1. අවිප්පවාසපඤ්හා

479. අසංවාසො භික්ඛූහි ච භික්ඛුනීහි ච;

සම්භොගො එකච්චො තහිං න ලබ්භති;

අවිප්පවාසෙන අනාපත්ති;

පඤ්හා මෙසා කුසලෙහි චින්තිතා.

අවිස්සජ්ජියං අවෙභඞ්ගියං;

පඤ්ච වුත්තා මහෙසිනා;

විස්සජ්ජන්තස්ස පරිභුඤ්ජන්තස්ස අනාපත්ති;

පඤ්හා මෙසා කුසලෙහි චින්තිතා.

දස පුග්ගලෙ න වදාමි, එකාදස විවජ්ජිය;

වුඩ්ඪං වන්දන්තස්ස ආපත්ති, පඤ්හා මෙසා කුසලෙහි චින්තිතා.

න උක්ඛිත්තකො න ච පන පාරිවාසිකො;

න සඞ්ඝභින්නො න ච පන පක්ඛසඞ්කන්තො;

සමානසංවාසකභූමියා ඨිතො;

කථං නු සික්ඛාය අසාධාරණො සියා;

පඤ්හා මෙසා කුසලෙහි චින්තිතා.

උපෙති ධම්මං පරිපුච්ඡමානො, කුසලං අත්ථූපසඤ්හිතං;

න ජීවති න මතො න නිබ්බුතො, තං පුග්ගලං කතමං වදන්ති බුද්ධා;

පඤ්හා මෙසා කුසලෙහි චින්තිතා.

උබ්භක්ඛකෙ න වදාමි, අධො නාභිං විවජ්ජිය;

මෙථුනධම්මපච්චයා, කථං පාරාජිකො සියා;

පඤ්හා මෙසා කුසලෙහි චින්තිතා.

භික්ඛු සඤ්ඤාචිකාය කුටිං කරොති;

අදෙසිතවත්ථුකං පමාණාතික්කන්තං;

සාරම්භං අපරික්කමනං අනාපත්ති;

පඤ්හා මෙසා කුසලෙහි චින්තිතා.

භික්ඛු සඤ්ඤාචිකාය කුටිං කරොති;

දෙසිතවත්ථුකං පමාණිකං;

අනාරම්භං සපරික්කමනං ආපත්ති;

පඤ්හා මෙසා කුසලෙහි චින්තිතා.

න කායිකං කිඤ්චි පයොගමාචරෙ;

න චාපි වාචාය පරෙ භණෙය්‍ය;

ආපජ්ජෙය්‍ය ගරුකං ඡෙජ්ජවත්ථුං;

පඤ්හා මෙසා කුසලෙහි චින්තිතා.

න කායිකං වාචසිකඤ්ච කිඤ්චි;

මනසාපි සන්තො න කරෙය්‍ය පාපං;

සො නාසිතො කින්ති සුනාසිතො භවෙ;

පඤ්හා මෙසා කුසලෙහි චින්තිතා.

අනාලපන්තො මනුජෙන කෙනචි;

වාචාගිරං නො ච පරෙ භණෙය්‍ය;

ආපජ්ජෙය්‍ය වාචසිකං න කායිකං;

පඤ්හා මෙසා කුසලෙහි චින්තිතා.

සික්ඛාපදා බුද්ධවරෙන වණ්ණිතා;

සඞ්ඝාදිසෙසා චතුරො භවෙය්‍යුං;

ආපජ්ජෙය්‍ය එකපයොගෙන සබ්බෙ;

පඤ්හා මෙසා කුසලෙහි චින්තිතා.

උභො එකතො උපසම්පන්නා;

උභින්නං හත්ථතො චීවරං පටිග්ගණ්හෙය්‍ය;

සියා ආපත්තියො නානා;

පඤ්හා මෙසා කුසලෙහි චින්තිතා.

චතුරො ජනා සංවිධාය;

ගරුභණ්ඩං අවාහරුං;

තයො පාරාජිකා එකො න පාරාජිකො;

පඤ්හා මෙසා කුසලෙහි චින්තිතා.