1. පඨමඅනියතසික්ඛාපදං
ඉමෙ ඛො පනායස්මන්තො ද්වෙ අනියතා ධම්මා
උද්දෙසං ආගච්ඡන්ති.
443. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා උදායී සාවත්ථියං කුලූපකො හොති, බහුකානි කුලානි උපසඞ්කමති. තෙන ඛො පන සමයෙන ආයස්මතො උදායිස්ස උපට්ඨාකකුලස්ස කුමාරිකා අඤ්ඤතරස්ස කුලස්ස කුමාරකස්ස දින්නා හොති. අථ ඛො ආයස්මා උදායී පුබ්බණ්හසමයං නිවාසෙත්වා පත්තචීවරමාදාය යෙන තං කුලං තෙනුපසඞ්කමි; උපසඞ්කමිත්වා මනුස්සෙ පුච්ඡි – ‘‘කහං ඉත්ථන්නාමා’’ති? තෙ එවමාහංසු – ‘‘දින්නා, භන්තෙ, අමුකස්ස කුලස්ස කුමාරකස්සා’’ති. තම්පි ඛො කුලං ආයස්මතො උදායිස්ස උපට්ඨාකං හොති. අථ ඛො ආයස්මා උදායී යෙන තං කුලං තෙනුපසඞ්කමි; උපසඞ්කමිත්වා මනුස්සෙ පුච්ඡි – ‘‘කහං ඉත්ථන්නාමා’’ති? තෙ එවමාහංසු – ‘‘එසාය්‍ය, ඔවරකෙ නිසින්නා’’ති. අථ ඛො ආයස්මා උදායී යෙන සා කුමාරිකා තෙනුපසඞ්කමි; උපසඞ්කමිත්වා තස්සා කුමාරිකාය සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිසජ්ජං කප්පෙසි කාලයුත්තං සමුල්ලපන්තො කාලයුත්තං ධම්මං භණන්තො.
තෙන ඛො පන සමයෙන විසාඛා මිගාරමාතා බහුපුත්තා හොති බහුනත්තා අරොගපුත්තා අරොගනත්තා අභිමඞ්ගලසම්මතා. මනුස්සා යඤ්ඤෙසු ඡණෙසු උස්සවෙසු විසාඛං මිගාරමාතරං පඨමං භොජෙන්ති. අථ ඛො විසාඛා මිගාරමාතා නිමන්තිතා තං කුලං අගමාසි. අද්දසා ඛො විසාඛා මිගාරමාතා ආයස්මන්තං උදායිං තස්සා කුමාරිකාය සද්ධිං එකං එකාය රහො පටිච්ඡන්නෙ ආසනෙ අලංකම්මනියෙ නිසින්නං. දිස්වාන ආයස්මන්තං උදායිං එතදවොච – ‘‘ඉදං, භන්තෙ, නච්ඡන්නං නප්පතිරූපං යං අය්‍යො මාතුගාමෙන සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිසජ්ජං කප්පෙති. කිඤ්චාපි, භන්තෙ, අය්‍යො අනත්ථිකො තෙන ධම්මෙන, අපිච දුස්සද්ධාපයා අප්පසන්නා මනුස්සා’’ති. එවම්පි ඛො ආයස්මා උදායී විසාඛාය මිගාරමාතුයා වුච්චමානො නාදියි. අථ ඛො විසාඛා මිගාරමාතා නික්ඛමිත්වා භික්ඛූනං එතමත්ථං ආරොචෙසි. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ආයස්මා උදායී මාතුගාමෙන සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිසජ්ජං කප්පෙස්සතී’’ති! අථ ඛො තෙ භික්ඛූ ආයස්මන්තං උදායිං අනෙකපරියායෙන විගරහිත්වා භගවතො එතමත්ථං ආරොචෙසුං…පෙ… ‘‘සච්චං කිර ත්වං, උදායි, මාතුගාමෙන සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිසජ්ජං කප්පෙසී’’ති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම ත්වං, මොඝපුරිස, මාතුගාමෙන සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිසජ්ජං කප්පෙස්සසි! නෙතං, මොඝපුරිස, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –
444. ‘‘යො පන භික්ඛු මාතුගාමෙන සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිසජ්ජං කප්පෙය්‍ය, තමෙනං සද්ධෙය්‍යවචසා උපාසිකා දිස්වා තිණ්ණං ධම්මානං අඤ්ඤතරෙන වදෙය්‍ය – පාරාජිකෙන වා සඞ්ඝාදිසෙසෙන වා පාචිත්තියෙන වා, නිසජ්ජං භික්ඛු පටිජානමානො තිණ්ණං ධම්මානං අඤ්ඤතරෙන කාරෙතබ්බො – පාරාජිකෙන වා සඞ්ඝාදිසෙසෙන වා පාචිත්තියෙන වා යෙන වා සා සද්ධෙය්‍යවචසා උපාසිකා වදෙය්‍ය, තෙන සො භික්ඛු කාරෙතබ්බො. අයං ධම්මො අනියතො’’ති.
445. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.
මාතුගාමො නාම මනුස්සිත්ථී, න යක්ඛී න පෙතී න තිරච්ඡානගතා. අන්තමසො තදහුජාතාපි දාරිකා, පගෙව මහත්තරී.
සද්ධින්ති එකතො.
එකො එකායාති භික්ඛු චෙව හොති මාතුගාමො ච.
රහො නාම චක්ඛුස්ස රහො, සොතස්ස රහො. චක්ඛුස්ස රහොනාම න සක්කා හොති අක්ඛිං වා නිඛණීයමානෙ භමුකං වා උක්ඛිපීයමානෙ සීසං වා උක්ඛිපීයමානෙ පස්සිතුං. සොතස්ස රහොනාම න සක්කා හොති පකතිකථා සොතුං.
පටිච්ඡන්නං නාම ආසනං කුට්ටෙන වා [කුඩ්ඩෙන වා (සී. ස්‍යා.)] කවාටෙන වා කිලඤ්ජෙන වා සාණිපාකාරෙන වා රුක්ඛෙන වා ථම්භෙන වා කොත්ථළියා වා යෙන කෙනචි පටිච්ඡන්නං හොති.
අලංකම්මනියෙති සක්කා හොති මෙථුනං ධම්මං පටිසෙවිතුං.
නිසජ්ජං කප්පෙය්‍යාති මාතුගාමෙ නිසින්නෙ භික්ඛු උපනිසින්නො වා හොති උපනිපන්නො වා. භික්ඛු නිසින්නෙ මාතුගාමො උපනිසින්නො වා හොති උපනිපන්නො වා. උභො වා නිසින්නා හොන්ති උභො වා නිපන්නා.
සද්ධෙය්‍යවචසා නාම ආගතඵලා අභිසමෙතාවිනී විඤ්ඤාතසාසනා.
උපාසිකා නාම බුද්ධං සරණං ගතා, ධම්මං සරණං ගතා, සඞ්ඝං සරණං ගතා.
දිස්වාති පස්සිත්වා.
තිණ්ණං ධම්මානං අඤ්ඤතරෙන වදෙය්‍ය – පාරාජිකෙන වා සඞ්ඝාදිසෙසෙන වා පාචිත්තියෙන වා. නිසජ්ජං භික්ඛු පටිජානමානො තිණ්ණං ධම්මානං අඤ්ඤතරෙන කාරෙතබ්බො – පාරාජිකෙන වා සඞ්ඝාදිසෙසෙන වා පාචිත්තියෙන වා. යෙන වා සා සද්ධෙය්‍යවචසා උපාසිකා වදෙය්‍ය තෙන සො භික්ඛු කාරෙතබ්බො.
446. සා චෙ එවං වදෙය්‍ය – ‘‘අය්‍යො මයා දිට්ඨො නිසින්නො මාතුගාමස්ස මෙථුනං ධම්මං පටිසෙවන්තො’’ති, සො ච තං පටිජානාති, ආපත්තියා කාරෙතබ්බො. සා චෙ එවං වදෙය්‍ය – ‘‘අය්‍යො මයා දිට්ඨො නිසින්නො මාතුගාමස්ස මෙථුනං ධම්මං පටිසෙවන්තො’’ති, සො චෙ එවං වදෙය්‍ය – ‘‘සච්චාහං නිසින්නො, නො ච ඛො මෙථුනං ධම්මං පටිසෙවි’’න්ති, නිසජ්ජාය කාරෙතබ්බො. සා චෙ එවං වදෙය්‍ය – ‘‘අය්‍යො මයා දිට්ඨො නිසින්නො මාතුගාමස්ස මෙථුනං ධම්මං පටිසෙවන්තො’’ති, සො චෙ එවං වදෙය්‍ය – ‘‘නාහං නිසින්නො, අපිච ඛො නිපන්නො’’ති, නිපජ්ජාය කාරෙතබ්බො. සා චෙ එවං වදෙය්‍ය – ‘‘අය්‍යො මයා දිට්ඨො නිසින්නො මාතුගාමස්ස මෙථුනං ධම්මං පටිසෙවන්තො’’ති, සො චෙ එවං වදෙය්‍ය – ‘‘නාහං නිසින්නො අපිච ඛො ඨිතො’’ති, න කාරෙතබ්බො.
447. සා චෙ එවං වදෙය්‍ය – ‘‘අය්‍යො මයා දිට්ඨො නිපන්නො මාතුගාමස්ස මෙථුනං ධම්මං පටිසෙවන්තො’’ති, සො ච තං පටිජානාති, ආපත්තියා කාරෙතබ්බො. සා චෙ එවං වදෙය්‍ය – ‘‘අය්‍යො මයා දිට්ඨො නිපන්නො මාතුගාමස්ස මෙථුනං ධම්මං පටිසෙවන්තො’’ති, සො චෙ එවං වදෙය්‍ය – ‘‘සච්චාහං නිපන්නො, නො ච ඛො මෙථුනං ධම්මං පටිසෙවි’’න්ති, නිපජ්ජාය කාරෙතබ්බො. සා චෙ එවං වදෙය්‍ය – ‘‘අය්‍යො මයා දිට්ඨො නිපන්නො මාතුගාමස්ස මෙථුනං ධම්මං පටිසෙවන්තො’’ති, සො චෙ එවං වදෙය්‍ය – ‘‘නාහං නිපන්නො, අපිච ඛො නිසින්නො’’ති, නිසජ්ජාය කාරෙතබ්බො. සා චෙ එවං වදෙය්‍ය – ‘‘අය්‍යො මයා දිට්ඨො නිපන්නො මාතුගාමස්ස මෙථුනං ධම්මං පටිසෙවන්තො’’ති, සො චෙ එවං වදෙය්‍ය – ‘‘නාහං නිපන්නො අපිච ඛො ඨිතො’’ති, න කාරෙතබ්බො.
448. සා චෙ එවං වදෙය්‍ය – ‘‘අය්‍යො මයා දිට්ඨො නිසින්නො මාතුගාමෙන සද්ධිං කායසංසග්ගං සමාපජ්ජන්තො’’ති, සො ච තං පටිජානාති, ආපත්තියා කාරෙතබ්බො…පෙ… සච්චාහං නිසින්නො නො ච ඛො කායසංසග්ගං සමාපජ්ජින්ති, නිසජ්ජාය කාරෙතබ්බො…පෙ… නාහං නිසින්නො අපිච ඛො නිපන්නොති, නිපජ්ජාය කාරෙතබ්බො…පෙ… නාහං නිසින්නො අපිච ඛො ඨිතොති, න කාරෙතබ්බො.
සා චෙ එවං වදෙය්‍ය – ‘‘අය්‍යො මයා දිට්ඨො නිපන්නො මාතුගාමෙන සද්ධිං කායසංසග්ගං සමාපජ්ජන්තො’’ති, සො ච තං පටිජානාති, ආපත්තියා කාරෙතබ්බො…පෙ… සච්චාහං නිපන්නො, නො ච ඛො කායසංසග්ගං සමාපජ්ජින්ති, නිපජ්ජාය කාරෙතබ්බො…පෙ… නාහං නිපන්නො, අපිච ඛො නිසින්නොති, නිසජ්ජාය කාරෙතබ්බො…පෙ… නාහං නිපන්නො, අපිච ඛො ඨිතොති, න කාරෙතබ්බො.
449. සා චෙ එවං වදෙය්‍ය – ‘‘අය්‍යො මයා දිට්ඨො මාතුගාමෙන සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිසින්නො’’ති, සො ච තං පටිජානාති, නිසජ්ජාය කාරෙතබ්බො…පෙ… නාහං නිසින්නො අපිච ඛො නිපන්නොති, නිපජ්ජාය කාරෙතබ්බො…පෙ… නාහං නිසින්නො, අපිච ඛො ඨිතොති, න කාරෙතබ්බො.
450. සා චෙ එවං වදෙය්‍ය – ‘‘අය්‍යො මයා දිට්ඨො මාතුගාමෙන සද්ධිං එකො එකාය රහො පටිච්ඡන්නෙ ආසනෙ අලංකම්මනියෙ නිපන්නො’’ති, සො ච තං පටිජානාති, නිපජ්ජාය කාරෙතබ්බො…පෙ… නාහං නිපන්නො, අපිච ඛො නිසින්නොති, නිසජ්ජාය කාරෙතබ්බො…පෙ… නාහං නිපන්නො, අපිච ඛො ඨිතොති, න කාරෙතබ්බො.
අනියතොති න නියතො, පාරාජිකං වා සඞ්ඝාදිසෙසො වා පාචිත්තියං වා.
451. ගමනං පටිජානාති, නිසජ්ජං පටිජානාති, ආපත්තිං පටිජානාති, ආපත්තියා කාරෙතබ්බො. ගමනං පටිජානාති, නිසජ්ජං න පටිජානාති, ආපත්තිං පටිජානාති, ආපත්තියා කාරෙතබ්බො. ගමනං පටිජානාති, නිසජ්ජං පටිජානාති, ආපත්තිං න පටිජානාති, නිසජ්ජාය කාරෙතබ්බො. ගමනං පටිජානාති, නිසජ්ජං න පටිජානාති, ආපත්තිං න පටිජානාති, න කාරෙතබ්බො.
ගමනං න පටිජානාති, නිසජ්ජං පටිජානාති, ආපත්තිං පටිජානාති, ආපත්තියා
කාරෙතබ්බො. ගමනං න පටිජානාති, නිසජ්ජං න පටිජානාති, ආපත්තිං පටිජානාති, ආපත්තියා කාරෙතබ්බො. ගමනං න පටිජානාති, නිසජ්ජං පටිජානාති, ආපත්තිං න පටිජානාති, නිසජ්ජාය කාරෙතබ්බො. ගමනං න පටිජානාති, නිසජ්ජං න පටිජානාති, ආපත්තිං න පටිජානාති, න කාරෙතබ්බොති.
පඨමො අනියතො නිට්ඨිතො.