம் ஸூரியானம் [ஸுரியானம் (ஸீ. ஸ்யா. கம். பீ.)] ஸஹஸ்ஸம் ஸினேருபப்³ப³தராஜானம் ஸஹஸ்ஸம் ஜம்பு³தீ³பானம் ஸஹஸ்ஸம் அபரகோ³யானானம் ஸஹஸ்ஸம் உத்தரகுரூனம் ஸஹஸ்ஸம் புப்³ப³விதே³ஹானம் சத்தாரி மஹாஸமுத்³த³ஸஹஸ்ஸானி சத்தாரி மஹாராஜஸஹஸ்ஸானி ஸஹஸ்ஸம் சாதுமஹாராஜிகானம் ஸஹஸ்ஸம் தாவதிம்ஸானம் ஸஹஸ்ஸம் யாமானம் ஸஹஸ்ஸம் துஸிதானம் ஸஹஸ்ஸம் நிம்மானரதீனம் ஸஹஸ்ஸம் பரனிம்மிதவஸவத்தீனம் ஸஹஸ்ஸம் ப்³ரஹ்மலோகானம். யாவதா, பி⁴க்க²வே, ஸஹஸ்ஸீ லோகதா⁴து, மஹாப்³ரஹ்மா தத்த² அக்³க³மக்கா²யதி. மஹாப்³ரஹ்முனோபி கோ², பி⁴க்க²வே, அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

‘‘ஹோதி ஸோ, பி⁴க்க²வே, ஸமயோ யம் அயம் லோகோ ஸம்வட்டதி. ஸம்வட்டமானே, பி⁴க்க²வே, லோகே யேபு⁴ய்யேன ஸத்தா ஆப⁴ஸ்ஸரஸம்வத்தனிகா [ஆப⁴ஸ்ஸரவத்தனிகா (ஸீ. ஸ்யா.)] ப⁴வந்தி. தே தத்த² ஹோந்தி மனோமயா பீதிப⁴க்கா² ஸயம்பபா⁴ அந்தலிக்கே²சரா ஸுப⁴ட்டா²யினோ சிரம் தீ³க⁴மத்³தா⁴னம் திட்ட²ந்தி. ஸம்வட்டமானே, பி⁴க்க²வே, லோகே ஆப⁴ஸ்ஸரா தே³வா அக்³க³மக்கா²யந்தி. ஆப⁴ஸ்ஸரானம்பி கோ², பி⁴க்க²வே, தே³வானம் அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

[அ. நி. 10.25] ‘‘த³ஸயிமானி, பி⁴க்க²வே, கஸிணாயதனானி. கதமானி த³ஸ? பத²வீகஸிணமேகோ ஸஞ்ஜானாதி உத்³த⁴ம் அதோ⁴ திரியம் அத்³வயம் அப்பமாணம்; ஆபோகஸிணமேகோ ஸஞ்ஜானாதி…பே… தேஜோகஸிணமேகோ ஸஞ்ஜானாதி… வாயோகஸிணமேகோ ஸஞ்ஜானாதி… நீலகஸிணமேகோ ஸஞ்ஜானாதி… பீதகஸிணமேகோ ஸஞ்ஜானாதி… லோஹிதகஸிணமேகோ ஸஞ்ஜானாதி… ஓதா³தகஸிணமேகோ ஸஞ்ஜானாதி… ஆகாஸகஸிணமேகோ ஸஞ்ஜானாதி… விஞ்ஞாணகஸிணமேகோ ஸஞ்ஜானாதி உத்³த⁴ம் அதோ⁴ திரியம் அத்³வயம் அப்பமாணம். இமானி கோ², பி⁴க்க²வே, த³ஸ கஸிணாயதனானி.

‘‘ஏதத³க்³க³ம், பி⁴க்க²வே, இமேஸம் த³ஸன்னம் கஸிணாயதனானம் யதி³த³ம் விஞ்ஞாணகஸிணம் ஏகோ ஸஞ்ஜானாதி உத்³த⁴ம் அதோ⁴ திரியம் அத்³வயம் அப்பமாணம். ஏவம்ஸஞ்ஞினோபி கோ², பி⁴க்க²வே, ஸந்தி ஸத்தா. ஏவம்ஸஞ்ஞீனம்பி கோ², பி⁴க்க²வே, ஸத்தானம் அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

[தீ³. நி. 3.338, 358; அ. நி. 8.64] ‘‘அட்டி²மானி, பி⁴க்க²வே, அபி⁴பா⁴யதனானி. கதமானி அட்ட²? அஜ்ஜ²த்தம் ரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி பரித்தானி ஸுவண்ணது³ப்³ப³ண்ணானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் பட²மம் அபி⁴பா⁴யதனம்.

‘‘அஜ்ஜ²த்தம் ரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி அப்பமாணானி ஸுவண்ணது³ப்³ப³ண்ணானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் து³தியம் அபி⁴பா⁴யதனம்.

‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி பரித்தானி ஸுவண்ணது³ப்³ப³ண்ணானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் ததியம் அபி⁴பா⁴யதனம்.

‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி அப்பமாணானி ஸுவண்ணது³ப்³ப³ண்ணானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் சதுத்த²ம் அபி⁴பா⁴யதனம்.

‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி நீலானி நீலவண்ணானி நீலனித³ஸ்ஸனானி நீலனிபா⁴ஸானி. ஸேய்யதா²பி நாம உமாபுப்ப²ம் நீலம் நீலவண்ணம் நீலனித³ஸ்ஸனம் நீலனிபா⁴ஸம், ஸேய்யதா² வா பன தம் வத்த²ம் பா³ராணஸேய்யகம் உப⁴தோபா⁴க³விமட்ட²ம் நீலம் நீலவண்ணம் நீலனித³ஸ்ஸனம் நீலனிபா⁴ஸம்; ஏவமேவம் அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி நீலானி நீலவண்ணானி நீலனித³ஸ்ஸனானி நீலனிபா⁴ஸானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் பஞ்சமம் அபி⁴பா⁴யதனம்.

‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி பீதானி பீதவண்ணானி பீதனித³ஸ்ஸனானி பீதனிபா⁴ஸானி. ஸேய்யதா²பி நாம கணிகாரபுப்ப²ம் பீதம் பீதவண்ணம் பீதனித³ஸ்ஸனம் பீதனிபா⁴ஸம், ஸேய்யதா² வா பன தம் வத்த²ம் பா³ராணஸேய்யகம் உப⁴தோபா⁴க³விமட்ட²ம் பீதம் பீதவண்ணம் பீதனித³ஸ்ஸனம் பீதனிபா⁴ஸம்; ஏவமேவம் அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி பீதானி பீதவண்ணானி பீதனித³ஸ்ஸனானி பீதனிபா⁴ஸானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் ச²ட்ட²ம் அபி⁴பா⁴யதனம்.

‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி லோஹிதகானி லோஹிதகவண்ணானி லோஹிதகனித³ஸ்ஸனானி லோஹிதகனிபா⁴ஸானி. ஸேய்யதா²பி நாம ப³ந்து⁴ஜீவகபுப்ப²ம் லோஹிதகம் லோஹிதகவண்ணம் லோஹிதகனித³ஸ்ஸனம் லோஹிதகனிபா⁴ஸம், ஸேய்யதா² வா பன தம் வத்த²ம் பா³ராணஸேய்யகம் உப⁴தோபா⁴க³விமட்ட²ம் லோஹிதகம் லோஹிதகவண்ணம் லோஹிதகனித³ஸ்ஸனம் லோஹிதகனிபா⁴ஸம்; ஏவமேவம் அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி லோஹிதகானி லோஹிதகவண்ணானி லோஹிதகனித³ஸ்ஸனானி லோஹிதகனிபா⁴ஸானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் ஸத்தமம் அபி⁴பா⁴யதனம்.

‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி ஓதா³தானி ஓதா³தவண்ணானி ஓதா³தனித³ஸ்ஸனானி ஓதா³தனிபா⁴ஸானி. ஸேய்யதா²பி நாம ஓஸதி⁴தாரகா ஓதா³தா ஓதா³தவண்ணா ஓதா³தனித³ஸ்ஸனா ஓதா³தனிபா⁴ஸா, ஸேய்யதா² வா பன தம் வத்த²ம் பா³ராணஸேய்யகம் உப⁴தோபா⁴க³விமட்ட²ம் ஓதா³தம் ஓதா³தவண்ணம் ஓதா³தனித³ஸ்ஸனம் ஓதா³தனிபா⁴ஸம்; ஏவமேவம் அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி ஓதா³தானி ஓதா³தவண்ணானி ஓதா³தனித³ஸ்ஸனானி ஓதா³தனிபா⁴ஸானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. இத³ம் அட்ட²மம் அபி⁴பா⁴யதனம். இமானி கோ², பி⁴க்க²வே, அட்ட² அபி⁴பா⁴யதனானி.

‘‘ஏதத³க்³க³ம், பி⁴க்க²வே, இமேஸம் அட்ட²ன்னம் அபி⁴பா⁴யதனானம் யதி³த³ம் அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதி ஓதா³தானி ஓதா³தவண்ணானி ஓதா³தனித³ஸ்ஸனானி ஓதா³தனிபா⁴ஸானி; ‘தானி அபி⁴பு⁴ய்ய ஜானாமி பஸ்ஸாமீ’தி, ஏவம்ஸஞ்ஞீ ஹோதி. ஏவம்ஸஞ்ஞினோபி கோ², பி⁴க்க²வே, ஸந்தி ஸத்தா. ஏவம்ஸஞ்ஞீனம்பி கோ², பி⁴க்க²வே, ஸத்தானம் அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா – இமா கோ², பி⁴க்க²வே, சதஸ்ஸோ படிபதா³.

‘‘ஏதத³க்³க³ம், பி⁴க்க²வே, இமாஸம் சதுன்னம் படிபதா³னம் யதி³த³ம் ஸுகா² படிபதா³ கி²ப்பாபி⁴ஞ்ஞா. ஏவம்படிபன்னாபி கோ², பி⁴க்க²வே, ஸந்தி ஸத்தா. ஏவம்படிபன்னானம்பி கோ², பி⁴க்க²வே, ஸத்தானம் அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

‘‘சதஸ்ஸோ இமா, பி⁴க்க²வே, ஸஞ்ஞா. கதமா சதஸ்ஸோ? பரித்தமேகோ ஸஞ்ஜானாதி, மஹக்³க³தமேகோ ஸஞ்ஜானாதி, அப்பமாணமேகோ ஸஞ்ஜானாதி, ‘நத்தி² கிஞ்சீ’தி ஆகிஞ்சஞ்ஞாயதனமேகோ ஸஞ்ஜானாதி – இமா கோ², பி⁴க்க²வே, சதஸ்ஸோ ஸஞ்ஞா.

‘‘ஏதத³க்³க³ம், பி⁴க்க²வே, இமாஸம் சதுன்னம் ஸஞ்ஞானம் யதி³த³ம் ‘நத்தி² கிஞ்சீ’தி ஆகிஞ்சஞ்ஞாயதனமேகோ ஸஞ்ஜானாதி. ஏவம்ஸஞ்ஞினோபி கோ², பி⁴க்க²வே, ஸந்தி ஸத்தா. ஏவம்ஸஞ்ஞீனம்பி கோ², பி⁴க்க²வே, ஸத்தானம் அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

‘‘ஏதத³க்³க³ம், பி⁴க்க²வே, பா³ஹிரகானம் தி³ட்டி²க³தானம் யதி³த³ம் ‘நோ சஸ்ஸம், நோ ச மே ஸியா, ந ப⁴விஸ்ஸாமி, ந மே ப⁴விஸ்ஸதீ’தி. ஏவம்தி³ட்டி²னோ, பி⁴க்க²வே, ஏதம் பாடிகங்க²ம் – ‘யா சாயம் ப⁴வே அப்படிகுல்யதா, ஸா சஸ்ஸ ந ப⁴விஸ்ஸதி; யா சாயம் ப⁴வனிரோதே⁴ பாடிகுல்யதா, ஸா சஸ்ஸ ந ப⁴விஸ்ஸதீ’தி. ஏவம்தி³ட்டி²னோபி கோ², பி⁴க்க²வே, ஸந்தி ஸத்தா. ஏவம்தி³ட்டீ²னம்பி கோ², பி⁴க்க²வே, ஸத்தானம் அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

‘‘ஸந்தி, பி⁴க்க²வே, ஏகே ஸமணப்³ராஹ்மணா பரமத்த²விஸுத்³தி⁴ம் பஞ்ஞாபேந்தி. ஏதத³க்³க³ம், பி⁴க்க²வே, பரமத்த²விஸுத்³தி⁴ம் பஞ்ஞாபேந்தானம் யதி³த³ம் ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. தே தத³பி⁴ஞ்ஞாய தஸ்ஸ ஸச்சி²கிரியாய த⁴ம்மம் தே³ஸேந்தி. ஏவம்வாதி³னோபி கோ², பி⁴க்க²வே, ஸந்தி ஸத்தா. ஏவம்வாதீ³னம்பி கோ², பி⁴க்க²வே, ஸத்தானம் அத்தே²வ அஞ்ஞத²த்தம் அத்தி² விபரிணாமோ. ஏவம் பஸ்ஸம், பி⁴க்க²வே, ஸுதவா அரியஸாவகோ தஸ்மிம்பி நிப்³பி³ந்த³தி. தஸ்மிம் நிப்³பி³ந்த³ந்தோ அக்³கே³ விரஜ்ஜதி, பகே³வ ஹீனஸ்மிம்.

‘‘ஸந்தி, பி⁴க்க²வே, ஏகே ஸமணப்³ராஹ்மணா பரமதி³ட்ட²த⁴ம்மனிப்³பா³னம் பஞ்ஞாபேந்தி. ஏதத³க்³க³ம், பி⁴க்க²வே, பரமதி³ட்ட²த⁴ம்மனிப்³பா³னம் பஞ்ஞாபேந்தானம் யதி³த³ம் ச²ன்னம் ப²ஸ்ஸாயதனானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் விதி³த்வா அனுபாதா³ விமோக்கோ². ஏவம்வாதி³ம் கோ² மம், பி⁴க்க²வே, ஏவமக்கா²யிம் ஏகே ஸமணப்³ராஹ்மணா அஸதா துச்சா² முஸா அபூ⁴தேன அப்³பா⁴சிக்க²ந்தி – ‘ஸமணோ கோ³தமோ ந காமானம் பரிஞ்ஞம் பஞ்ஞாபேதி, ந ரூபானம் பரிஞ்ஞம் பஞ்ஞாபேதி, ந வேத³னானம் பரிஞ்ஞம் பஞ்ஞாபேதீ’தி. காமானஞ்சாஹம், பி⁴க்க²வே, பரிஞ்ஞம் பஞ்ஞாபேமி, ரூபானஞ்ச பரிஞ்ஞம் பஞ்ஞாபேமி, வேத³னானஞ்ச பரிஞ்ஞம் பஞ்ஞாபேமி, தி³ட்டே²வ த⁴ம்மே நிச்சா²தோ நிப்³பு³தோ ஸீதிபூ⁴தோ அனுபாதா³ பரினிப்³பா³னம் பஞ்ஞாபேமீ’’தி. நவமம்.