6. அச்ச²ராஸங்கா⁴தவக்³கோ³

51. ‘‘பப⁴ஸ்ஸரமித³ம், பி⁴க்க²வே, சித்தம். தஞ்ச கோ² ஆக³ந்துகேஹி உபக்கிலேஸேஹி உபக்கிலிட்ட²ம். தம் அஸ்ஸுதவா புது²ஜ்ஜனோ யதா²பூ⁴தம் நப்பஜானாதி. தஸ்மா ‘அஸ்ஸுதவதோ புது²ஜ்ஜனஸ்ஸ சித்தபா⁴வனா நத்தீ²’தி வதா³மீ’’தி. பட²மம்.

52. ‘‘பப⁴ஸ்ஸரமித³ம், பி⁴க்க²வே, சித்தம். தஞ்ச கோ² ஆக³ந்துகேஹி உபக்கிலேஸேஹி விப்பமுத்தம். தம் ஸுதவா அரியஸாவகோ யதா²பூ⁴தம் பஜானாதி. தஸ்மா ‘ஸுதவதோ அரியஸாவகஸ்ஸ சித்தபா⁴வனா அத்தீ²’தி வதா³மீ’’தி. து³தியம்.

53. ‘‘அச்ச²ராஸங்கா⁴தமத்தம்பி சே, பி⁴க்க²வே, பி⁴க்கு² மேத்தாசித்தம் [மேத்தம் சித்தம் (ஸீ.), மேத்தசித்தம் (ஸ்யா. கம். பீ. க.)] ஆஸேவதி; அயம் வுச்சதி, பி⁴க்க²வே – ‘பி⁴க்கு² அரித்தஜ்ஜா²னோ விஹரதி ஸத்து²ஸாஸனகரோ ஓவாத³பதிகரோ, அமோக⁴ம் ரட்ட²பிண்ட³ம் பு⁴ஞ்ஜதி’. கோ பன வாதோ³ யே நம் ப³ஹுலீகரோந்தீ’’தி! ததியம்.

54. ‘‘அச்ச²ராஸங்கா⁴தமத்தம்பி சே, பி⁴க்க²வே, பி⁴க்கு² மேத்தாசித்தம் பா⁴வேதி; அயம் வுச்சதி, பி⁴க்க²வே – ‘பி⁴க்கு² அரித்தஜ்ஜா²னோ விஹரதி ஸத்து²ஸாஸனகரோ ஓவாத³பதிகரோ, அமோக⁴ம் ரட்ட²பிண்ட³ம் பு⁴ஞ்ஜதி’. கோ பன வாதோ³ யே நம் ப³ஹுலீகரோந்தீ’’தி! சதுத்த²ம்.

55. ‘‘அச்ச²ராஸங்கா⁴தமத்தம்பி சே, பி⁴க்க²வே, பி⁴க்கு² மேத்தாசித்தம் மனஸி கரோதி; அயம் வுச்சதி, பி⁴க்க²வே – ‘பி⁴க்கு² அரித்தஜ்ஜா²னோ விஹரதி ஸத்து²ஸாஸனகரோ ஓவாத³பதிகரோ அமோக⁴ம் ரட்ட²பிண்ட³ம் பு⁴ஞ்ஜதி’. கோ பன வாதோ³ யே நம் ப³ஹுலீகரோந்தீ’’தி! பஞ்சமம்.

56. ‘‘யே கேசி, பி⁴க்க²வே, த⁴ம்மா அகுஸலா அகுஸலபா⁴கி³யா அகுஸலபக்கி²கா, ஸப்³பே³ தே மனோபுப்³ப³ங்க³மா. மனோ தேஸம் த⁴ம்மானம் பட²மம் உப்பஜ்ஜதி, அன்வதே³வ அகுஸலா த⁴ம்மா’’தி. ச²ட்ட²ம்.

57. ‘‘யே கேசி, பி⁴க்க²வே, த⁴ம்மா குஸலா குஸலபா⁴கி³யா குஸலபக்கி²கா, ஸப்³பே³ தே மனோபுப்³ப³ங்க³மா. மனோ தேஸம் த⁴ம்மானம் பட²மம் உப்பஜ்ஜதி, அன்வதே³வ குஸலா த⁴ம்மா’’தி. ஸத்தமம்.

58. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, பமாதோ³. பமத்தஸ்ஸ, பி⁴க்க²வே, அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. அட்ட²மம்.

59. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா குஸலா த⁴ம்மா உப்பஜ்ஜந்தி உப்பன்னா வா அகுஸலா த⁴ம்மா பரிஹாயந்தி யத²யித³ம், பி⁴க்க²வே, அப்பமாதோ³. அப்பமத்தஸ்ஸ, பி⁴க்க²வே, அனுப்பன்னா சேவ குஸலா த⁴ம்மா உப்பஜ்ஜந்தி உப்பன்னா ச அகுஸலா த⁴ம்மா பரிஹாயந்தீ’’தி. நவமம்.

60. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா அகுஸலா த⁴ம்மா உப்பஜ்ஜந்தி உப்பன்னா வா குஸலா த⁴ம்மா பரிஹாயந்தி யத²யித³ம், பி⁴க்க²வே, கோஸஜ்ஜம். குஸீதஸ்ஸ, பி⁴க்க²வே, அனுப்பன்னா சேவ அகுஸலா த⁴ம்மா உப்பஜ்ஜந்தி உப்பன்னா ச குஸலா த⁴ம்மா பரிஹாயந்தீ’’தி. த³ஸமம்.

அச்ச²ராஸங்கா⁴தவக்³கோ³ ச²ட்டோ².