8. සහධම්මිකවග්ගො
172. භික්ඛූහි සහධම්මිකං වුච්චමානො – ‘‘න තාවාහං, ආවුසො, එතස්මිං සික්ඛාපදෙ සික්ඛිස්සාමි යාව න අඤ්ඤං භික්ඛුං බ්‍යත්තං විනයධරං පරිපුච්ඡිස්සාමී’’ති භණන්තො ද්වෙ ආපත්තියො ආපජ්ජති. භණති, පයොගෙ දුක්කටං; භණිතෙ ආපත්ති පාචිත්තියස්ස.
විනයං විවණ්ණෙන්තො ද්වෙ ආපත්තියො ආපජ්ජති. විවණ්ණෙති, පයොගෙ දුක්කටං; විවණ්ණිතෙ ආපත්ති පාචිත්තියස්ස.
මොහෙන්තො ද්වෙ ආපත්තියො ආපජ්ජති. අනාරොපිතෙ මොහෙ මොහෙති, ආපත්ති දුක්කටස්ස; ආරොපිතෙ මොහෙ මොහෙති, ආපත්ති පාචිත්තියස්ස.
භික්ඛුස්ස කුපිතො අනත්තමනො පහාරං දෙන්තො ද්වෙ ආපත්තියො ආපජ්ජති. පහරති, පයොගෙ දුක්කටං; පහතෙ ආපත්ති පාචිත්තියස්ස.
භික්ඛුස්ස කුපිතො අනත්තමනො තලසත්තිකං උග්ගිරන්තො ද්වෙ ආපත්තියො ආපජ්ජති. උග්ගිරති, පයොගෙ දුක්කටං; උග්ගිරිතෙ ආපත්ති පාචිත්තියස්ස.
භික්ඛුං අමූලකෙන සඞ්ඝාදිසෙසෙන අනුද්ධංසෙන්තො ද්වෙ ආපත්තියො ආපජ්ජති. අනුද්ධංසෙති, පයොගෙ දුක්කටං; අනුද්ධංසිතෙ ආපත්ති පාචිත්තියස්ස.
භික්ඛුස්ස සඤ්චිච්ච කුක්කුච්චං උපදහන්තො ද්වෙ ආපත්තියො ආපජ්ජති. උපදහති, පයොගෙ දුක්කටං; උපදහිතෙ ආපත්ති පාචිත්තියස්ස.
භික්ඛූනං භණ්ඩනජාතානං කලහජාතානං විවාදාපන්නානං උපස්සුතිං තිට්ඨන්තො ද්වෙ ආපත්තියො ආපජ්ජති. ‘‘සොස්සාමී’’ති ගච්ඡති, ආපත්ති දුක්කටස්ස; යත්ථ ඨිතො සුණාති, ආපත්ති පාචිත්තියස්ස.
ධම්මිකානං කම්මානං ඡන්දං දත්වා පච්ඡා ඛීයනධම්මං ආපජ්ජන්තො ද්වෙ ආපත්තියො ආපජ්ජති. ඛිය්‍යති, පයොගෙ දුක්කටං; ඛිය්‍යිතෙ ආපත්ති පාචිත්තියස්ස.
සඞ්ඝෙ විනිච්ඡයකථාය වත්තමානාය ඡන්දං අදත්වා උට්ඨායාසනා පක්කමන්තො ද්වෙ ආපත්තියො ආපජ්ජති. පරිසාය හත්ථපාසං විජහන්තස්ස ආපත්ති දුක්කටස්ස; විජහිතෙ ආපත්ති පාචිත්තියස්ස.
සමග්ගෙන සඞ්ඝෙන චීවරං දත්වා පච්ඡා ඛීයනධම්මං ආපජ්ජන්තො ද්වෙ ආපත්තියො ආපජ්ජති. ඛිය්‍යති, පයොගෙ දුක්කටං; ඛිය්‍යිතෙ ආපත්ති පාචිත්තියස්ස.
ජානං සඞ්ඝිකං ලාභං පරිණතං පුග්ගලස්ස පරිණාමෙන්තො ද්වෙ ආපත්තියො ආපජ්ජති. පරිණාමෙති, පයොගෙ දුක්කටං; පරිණාමිතෙ ආපත්ති පාචිත්තියස්ස.
සහධම්මිකවග්ගො අට්ඨමො.