8. கல்யாணமித்தாதி³வக்³கோ³

71. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, கல்யாணமித்ததா. கல்யாணமித்தஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. பட²மம்.

72. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, அனுயோகோ³ அகுஸலானம் த⁴ம்மானம், அனனுயோகோ³ குஸலானம் த⁴ம்மானம். அனுயோகா³, பி⁴க்க²வே, அகுஸலானம் த⁴ம்மானம், அனனுயோகா³ குஸலானம் த⁴ம்மானம் அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. து³தியம்.

73. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, அனுயோகோ³ குஸலானம் த⁴ம்மானம், அனனுயோகோ³ அகுஸலானம் த⁴ம்மானம். அனுயோகா³, பி⁴க்க²வே, குஸலானம் த⁴ம்மானம், அனனுயோகா³ அகுஸலானம் த⁴ம்மானம் அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. ததியம்.

74. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா போ³ஜ்ஜ²ங்கா³ நுப்பஜ்ஜந்தி உப்பன்னா வா போ³ஜ்ஜ²ங்கா³ ந பா⁴வனாபாரிபூரிம் க³ச்ச²ந்தி யத²யித³ம், பி⁴க்க²வே, அயோனிஸோமனஸிகாரோ. அயோனிஸோ, பி⁴க்க²வே, மனஸி கரோதோ அனுப்பன்னா சேவ போ³ஜ்ஜ²ங்கா³ நுப்பஜ்ஜந்தி உப்பன்னா ச போ³ஜ்ஜ²ங்கா³ ந பா⁴வனாபாரிபூரிம் க³ச்ச²ந்தீ’’தி. சதுத்த²ம்.

75. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா போ³ஜ்ஜ²ங்கா³ உப்பஜ்ஜந்தி உப்பன்னா வா போ³ஜ்ஜ²ங்கா³ பா⁴வனாபாரிபூரிம் க³ச்ச²ந்தி யத²யித³ம், பி⁴க்க²வே, யோனிஸோமனஸிகாரோ. யோனிஸோ, பி⁴க்க²வே, மனஸி கரோதோ அனுப்பன்னா சேவ போ³ஜ்ஜ²ங்கா³ உப்பஜ்ஜந்தி உப்பன்னா ச போ³ஜ்ஜ²ங்கா³ பா⁴வனாபாரிபூரிம் க³ச்ச²ந்தீ’’தி. பஞ்சமம்.

76. ‘‘அப்பமத்திகா ஏஸா, பி⁴க்க²வே, பரிஹானி யதி³த³ம் ஞாதிபரிஹானி. ஏதம் பதிகிட்ட²ம், பி⁴க்க²வே, பரிஹானீனம் யதி³த³ம் பஞ்ஞாபரிஹானீ’’தி. ச²ட்ட²ம்.

77. ‘‘அப்பமத்திகா ஏஸா, பி⁴க்க²வே, வுத்³தி⁴ யதி³த³ம் ஞாதிவுத்³தி⁴. ஏதத³க்³க³ம், பி⁴க்க²வே, வுத்³தீ⁴னம் யதி³த³ம் பஞ்ஞாவுத்³தி⁴. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘பஞ்ஞாவுத்³தி⁴யா வத்³தி⁴ஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ஸத்தமம்.

78. ‘‘அப்பமத்திகா ஏஸா, பி⁴க்க²வே, பரிஹானி யதி³த³ம் போ⁴க³பரிஹானி. ஏதம் பதிகிட்ட²ம், பி⁴க்க²வே, பரிஹானீனம் யதி³த³ம் பஞ்ஞாபரிஹானீ’’தி. அட்ட²மம்.

79. ‘‘அப்பமத்திகா ஏஸா, பி⁴க்க²வே, வுத்³தி⁴ யதி³த³ம் போ⁴க³வுத்³தி⁴. ஏதத³க்³க³ம், பி⁴க்க²வே, வுத்³தீ⁴னம் யதி³த³ம் பஞ்ஞாவுத்³தி⁴. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘பஞ்ஞாவுத்³தி⁴யா வத்³தி⁴ஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. நவமம்.

80. ‘‘அப்பமத்திகா ஏஸா, பி⁴க்க²வே, பரிஹானி யதி³த³ம் யஸோபரிஹானி. ஏதம் பதிகிட்ட²ம், பி⁴க்க²வே, பரிஹானீனம் யதி³த³ம் பஞ்ஞாபரிஹானீ’’தி. த³ஸமம்.

கல்யாணமித்தாதி³வக்³கோ³ அட்ட²மோ.