5. பணிஹிதஅச்ச²வக்³கோ³

41. ‘‘ஸேய்யதா²பி, பி⁴க்க²வே, ஸாலிஸூகம் வா யவஸூகம் வா மிச்சா²பணிஹிதம் ஹத்தே²ன வா பாதே³ன வா அக்கந்தம் ஹத்த²ம் வா பாத³ம் வா பே⁴ச்ச²தி [பி⁴ஜ்ஜிஸ்ஸதி (ஸ்யா. கம். க.), பே⁴ஜ்ஜதி (ஸீ.) மோக்³க³ல்லானப்³யாகரணம் பஸ்ஸிதப்³ப³ம்] லோஹிதம் வா உப்பாதே³ஸ்ஸதீதி நேதம் டா²னம் விஜ்ஜதி. தம் கிஸ்ஸ ஹேது? மிச்சா²பணிஹிதத்தா, பி⁴க்க²வே, ஸூகஸ்ஸ. ஏவமேவம் கோ², பி⁴க்க²வே, ஸோ வத பி⁴க்கு² மிச்சா²பணிஹிதேன சித்தேன அவிஜ்ஜம் பே⁴ச்ச²தி, விஜ்ஜம் உப்பாதே³ஸ்ஸதி, நிப்³பா³னம் ஸச்சி²கரிஸ்ஸதீதி நேதம் டா²னம் விஜ்ஜதி. தம் கிஸ்ஸ ஹேது? மிச்சா²பணிஹிதத்தா, பி⁴க்க²வே, சித்தஸ்ஸா’’தி. பட²மம்.

42. ‘‘ஸேய்யதா²பி, பி⁴க்க²வே, ஸாலிஸூகம் வா யவஸூகம் வா ஸம்மாபணிஹிதம் ஹத்தே²ன வா பாதே³ன வா அக்கந்தம் ஹத்த²ம் வா பாத³ம் வா பே⁴ச்ச²தி லோஹிதம் வா உப்பாதே³ஸ்ஸதீதி டா²னமேதம் விஜ்ஜதி. தம் கிஸ்ஸ ஹேது? ஸம்மாபணிஹிதத்தா, பி⁴க்க²வே, ஸூகஸ்ஸ. ஏவமேவம் கோ², பி⁴க்க²வே, ஸோ வத பி⁴க்கு² ஸம்மாபணிஹிதேன சித்தேன அவிஜ்ஜம் பே⁴ச்ச²தி, விஜ்ஜம் உப்பாதே³ஸ்ஸதி, நிப்³பா³னம் ஸச்சி²கரிஸ்ஸதீதி டா²னமேதம் விஜ்ஜதி. தம் கிஸ்ஸ ஹேது? ஸம்மாபணிஹிதத்தா, பி⁴க்க²வே, சித்தஸ்ஸா’’தி. து³தியம்.

43. ‘‘இதா⁴ஹம் [இதா³ஹம் (ஸீ.)], பி⁴க்க²வே, ஏகச்சம் புக்³க³லம் பது³ட்ட²சித்தம் ஏவம் சேதஸா சேதோ பரிச்ச பஜானாமி – ‘இமம்ஹி சே அயம் ஸமயே புக்³க³லோ காலம் கரேய்ய, யதா²ப⁴தம் நிக்கி²த்தோ ஏவம் நிரயே’. தம் கிஸ்ஸ ஹேது? சித்தம் ஹிஸ்ஸ, பி⁴க்க²வே, பது³ட்ட²ம். ‘‘சேதோபதோ³ஸஹேது பன, பி⁴க்க²வே, ஏவமிதே⁴கச்சே ஸத்தா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜந்தீ’’தி. ததியம்.

44. ‘‘இதா⁴ஹம், பி⁴க்க²வே, ஏகச்சம் புக்³க³லம் பஸன்னசித்தம் ஏவம் சேதஸா சேதோ பரிச்ச பஜானாமி – ‘இமம்ஹி சே அயம் ஸமயே புக்³க³லோ காலம் கரேய்ய, யதா²ப⁴தம் நிக்கி²த்தோ ஏவம் ஸக்³கே³’. தம் கிஸ்ஸ ஹேது? சித்தம் ஹிஸ்ஸ, பி⁴க்க²வே, பஸன்னம். ‘‘சேதோபஸாத³ஹேது பன, பி⁴க்க²வே, ஏவமிதே⁴கச்சே ஸத்தா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜந்தீ’’தி. சதுத்த²ம்.

45. ‘‘ஸேய்யதா²பி, பி⁴க்க²வே, உத³கரஹதோ³ ஆவிலோ லுளிதோ கலலீபூ⁴தோ தத்த² சக்கு²மா புரிஸோ தீரே டி²தோ ந பஸ்ஸேய்ய ஸிப்பிஸம்பு³கம்பி [ஸிப்பிகஸம்பு³கம்பி (க.)] ஸக்க²ரகட²லம்பி மச்ச²கு³ம்ப³ம்பி சரந்தம்பி திட்ட²ந்தம்பி. தம் கிஸ்ஸ ஹேது? ஆவிலத்தா, பி⁴க்க²வே, உத³கஸ்ஸ. ஏவமேவம் கோ², பி⁴க்க²வே, ஸோ வத பி⁴க்கு² ஆவிலேன சித்தேன அத்தத்த²ம் வா ஞஸ்ஸதி பரத்த²ம் வா ஞஸ்ஸதி உப⁴யத்த²ம் வா ஞஸ்ஸதி உத்தரிம் வா மனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரிஸ்ஸதீதி நேதம் டா²னம் விஜ்ஜதி. தம் கிஸ்ஸ ஹேது? ஆவிலத்தா, பி⁴க்க²வே, சித்தஸ்ஸா’’தி. பஞ்சமம்.

46. ‘‘ஸேய்யதா²பி, பி⁴க்க²வே, உத³கரஹதோ³ அச்சோ² விப்பஸன்னோ அனாவிலோ தத்த² சக்கு²மா புரிஸோ தீரே டி²தோ பஸ்ஸேய்ய ஸிப்பிஸம்பு³கம்பி ஸக்க²ரகட²லம்பி மச்ச²கு³ம்ப³ம்பி சரந்தம்பி திட்ட²ந்தம்பி. தம் கிஸ்ஸ ஹேது? அனாவிலத்தா, பி⁴க்க²வே, உத³கஸ்ஸ. ஏவமேவம் கோ², பி⁴க்க²வே, ஸோ வத பி⁴க்கு² அனாவிலேன சித்தேன அத்தத்த²ம் வா ஞஸ்ஸதி பரத்த²ம் வா ஞஸ்ஸதி உப⁴யத்த²ம் வா ஞஸ்ஸதி உத்தரிம் வா மனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரிஸ்ஸதீதி டா²னமேதம் விஜ்ஜதி. தம் கிஸ்ஸ ஹேது? அனாவிலத்தா, பி⁴க்க²வே, சித்தஸ்ஸா’’தி. ச²ட்ட²ம்.

47. ‘‘ஸேய்யதா²பி, பி⁴க்க²வே, யானி கானிசி ருக்க²ஜாதானம் ப²ந்த³னோ தேஸம் அக்³க³மக்கா²யதி யதி³த³ம் முது³தாய சேவ கம்மஞ்ஞதாய ச. ஏவமேவம் கோ² அஹம், பி⁴க்க²வே, நாஞ்ஞம் ஏகத⁴ம்மம்பி ஸமனுபஸ்ஸாமி யம் ஏவம் பா⁴விதம் ப³ஹுலீகதம் முது³ ச ஹோதி கம்மஞ்ஞஞ்ச யத²யித³ம் சித்தம். சித்தம், பி⁴க்க²வே, பா⁴விதம் ப³ஹுலீகதம் முது³ ச ஹோதி கம்மஞ்ஞஞ்ச ஹோதீ’’தி. ஸத்தமம்.

48. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யம் ஏவம் லஹுபரிவத்தம் யத²யித³ம் சித்தம். யாவஞ்சித³ம், பி⁴க்க²வே, உபமாபி ந ஸுகரா யாவ லஹுபரிவத்தம் சித்த’’ந்தி. அட்ட²மம்.

49. ‘‘பப⁴ஸ்ஸரமித³ம், பி⁴க்க²வே, சித்தம். தஞ்ச கோ² ஆக³ந்துகேஹி உபக்கிலேஸேஹி உபக்கிலிட்ட²’’ந்தி. நவமம்.

50. ‘‘பப⁴ஸ்ஸரமித³ம், பி⁴க்க²வே, சித்தம். தஞ்ச கோ² ஆக³ந்துகேஹி உபக்கிலேஸேஹி விப்பமுத்த’’ந்தி. த³ஸமம்.

பணிஹிதஅச்ச²வக்³கோ³ பஞ்சமோ.