2. து³தியவக்³கோ³

278. ‘‘அட்டா²னமேதம், பி⁴க்க²வே, அனவகாஸோ யம் ஏகிஸ்ஸா லோகதா⁴துயா த்³வே ராஜானோ சக்கவத்தீ அபுப்³ப³ம் அசரிமம் உப்பஜ்ஜேய்யும். நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் ஏகிஸ்ஸா லோகதா⁴துயா ஏகோ ராஜா சக்கவத்தீ உப்பஜ்ஜேய்ய. டா²னமேதம் விஜ்ஜதீ’’தி.

279. ‘‘அட்டா²னமேதம், பி⁴க்க²வே, அனவகாஸோ யம் இத்தீ² அரஹம் அஸ்ஸ ஸம்மாஸம்பு³த்³தோ⁴. நேதம் டா²னம் விஜ்ஜதி. டா²னஞ்ச கோ², ஏதம், பி⁴க்க²வே, விஜ்ஜதி யம் புரிஸோ அரஹம் அஸ்ஸ ஸம்மாஸம்பு³த்³தோ⁴. டா²னமேதம் விஜ்ஜதீ’’தி.

280. ‘‘அட்டா²னமேதம், பி⁴க்க²வே, அனவகாஸோ யம் இத்தீ² ராஜா அஸ்ஸ சக்கவத்தீ. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புரிஸோ ராஜா அஸ்ஸ சக்கவத்தீ. டா²னமேதம் விஜ்ஜதீ’’தி.

281-283. ‘‘அட்டா²னமேதம், பி⁴க்க²வே, அனவகாஸோ யம் இத்தீ² ஸக்கத்தம் காரேய்ய…பே… மாரத்தம் காரேய்ய…பே… ப்³ரஹ்மத்தம் காரேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புரிஸோ ஸக்கத்தம் காரேய்ய…பே… மாரத்தம் காரேய்ய…பே… ப்³ரஹ்மத்தம் காரேய்ய. டா²னமேதம் விஜ்ஜதீ’’தி.

284. ‘‘அட்டா²னமேதம், பி⁴க்க²வே, அனவகாஸோ யம் காயது³ச்சரிதஸ்ஸ இட்டோ² கந்தோ மனாபோ விபாகோ நிப்³ப³த்தேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் காயது³ச்சரிதஸ்ஸ அனிட்டோ² அகந்தோ அமனாபோ விபாகோ நிப்³ப³த்தேய்ய. டா²னமேதம் விஜ்ஜதீ’’தி.

285-286. ‘‘அட்டா²னமேதம், பி⁴க்க²வே, அனவகாஸோ யம் வசீது³ச்சரிதஸ்ஸ…பே… யம் மனோது³ச்சரிதஸ்ஸ இட்டோ² கந்தோ மனாபோ விபாகோ நிப்³ப³த்தேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் மனோது³ச்சரிதஸ்ஸ அனிட்டோ² அகந்தோ அமனாபோ விபாகோ நிப்³ப³த்தேய்ய. டா²னமேதம் விஜ்ஜதீ’’தி.

வக்³கோ³ து³தியோ.