3. ததியவக்³கோ³

287. ‘‘அட்டா²னமேதம், பி⁴க்க²வே, அனவகாஸோ யம் காயஸுசரிதஸ்ஸ அனிட்டோ² அகந்தோ அமனாபோ விபாகோ நிப்³ப³த்தேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் காயஸுசரிதஸ்ஸ இட்டோ² கந்தோ மனாபோ விபாகோ நிப்³ப³த்தேய்ய. டா²னமேதம் விஜ்ஜதீ’’தி.

288-289. ‘‘அட்டா²னமேதம், பி⁴க்க²வே, அனவகாஸோ யம் வசீஸுசரிதஸ்ஸ…பே… மனோஸுசரிதஸ்ஸ அனிட்டோ² அகந்தோ அமனாபோ விபாகோ நிப்³ப³த்தேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் மனோஸுசரிதஸ்ஸ இட்டோ² கந்தோ மனாபோ விபாகோ நிப்³ப³த்தேய்ய. டா²னமேதம் விஜ்ஜதீ’’தி.

290. ‘‘அட்டா²னமேதம், பி⁴க்க²வே, அனவகாஸோ யம் காயது³ச்சரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் காயது³ச்சரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்ய. டா²னமேதம் விஜ்ஜதீ’’தி.

291-292. ‘‘அட்டா²னமேதம், பி⁴க்க²வே, அனவகாஸோ யம் வசீது³ச்சரிதஸமங்கீ³…பே… யம் மனோது³ச்சரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் மனோது³ச்சரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்ய. டா²னமேதம் விஜ்ஜதீ’’தி.

293. ‘‘அட்டா²னமேதம், பி⁴க்க²வே, அனவகாஸோ யம் காயஸுசரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் காயஸுசரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்ய. டா²னமேதம் விஜ்ஜதீ’’தி.

294-295. ‘‘அட்டா²னமேதம், பி⁴க்க²வே, அனவகாஸோ யம் வசீஸுசரிதஸமங்கீ³…பே… யம் மனோஸுசரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் மனோஸுசரிதஸமங்கீ³ தன்னிதா³னா தப்பச்சயா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்ய. டா²னமேதம் விஜ்ஜதீ’’தி.

வக்³கோ³ ததியோ.

அட்டா²னபாளி பன்னரஸமோ.