2. நீவரணப்பஹானவக்³கோ³

11. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னோ வா காமச்ச²ந்தோ³ உப்பஜ்ஜதி உப்பன்னோ வா காமச்ச²ந்தோ³ பி⁴ய்யோபா⁴வாய வேபுல்லாய ஸம்வத்ததி யத²யித³ம், பி⁴க்க²வே, ஸுப⁴னிமித்தம். ஸுப⁴னிமித்தம், பி⁴க்க²வே, அயோனிஸோ மனஸி கரோதோ அனுப்பன்னோ சேவ காமச்ச²ந்தோ³ உப்பஜ்ஜதி உப்பன்னோ ச காமச்ச²ந்தோ³ பி⁴ய்யோபா⁴வாய வேபுல்லாய ஸம்வத்ததீ’’தி. பட²மம்.

12. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னோ வா ப்³யாபாதோ³ உப்பஜ்ஜதி உப்பன்னோ வா ப்³யாபாதோ³ பி⁴ய்யோபா⁴வாய வேபுல்லாய ஸம்வத்ததி யத²யித³ம், பி⁴க்க²வே, படிக⁴னிமித்தம். படிக⁴னிமித்தம், பி⁴க்க²வே, அயோனிஸோ மனஸி கரோதோ அனுப்பன்னோ சேவ ப்³யாபாதோ³ உப்பஜ்ஜதி உப்பன்னோ ச ப்³யாபாதோ³ பி⁴ய்யோபா⁴வாய வேபுல்லாய ஸம்வத்ததீ’’தி. து³தியம்.

13. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னம் வா தி²னமித்³த⁴ம் [தீ²னமித்³த⁴ம் (ஸீ. ஸ்யா. கம். பீ.)] உப்பஜ்ஜதி உப்பன்னம் வா தி²னமித்³த⁴ம் பி⁴ய்யோபா⁴வாய வேபுல்லாய ஸம்வத்ததி யத²யித³ம், பி⁴க்க²வே, அரதி தந்தீ³ [தந்தி³ (க.)] விஜம்பி⁴தா [விஜம்பி⁴கா (ஸீ. ஸ்யா. கம். பீ.)] ப⁴த்தஸம்மதோ³ சேதஸோ ச லீனத்தம். லீனசித்தஸ்ஸ, பி⁴க்க²வே, அனுப்பன்னஞ்சேவ தி²னமித்³த⁴ம் உப்பஜ்ஜதி உப்பன்னஞ்ச தி²னமித்³த⁴ம் பி⁴ய்யோபா⁴வாய வேபுல்லாய ஸம்வத்ததீ’’தி. ததியம்.

14. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னம் வா உத்³த⁴ச்சகுக்குச்சம் உப்பஜ்ஜதி உப்பன்னம் வா உத்³த⁴ச்சகுக்குச்சம் பி⁴ய்யோபா⁴வாய வேபுல்லாய ஸம்வத்ததி யத²யித³ம், பி⁴க்க²வே, சேதஸோ அவூபஸமோ. அவூபஸந்தசித்தஸ்ஸ, பி⁴க்க²வே, அனுப்பன்னஞ்சேவ உத்³த⁴ச்சகுக்குச்சம் உப்பஜ்ஜதி உப்பன்னஞ்ச உத்³த⁴ச்சகுக்குச்சம் பி⁴ய்யோபா⁴வாய வேபுல்லாய ஸம்வத்ததீ’’தி. சதுத்த²ம்.

15. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா விசிகிச்சா² உப்பஜ்ஜதி உப்பன்னா வா விசிகிச்சா² பி⁴ய்யோபா⁴வாய வேபுல்லாய ஸம்வத்ததி யத²யித³ம், பி⁴க்க²வே, அயோனிஸோமனஸிகாரோ. அயோனிஸோ, பி⁴க்க²வே, மனஸி கரோதோ அனுப்பன்னா சேவ விசிகிச்சா² உப்பஜ்ஜதி உப்பன்னா ச விசிகிச்சா² பி⁴ய்யோபா⁴வாய வேபுல்லாய ஸம்வத்ததீ’’தி. பஞ்சமம்.

16. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னோ வா காமச்ச²ந்தோ³ நுப்பஜ்ஜதி உப்பன்னோ வா காமச்ச²ந்தோ³ பஹீயதி யத²யித³ம், பி⁴க்க²வே, அஸுப⁴னிமித்தம். அஸுப⁴னிமித்தம், பி⁴க்க²வே, யோனிஸோ மனஸி கரோதோ அனுப்பன்னோ சேவ காமச்ச²ந்தோ³ நுப்பஜ்ஜதி உப்பன்னோ ச காமச்ச²ந்தோ³ பஹீயதீ’’தி. ச²ட்ட²ம்.

17. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னோ வா ப்³யாபாதோ³ நுப்பஜ்ஜதி உப்பன்னோ வா ப்³யாபாதோ³ பஹீயதி யத²யித³ம், பி⁴க்க²வே, மேத்தா சேதோவிமுத்தி. மேத்தம், பி⁴க்க²வே, சேதோவிமுத்திம் யோனிஸோ மனஸி கரோதோ அனுப்பன்னோ சேவ ப்³யாபாதோ³ நுப்பஜ்ஜதி உப்பன்னோ ச ப்³யாபாதோ³ பஹீயதீ’’தி. ஸத்தமம்.

18. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னம் வா தி²னமித்³த⁴ம் நுப்பஜ்ஜதி உப்பன்னம் வா தி²னமித்³த⁴ம் பஹீயதி யத²யித³ம், பி⁴க்க²வே, ஆரம்ப⁴தா⁴து நிக்கமதா⁴து பரக்கமதா⁴து. ஆரத்³த⁴வீரியஸ்ஸ, பி⁴க்க²வே, அனுப்பன்னஞ்சேவ தி²னமித்³த⁴ம் நுப்பஜ்ஜதி உப்பன்னஞ்ச தி²னமித்³த⁴ம் பஹீயதீ’’தி. அட்ட²மம்.

19. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னம் வா உத்³த⁴ச்சகுக்குச்சம் நுப்பஜ்ஜதி உப்பன்னம் வா உத்³த⁴ச்சகுக்குச்சம் பஹீயதி யத²யித³ம், பி⁴க்க²வே, சேதஸோ வூபஸமோ. வூபஸந்தசித்தஸ்ஸ, பி⁴க்க²வே, அனுப்பன்னஞ்சேவ உத்³த⁴ச்சகுக்குச்சம் நுப்பஜ்ஜதி உப்பன்னஞ்ச உத்³த⁴ச்சகுக்குச்சம் பஹீயதீ’’தி. நவமம்.

20. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி யேன அனுப்பன்னா வா விசிகிச்சா² நுப்பஜ்ஜதி உப்பன்னா வா விசிகிச்சா² பஹீயதி யத²யித³ம், பி⁴க்க²வே, யோனிஸோமனஸிகாரோ. யோனிஸோ, பி⁴க்க²வே, மனஸி கரோதோ அனுப்பன்னா சேவ விசிகிச்சா² நுப்பஜ்ஜதி உப்பன்னா ச விசிகிச்சா² பஹீயதீ’’தி. த³ஸமம்.

நீவரணப்பஹானவக்³கோ³ து³தியோ.