9. ඡත්තුපාහනවග්ගො

239. ඡත්තුපාහනං ධාරෙන්තී ද්වෙ ආපත්තියො ආපජ්ජති. ධාරෙති, පයොගෙ දුක්කටං; ධාරිතෙ, ආපත්ති පාචිත්තියස්ස.

යානෙන යායන්තී ද්වෙ ආපත්තියො ආපජ්ජති. යායති, පයොගෙ දුක්කටං; යායිතෙ, ආපත්ති පාචිත්තියස්ස.

සඞ්ඝාණිං ධාරෙන්තී ද්වෙ ආපත්තියො ආපජ්ජති. ධාරෙති, පයොගෙ දුක්කටං; ධාරිතෙ, ආපත්ති පාචිත්තියස්ස.

ඉත්ථාලඞ්කාරං ධාරෙන්තී ද්වෙ ආපත්තියො ආපජ්ජති. ධාරෙති, පයොගෙ දුක්කටං; ධාරිතෙ, ආපත්ති පාචිත්තියස්ස.

ගන්ධවණ්ණකෙන නහායන්තී ද්වෙ ආපත්තියො ආපජ්ජති. නහායති, පයොගෙ දුක්කටං; නහානපරියොසානෙ, ආපත්ති පාචිත්තියස්ස.

වාසිතකෙන පිඤ්ඤාකෙන නහායන්තී ද්වෙ ආපත්තියො ආපජ්ජති. නහායති, පයොගෙ දුක්කටං; නහානපරියොසානෙ, ආපත්ති පාචිත්තියස්ස.

භික්ඛුනියා උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

සික්ඛමානාය උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

සාමණෙරියා උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

ගිහිනියා උම්මද්දාපෙන්තී පරිමද්දාපෙන්තී ද්වෙ ආපත්තියො ආපජ්ජති. උම්මද්දාපෙති, පයොගෙ දුක්කටං; උම්මද්දිතෙ, ආපත්ති පාචිත්තියස්ස.

භික්ඛුස්ස පුරතො අනාපුච්ඡා ආසනෙ නිසීදන්තී ද්වෙ ආපත්තියො ආපජ්ජති. නිසීදති, පයොගෙ දුක්කටං; නිසින්නෙ, ආපත්ති පාචිත්තියස්ස.

අනොකාසකතං භික්ඛුං පඤ්හං පුච්ඡන්තී ද්වෙ ආපත්තියො ආපජ්ජති. පුච්ඡති, පයොගෙ දුක්කටං; පුච්ඡිතෙ, ආපත්ති පාචිත්තියස්ස.

අසඞ්කච්චිකා ගාමං පවිසන්තී ද්වෙ ආපත්තියො ආපජ්ජති. පඨමං පාදං පරික්ඛෙපං අතික්කාමෙති, ආපත්ති දුක්කටස්ස; දුතියං පාදං අතික්කාමෙති, ආපත්ති පාචිත්තියස්ස.

ඡත්තුපාහනවග්ගො නවමො.

ඛුද්දකං නිට්ඨිතං.