2. පාරාජිකාදිපඤ්හා

480. ඉත්ථී ච අබ්භන්තරෙ සියා,

භික්ඛු ච බහිද්ධා සියා;

ඡිද්දං තස්මිං ඝරෙ නත්ථි;

මෙථුනධම්මපච්චයා;

කථං පාරාජිකො සියා;

පඤ්හා මෙසා කුසලෙහි චින්තිතා.

තෙලං මධුං ඵාණිතඤ්චාපි සප්පිං;

සාමං ගහෙත්වාන නික්ඛිපෙය්‍ය;

අවීතිවත්තෙ සත්තාහෙ;

සති පච්චයෙ පරිභුඤ්ජන්තස්ස ආපත්ති;

පඤ්හා මෙසා කුසලෙහි චින්තිතා.

නිස්සග්ගියෙන ආපත්ති;

සුද්ධකෙන පාචිත්තියං;

ආපජ්ජන්තස්ස එකතො;

පඤ්හා මෙසා කුසලෙහි චින්තිතා.

භික්ඛූ සියා වීසතියා සමාගතා;

කම්මං කරෙය්‍යුං සමග්ගසඤ්ඤිනො;

භික්ඛු සියා ද්වාදසයොජනෙ ඨිතො;

කම්මඤ්ච තං කුප්පෙය්‍ය වග්ගපච්චයා;

පඤ්හා මෙසා කුසලෙහි චින්තිතා.

පදවීතිහාරමත්තෙන වාචාය භණිතෙන ච;

සබ්බානි ගරුකානි සප්පටිකම්මානි;

චතුසට්ඨි ආපත්තියො ආපජ්ජෙය්‍ය එකතො;

පඤ්හා මෙසා කුසලෙහි චින්තිතා.

නිවත්ථො අන්තරවාසකෙන;

දිගුණං සඞ්ඝාටිං පාරුතො;

සබ්බානි තානි නිස්සග්ගියානි හොන්ති;

පඤ්හා මෙසා කුසලෙහි චින්තිතා.

න චාපි ඤත්ති න ච පන කම්මවාචා;

න චෙහි භික්ඛූති ජිනො අවොච;

සරණගමනම්පි න තස්ස අත්ථි;

උපසම්පදා චස්ස අකුප්පා;

පඤ්හා මෙසා කුසලෙහි චින්තිතා.

ඉත්ථිං හනෙ න මාතරං, පුරිසඤ්ච න පිතරං හනෙ;

හනෙය්‍ය අනරියං මන්දො, තෙන චානන්තරං ඵුසෙ;

පඤ්හා මෙසා කුසලෙහි චින්තිතා.

ඉත්ථිං හනෙ ච මාතරං, පුරිසඤ්ච පිතරං හනෙ;

මාතරං පිතරං හන්ත්වා, න තෙනානන්තරං ඵුසෙ;

පඤ්හා මෙසා කුසලෙහි චින්තිතා.

අචොදයිත්වා අස්සාරයිත්වා;

අසම්මුඛීභූතස්ස කරෙය්‍ය කම්මං;

කතඤ්ච කම්මං සුකතං භවෙය්‍ය;

කාරකො ච සඞ්ඝො අනාපත්තිකො සියා;

පඤ්හා මෙසා කුසලෙහි චින්තිතා.

චොදයිත්වා සාරයිත්වා;

සම්මුඛීභූතස්ස කරෙය්‍ය කම්මං;

කතඤ්ච කම්මං අකතං භවෙය්‍ය;

කාරකො ච සඞ්ඝො සාපත්තිකො සියා;

පඤ්හා මෙසා කුසලෙහි චින්තිතා.

ඡින්දන්තස්ස ආපත්ති, ඡින්දන්තස්ස අනාපත්ති;

ඡාදෙන්තස්ස ආපත්ති, ඡාදෙන්තස්ස අනාපත්ති;

පඤ්හා මෙසා කුසලෙහි චින්තිතා.

සච්චං භණන්තො ගරුකං, මුසා ච ලහු භාසතො;

මුසා භණන්තො ගරුකං, සච්චඤ්ච ලහු භාසතො;

පඤ්හා මෙසා කුසලෙහි චින්තිතා.