3. පාචිත්තියාදිපඤ්හා

481. අධිට්ඨිතං රජනාය රත්තං;

කප්පකතම්පි සන්තං;

පරිභුඤ්ජන්තස්ස ආපත්ති;

පඤ්හා මෙසා කුසලෙහි චින්තිතා.

අත්ථඞ්ගතෙ සූරියෙ භික්ඛු මංසානි ඛාදති;

න උම්මත්තකො න ච පන ඛිත්තචිත්තො;

න චාපි සො වෙදනාට්ටො භවෙය්‍ය;

න චස්ස හොති ආපත්ති;

සො ච ධම්මො සුගතෙන දෙසිතො;

පඤ්හා මෙසා කුසලෙහි චින්තිතා.

න රත්තචිත්තො න ච පන ථෙය්‍යචිත්තො;

න චාපි සො පරං මරණාය චෙතයි;

සලාකං දෙන්තස්ස හොති ඡෙජ්ජං;

පටිග්ගණ්හන්තස්ස ථුල්ලච්චයං;

පඤ්හා මෙසා කුසලෙහි චින්තිතා.

න චාපි ආරඤ්ඤකං සාසඞ්කසම්මතං;

න චාපි සඞ්ඝෙන සම්මුති දින්නා;

න චස්ස කථිනං අත්ථතං තත්ථෙව;

චීවරං නික්ඛිපිත්වා ගච්ඡෙය්‍ය අඩ්ඪයොජනං;

තත්ථෙව අරුණං උග්ගච්ඡන්තස්ස අනාපත්ති;

පඤ්හා මෙසා කුසලෙහි චින්තිතා.

කායිකානි න වාචසිකානි;

සබ්බානි නානාවත්ථුකානි;

අපුබ්බං අචරිමං ආපජ්ජෙය්‍ය එකතො;

පඤ්හා මෙසා කුසලෙහි චින්තිතා.

වාචසිකානි න කායිකානි;

සබ්බානි නානාවත්ථුකානි;

අපුබ්බං අචරිමං ආපජ්ජෙය්‍ය එකතො;

පඤ්හා මෙසා කුසලෙහි චින්තිතා.

තිස්සිත්ථියො මෙථුනං තං න සෙවෙ;

තයො පුරිසෙ තයො අනරියපණ්ඩකෙ;

න චාචරෙ මෙථුනං බ්‍යඤ්ජනස්මිං;

ඡෙජ්ජං සියා මෙථුනධම්මපච්චයා;

පඤ්හා මෙසා කුසලෙහි චින්තිතා.

මාතරං චීවරං යාචෙ, නො ච සඞ්ඝෙ [නො සංඝස්ස (ක.), නො ච සංඝස්ස (ස්‍යා.), නො චෙ සංඝස්ස (සී.)] පරිණතං;

කෙනස්ස හොති ආපත්ති, අනාපත්ති ච ඤාතකෙ;

පඤ්හා මෙසා කුසලෙහි චින්තිතා.

කුද්ධො ආරාධකො හොති, කුද්ධො හොති ගරහියො;

අථ කො නාම සො ධම්මො, යෙන කුද්ධො පසංසියො;

පඤ්හා මෙසා කුසලෙහි චින්තිතා.

තුට්ඨො ආරාධකො හොති, තුට්ඨො හොති ගරහියො;

අථ කො නාම සො ධම්මො, යෙන තුට්ඨො ගරහියො;

පඤ්හා මෙසා කුසලෙහි චින්තිතා.

සඞ්ඝාදිසෙසං ථුල්ලච්චයං;

පාචිත්තියං පාටිදෙසනීයං;

දුක්කටං ආපජ්ජෙය්‍ය එකතො;

පඤ්හා මෙසා කුසලෙහි චින්තිතා.

උභො පරිපුණ්ණවීසතිවස්සා;

උභින්නං එකුපජ්ඣායො;

එකාචරියො එකා කම්මවාචා;

එකො උපසම්පන්නො එකො අනුපසම්පන්නො;

පඤ්හා මෙසා කුසලෙහි චින්තිතා.

අකප්පකතං නාපි රජනාය රත්තං;

තෙන නිවත්ථො යෙන කාමං වජෙය්‍ය;

න චස්ස හොති ආපත්ති;

සො ච ධම්මො සුගතෙන දෙසිතො;

පඤ්හා මෙසා කුසලෙහි චින්තිතා.

න දෙති න පටිග්ගණ්හාති, පටිග්ගහො තෙන න විජ්ජති;

ආපජ්ජති ගරුකං න ලහුකං, තඤ්ච පරිභොගපච්චයා;

පඤ්හා මෙසා කුසලෙහි චින්තිතා.

න දෙති න පටිග්ගණ්හාති, පටිග්ගහො තෙන න විජ්ජති;

ආපජ්ජති ලහුකං න ගරුකං, තඤ්ච පරිභොගපච්චයා;

පඤ්හා මෙසා කුසලෙහි චින්තිතා.

ආපජ්ජති ගරුකං සාවසෙසං;

ඡාදෙති අනාදරියං පටිච්ච;

න භික්ඛුනී නො ච ඵුසෙය්‍ය වජ්ජං;

පඤ්හා මෙසා කුසලෙහි චින්තිතා.

සෙදමොචනගාථා නිට්ඨිතා.