7. வீரியாரம்பா⁴தி³வக்³கோ³

61. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, வீரியாரம்போ⁴ [விரியாரம்போ⁴ (ஸீ. ஸ்யா. கம். பீ.)]. ஆரத்³த⁴வீரியஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. பட²மம்.

62. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, மஹிச்ச²தா. மஹிச்ச²ஸ்ஸ, பி⁴க்க²வே, அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. து³தியம்.

63. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, அப்பிச்ச²தா. அப்பிச்ச²ஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. ததியம்.

64. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, அஸந்துட்டி²தா. அஸந்துட்ட²ஸ்ஸ, பி⁴க்க²வே, அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. சதுத்த²ம்.

65. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, ஸந்துட்டி²தா. ஸந்துட்ட²ஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. பஞ்சமம்.

66. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, அயோனிஸோமனஸிகாரோ. அயோனிஸோ, பி⁴க்க²வே, மனஸி கரோதோ அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. ச²ட்ட²ம்.

67. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, யோனிஸோமனஸிகாரோ. யோனிஸோ, பி⁴க்க²வே, மனஸி கரோதோ அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. ஸத்தமம்.

68. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, அஸம்பஜஞ்ஞம். அஸம்பஜானஸ்ஸ, பி⁴க்க²வே, அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. அட்ட²மம்.

69. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, ஸம்பஜஞ்ஞம். ஸம்பஜானஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. நவமம்.

70. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, பாபமித்ததா. பாபமித்தஸ்ஸ, பி⁴க்க²வே, அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. த³ஸமம்.

வீரியாரம்பா⁴தி³வக்³கோ³ ஸத்தமோ.