1. ලසුණවග්ගො

231. ලසුණං ඛාදන්තී ද්වෙ ආපත්තියො ආපජ්ජති. ඛාදිස්සාමීති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති පාචිත්තියස්ස.

සම්බාධෙ ලොමං සංහරාපෙන්තී ද්වෙ ආපත්තියො ආපජ්ජති. සංහරාපෙති, පයොගෙ දුක්කටං; සංහරාපිතෙ ආපත්ති පාචිත්තියස්ස.

තලඝාතකං කරොන්තී ද්වෙ ආපත්තියො ආපජ්ජති. කරොති, පයොගෙ දුක්කටං; කතෙ ආපත්ති පාචිත්තියස්ස.

ජතුමට්ඨකං ආදියන්තී ද්වෙ ආපත්තියො ආපජ්ජති. ආදියති, පයොගෙ දුක්කටං, ආදින්නෙ ආපත්ති පාචිත්තියස්ස.

අතිරෙකද්වඞ්ගුලපබ්බපරමං උදකසුද්ධිකං ආදියන්තී ද්වෙ ආපත්තියො ආපජ්ජති. ආදියති, පයොගෙ දුක්කටං; ආදින්නෙ ආපත්ති පාචිත්තියස්ස.

භික්ඛුස්ස භුඤ්ජන්තස්ස පානීයෙන වා විධූපනෙන වා උපතිට්ඨන්තී ද්වෙ ආපත්තියො ආපජ්ජති. හත්ථපාසෙ තිට්ඨති, ආපත්ති පාචිත්තියස්ස; හත්ථපාසං විජහිත්වා තිට්ඨති, ආපත්ති දුක්කටස්ස.

ආමකධඤ්ඤං විඤ්ඤාපෙත්වා භුඤ්ජන්තී ද්වෙ ආපත්තියො ආපජ්ජති. භුඤ්ජිස්සාමීති පටිග්ගණ්හාති, ආපත්ති දුක්කටස්ස; අජ්ඣොහාරෙ අජ්ඣොහාරෙ ආපත්ති පාචිත්තියස්ස.

උච්චාරං වා පස්සාවං වා සඞ්කාරං වා විඝාසං වා තිරොකුට්ටෙ වා තිරොපාකාරෙ වා ඡඩ්ඩෙන්තී ද්වෙ ආපත්තියො ආපජ්ජති. ඡඩ්ඩෙති, පයොගෙ දුක්කටං; ඡඩ්ඩිතෙ ආපත්ති පාචිත්තියස්ස.

උච්චාරං වා පස්සාවං වා සඞ්කාරං වා විඝාසං වා හරිතෙ ඡඩ්ඩෙන්තී ද්වෙ ආපත්තියො ආපජ්ජති. ඡඩ්ඩෙති, පයොගෙ දුක්කටං; ඡඩ්ඩිතෙ ආපත්ති පාචිත්තියස්ස.

නච්චං වා ගීතං වා වාදිතං වා දස්සනාය ගච්ඡන්තී ද්වෙ ආපත්තියො ආපජ්ජති. ගච්ඡති, ආපත්ති දුක්කටස්ස; යත්ථ ඨිතා පස්සති වා සුණාති වා, ආපත්ති පාචිත්තියස්ස.

ලසුණවග්ගො පඨමො.