1. ரூபாதி³வக்³கோ³

1. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘நாஹம், பி⁴க்க²வே, அஞ்ஞம் ஏகரூபம்பி ஸமனுபஸ்ஸாமி யம் ஏவம் புரிஸஸ்ஸ சித்தம் பரியாதா³ய திட்ட²தி யத²யித³ம், பி⁴க்க²வே, இத்தி²ரூபம். இத்தி²ரூபம், பி⁴க்க²வே, புரிஸஸ்ஸ சித்தம் பரியாதா³ய திட்ட²தீ’’தி. பட²மம்.

2. ‘‘நாஹம், பி⁴க்க²வே, அஞ்ஞம் ஏகஸத்³த³ம்பி ஸமனுபஸ்ஸாமி யம் ஏவம் புரிஸஸ்ஸ சித்தம் பரியாதா³ய திட்ட²தி யத²யித³ம், பி⁴க்க²வே, இத்தி²ஸத்³தோ³. இத்தி²ஸத்³தோ³, பி⁴க்க²வே, புரிஸஸ்ஸ சித்தம் பரியாதா³ய திட்ட²தீ’’தி. து³தியம்.

3. ‘‘நாஹம், பி⁴க்க²வே, அஞ்ஞம் ஏகக³ந்த⁴ம்பி ஸமனுபஸ்ஸாமி யம் ஏவம் புரிஸஸ்ஸ சித்தம் பரியாதா³ய திட்ட²தி யத²யித³ம், பி⁴க்க²வே, இத்தி²க³ந்தோ⁴. இத்தி²க³ந்தோ⁴, பி⁴க்க²வே, புரிஸஸ்ஸ சித்தம் பரியாதா³ய திட்ட²தீ’’தி. ததியம்.

4. ‘‘நாஹம், பி⁴க்க²வே, அஞ்ஞம் ஏகரஸம்பி ஸமனுபஸ்ஸாமி யம் ஏவம் புரிஸஸ்ஸ சித்தம் பரியாதா³ய திட்ட²தி யத²யித³ம், பி⁴க்க²வே, இத்தி²ரஸோ. இத்தி²ரஸோ, பி⁴க்க²வே, புரிஸஸ்ஸ சித்தம் பரியாதா³ய திட்ட²தீ’’தி. சதுத்த²ம்.

5. ‘‘நாஹம், பி⁴க்க²வே, அஞ்ஞம் ஏகபோ²ட்ட²ப்³ப³ம்பி ஸமனுபஸ்ஸாமி யம் ஏவம் புரிஸஸ்ஸ சித்தம் பரியாதா³ய திட்ட²தி யத²யித³ம், பி⁴க்க²வே, இத்தி²போ²ட்ட²ப்³போ³. இத்தி²போ²ட்ட²ப்³போ³, பி⁴க்க²வே, புரிஸஸ்ஸ சித்தம் பரியாதா³ய திட்ட²தீ’’தி. பஞ்சமம்.

6. ‘‘நாஹம், பி⁴க்க²வே, அஞ்ஞம் ஏகரூபம்பி ஸமனுபஸ்ஸாமி யம் ஏவம் இத்தி²யா சித்தம் பரியாதா³ய திட்ட²தி யத²யித³ம், பி⁴க்க²வே, புரிஸரூபம். புரிஸரூபம், பி⁴க்க²வே, இத்தி²யா சித்தம் பரியாதா³ய திட்ட²தீ’’தி. ச²ட்ட²ம்.

7. ‘‘நாஹம், பி⁴க்க²வே, அஞ்ஞம் ஏகஸத்³த³ம்பி ஸமனுபஸ்ஸாமி யம் ஏவம் இத்தி²யா சித்தம் பரியாதா³ய திட்ட²தி யத²யித³ம், பி⁴க்க²வே, புரிஸஸத்³தோ³. புரிஸஸத்³தோ³, பி⁴க்க²வே, இத்தி²யா சித்தம் பரியாதா³ய திட்ட²தீ’’தி. ஸத்தமம்.

8. ‘‘நாஹம், பி⁴க்க²வே, அஞ்ஞம் ஏகக³ந்த⁴ம்பி ஸமனுபஸ்ஸாமி யம் ஏவம் இத்தி²யா சித்தம் பரியாதா³ய திட்ட²தி யத²யித³ம், பி⁴க்க²வே, புரிஸக³ந்தோ⁴. புரிஸக³ந்தோ⁴, பி⁴க்க²வே, இத்தி²யா சித்தம் பரியாதா³ய திட்ட²தீ’’தி. அட்ட²மம்.

9. ‘‘நாஹம், பி⁴க்க²வே, அஞ்ஞம் ஏகரஸம்பி ஸமனுபஸ்ஸாமி யம் ஏவம் இத்தி²யா சித்தம் பரியாதா³ய திட்ட²தி யத²யித³ம், பி⁴க்க²வே, புரிஸரஸோ. புரிஸரஸோ, பி⁴க்க²வே, இத்தி²யா சித்தம் பரியாதா³ய திட்ட²தீ’’தி. நவமம்.

10. ‘‘நாஹம், பி⁴க்க²வே, அஞ்ஞம் ஏகபோ²ட்ட²ப்³ப³ம்பி ஸமனுபஸ்ஸாமி யம் ஏவம் இத்தி²யா சித்தம் பரியாதா³ய திட்ட²தி யத²யித³ம், பி⁴க்க²வே, புரிஸபோ²ட்ட²ப்³போ³. புரிஸபோ²ட்ட²ப்³போ³, பி⁴க்க²வே, இத்தி²யா சித்தம் பரியாதா³ய திட்ட²தீ’’தி. த³ஸமம்.

ரூபாதி³வக்³கோ³ பட²மோ.