1. பட²மவக்³கோ³

268. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ கஞ்சி [கிஞ்சி (க.)] ஸங்கா²ரம் நிச்சதோ உபக³ச்சே²ய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ கஞ்சி ஸங்கா²ரம் நிச்சதோ உபக³ச்சே²ய்ய. டா²னமேதம் விஜ்ஜதீ’’தி.

269. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ கஞ்சி ஸங்கா²ரம் ஸுக²தோ உபக³ச்சே²ய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ கஞ்சி ஸங்கா²ரம் ஸுக²தோ உபக³ச்சே²ய்ய. டா²னமேதம் விஜ்ஜதீ’’தி.

270. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ கஞ்சி த⁴ம்மம் அத்ததோ உபக³ச்சே²ய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ கஞ்சி த⁴ம்மம் அத்ததோ உபக³ச்சே²ய்ய. டா²னமேதம் விஜ்ஜதீ’’தி.

271. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ மாதரம் ஜீவிதா வோரோபேய்ய. நேதம் டா²னம் விஜ்ஜதி. டா²னஞ்ச கோ², பி⁴க்க²வே, விஜ்ஜதி யம் புது²ஜ்ஜனோ மாதரம் ஜீவிதா வோரோபேய்ய. டா²னமேதம் விஜ்ஜதீ’’தி.

272. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ பிதரம் ஜீவிதா வோரோபேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ பிதரம் ஜீவிதா வோரோபேய்ய. டா²னமேதம் விஜ்ஜதீ’’தி.

273. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ அரஹந்தம் ஜீவிதா வோரோபேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ அரஹந்தம் ஜீவிதா வோரோபேய்ய. டா²னமேதம் விஜ்ஜதீ’’தி.

274. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ ததா²க³தஸ்ஸ பது³ட்ட²சித்தோ லோஹிதம் உப்பாதே³ய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ ததா²க³தஸ்ஸ பது³ட்ட²சித்தோ லோஹிதம் உப்பாதே³ய்ய. டா²னமேதம் விஜ்ஜதீ’’தி.

275. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ ஸங்க⁴ம் பி⁴ந்தே³ய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ ஸங்க⁴ம் பி⁴ந்தே³ய்ய. டா²னமேதம் விஜ்ஜதீ’’தி.

276. ‘‘அட்டா²னமேதம், பி⁴க்க²வே, அனவகாஸோ யம் தி³ட்டி²ஸம்பன்னோ புக்³க³லோ அஞ்ஞம் ஸத்தா²ரம் உத்³தி³ஸேய்ய. நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் புது²ஜ்ஜனோ அஞ்ஞம் ஸத்தா²ரம் உத்³தி³ஸேய்ய. டா²னமேதம் விஜ்ஜதீ’’தி.

277. ‘‘அட்டா²னமேதம், பி⁴க்க²வே, அனவகாஸோ யம் ஏகிஸ்ஸா லோகதா⁴துயா த்³வே அரஹந்தோ ஸம்மாஸம்பு³த்³தா⁴ அபுப்³ப³ம் அசரிமம் உப்பஜ்ஜேய்யும். நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி யம் ஏகிஸ்ஸா லோகதா⁴துயா ஏகோவ அரஹம் ஸம்மாஸம்பு³த்³தோ⁴ உப்பஜ்ஜேய்ய. டா²னமேதம் விஜ்ஜதீ’’தி.

வக்³கோ³ பட²மோ.