4. චතුත්ථපාරාජිකං

193. [ඉදං වත්ථු පාචි. 67] තෙන සමයෙන බුද්ධො භගවා වෙසාලියං විහරති මහාවනෙ කූටාගාරසාලායං. තෙන ඛො පන සමයෙන සම්බහුලා සන්දිට්ඨා සම්භත්තා භික්ඛූ වග්ගුමුදාය නදියා තීරෙ වස්සං උපගච්ඡිංසු. තෙන ඛො පන සමයෙන වජ්ජී දුබ්භික්ඛා හොති ද්වීහිතිකා සෙතට්ඨිකා සලාකාවුත්තා, න සුකරා උඤ්ඡෙන පග්ගහෙන යාපෙතුං. අථ ඛො තෙසං භික්ඛූනං එතදහොසි – ‘‘එතරහි ඛො වජ්ජී දුබ්භික්ඛා ද්වීහිතිකා සෙතට්ඨිකා සලාකාවුත්තා, න සුකරා උඤ්ඡෙන පග්ගහෙන යාපෙතුං. කෙන නු ඛො මයං උපායෙන සමග්ගා සම්මොදමානා අවිවදමානා ඵාසුකං වස්සං වසෙය්‍යාම, න ච පිණ්ඩකෙන කිලමෙය්‍යාමා’’ති? එකච්චෙ එවමාහංසු – ‘‘හන්ද මයං, ආවුසො, ගිහීනං කම්මන්තං අධිට්ඨෙම, එවං තෙ අම්හාකං දාතුං මඤ්ඤිස්සන්ති. එවං මයං සමග්ගා සම්මොදමානා අවිවදමානා ඵාසුකං වස්සං වසිස්සාම, න ච පිණ්ඩකෙන කිලමිස්සාමා’’ති. එකච්චෙ එවමාහංසු – ‘‘අලං, ආවුසො, කිං ගිහීනං කම්මන්තං අධිට්ඨිතෙන! හන්ද මයං, ආවුසො, ගිහීනං දූතෙය්‍යං හරාම, එවං තෙ අම්හාකං දාතුං මඤ්ඤිස්සන්ති. එවං මයං සමග්ගා සම්මොදමානා අවිවදමානා ඵාසුකං වස්සං වසිස්සාම, න ච පිණ්ඩකෙන කිලමිස්සාමා’’ති. එකච්චෙ එවමාහංසු – ‘‘අලං, ආවුසො, කිං ගිහීනං කම්මන්තං අධිට්ඨිතෙන! කිං ගිහීනං දූතෙය්‍යං හටෙන! හන්ද මයං, ආවුසො, ගිහීනං අඤ්ඤමඤ්ඤස්ස උත්තරිමනුස්සධම්මස්ස වණ්ණං භාසිස්සාම – ‘අසුකො භික්ඛු පඨමස්ස ඣානස්ස ලාභී, අසුකො භික්ඛු දුතියස්ස ඣානස්ස ලාභී, අසුකො භික්ඛු තතියස්ස ඣානස්ස ලාභී, අසුකො භික්ඛු චතුත්ථස්ස ඣානස්ස ලාභී, අසුකො භික්ඛු සොතාපන්නො, අසුකො භික්ඛු සකදාගාමී, අසුකො භික්ඛු අනාගාමී, අසුකො භික්ඛු අරහා, අසුකො භික්ඛු තෙවිජ්ජො, අසුකො භික්ඛු ඡළභිඤ්ඤො’ති. එවං තෙ අම්හාකං දාතුං මඤ්ඤිස්සන්ති. එවං මයං සමග්ගා සම්මොදමානා අවිවදමානා ඵාසුකං වස්සං වසිස්සාම, න ච පිණ්ඩකෙන කිලමිස්සාමා’’ති. ‘‘එසොයෙව ඛො, ආවුසො, සෙය්‍යො යො අම්හාකං ගිහීනං අඤ්ඤමඤ්ඤස්ස උත්තරිමනුස්සධම්මස්ස වණ්ණො භාසිතො’’ති.

194. අථ ඛො තෙ භික්ඛූ ගිහීනං අඤ්ඤමඤ්ඤස්ස උත්තරිමනුස්සධම්මස්ස වණ්ණං භාසිංසු – ‘‘අසුකො භික්ඛු පඨමස්ස ඣානස්ස ලාභී…පෙ… අසුකො භික්ඛු ඡළභිඤ්ඤො’’ති. අථ ඛො තෙ මනුස්සා – ‘‘ලාභා වත නො, සුලද්ධං වත නො, යෙසං වත නො එවරූපා භික්ඛූ වස්සං උපගතා; න වත නො ඉතො පුබ්බෙ එවරූපා භික්ඛූ වස්සං උපගතා යථයිමෙ භික්ඛූ සීලවන්තො කල්‍යාණධම්මා’’ති, තෙ න තාදිසානි භොජනානි අත්තනා පරිභුඤ්ජන්ති මාතාපිතූනං දෙන්ති පුත්තදාරස්ස දෙන්ති දාසකම්මකරපොරිසස්ස දෙන්ති මිත්තාමච්චානං දෙන්ති ඤාතිසාලොහිතානං දෙන්ති, යාදිසානි භික්ඛූනං දෙන්ති. තෙ න තාදිසානි ඛාදනීයානි සායනීයානි පානානි අත්තනා ඛාදන්ති සායන්ති පිවන්ති මාතාපිතූනං දෙන්ති පුත්තදාරස්ස දෙන්ති දාසකම්මකරපොරිසස්ස දෙන්ති මිත්තාමච්චානං දෙන්ති ඤාතිසාලොහිතානං දෙන්ති, යාදිසානි භික්ඛූනං දෙන්ති. අථ ඛො තෙ භික්ඛූ වණ්ණවා අහෙසුං පීණින්ද්‍රියා පසන්නමුඛවණ්ණා විප්පසන්නඡවිවණ්ණා.

ආචිණ්ණං ඛො පනෙතං වස්සංවුට්ඨානං භික්ඛූනං භගවන්තං දස්සනාය උපසඞ්කමිතුං. අථ ඛො තෙ භික්ඛූ වස්සංවුට්ඨා තෙමාසච්චයෙන සෙනාසනං සංසාමෙත්වා පත්තචීවරං ආදාය යෙන වෙසාලී තෙන පක්කමිංසු. අනුපුබ්බෙන යෙන වෙසාලී මහාවනං කූටාගාරසාලා යෙන භගවා තෙනුපසඞ්කමිංසු; උපසඞ්කමිත්වා භගවන්තං අභිවාදෙත්වා එකමන්තං නිසීදිංසු.

තෙන ඛො පන සමයෙන දිසාසු වස්සංවුට්ඨා භික්ඛූ කිසා හොන්ති ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා; වග්ගුමුදාතීරියා පන භික්ඛූ වණ්ණවා හොන්ති පීණින්ද්‍රියා පසන්නමුඛවණ්ණා විප්පසන්නඡවිවණ්ණා. ආචිණ්ණං ඛො පනෙතං බුද්ධානං භගවන්තානං ආගන්තුකෙහි භික්ඛූහි සද්ධිං පටිසම්මොදිතුං. අථ ඛො භගවා වග්ගුමුදාතීරියෙ භික්ඛූ එතදවොච – ‘‘කච්චි, භික්ඛවෙ, ඛමනීයං කච්චි යාපනීයං කච්චි සමග්ගා සම්මොදමානා අවිවදමානා ඵාසුකං වස්සං වසිත්ථ න ච පිණ්ඩකෙන කිලමිත්ථා’’ති? ‘‘ඛමනීයං, භගවා, යාපනීයං, භගවා. සමග්ගා ච මයං, භන්තෙ, සම්මොදමානා අවිවදමානා ඵාසුකං වස්සං වසිම්හා, න ච පිණ්ඩකෙන කිලමිම්හා’’ති. ජානන්තාපි තථාගතා පුච්ඡන්ති, ජානන්තාපි න පුච්ඡන්ති…පෙ… ද්වීහාකාරෙහි බුද්ධා භගවන්තො භික්ඛූ පටිපුච්ඡන්ති – ධම්මං වා දෙසෙස්සාම, සාවකානං වා සික්ඛාපදං පඤ්ඤාපෙස්සාමාති. අථ ඛො භගවා වග්ගුමුදාතීරියෙ භික්ඛූ එතදවොච – ‘‘යථා කථං පන තුම්හෙ, භික්ඛවෙ, සමග්ගා සම්මොදමානා අවිවදමානා ඵාසුකං වස්සං වසිත්ථ න ච පිණ්ඩකෙන කිලමිත්ථා’’ති? අථ ඛො තෙ භික්ඛූ භගවතො එතමත්ථං ආරොචෙසුං – ‘‘කච්චි පන වො, භික්ඛවෙ, භූත’’න්ති? ‘‘අභූතං, භගවා’’ති. විගරහි බුද්ධො භගවා – ‘‘අනනුච්ඡවිකං, මොඝපුරිසා, අනනුලොමිකං අප්පතිරූපං අස්සාමණකං අකප්පියං අකරණීයං. කථඤ්හි නාම තුම්හෙ, මොඝපුරිසා, උදරස්ස කාරණා ගිහීනං අඤ්ඤමඤ්ඤස්ස උත්තරිමනුස්සධම්මස්ස වණ්ණං භාසිස්සථ! වරං තුම්හෙහි, මොඝපුරිසා, තිණ්හෙන ගොවිකන්තනෙන [ගොවිකත්තනෙන (සී. ක.)] කුච්ඡිං පරිකන්තො, න ත්වෙව උදරස්ස කාරණා ගිහීනං අඤ්ඤමඤ්ඤස්ස උත්තරිමනුස්සධම්මස්ස වණ්ණො භාසිතො! තං කිස්ස හෙතු? තතො නිදානඤ්හි, මොඝපුරිසා, මරණං වා නිගච්ඡෙය්‍ය මරණමත්තං වා දුක්ඛං, න ත්වෙව තප්පච්චයා කායස්ස භෙදා පරං මරණා අපායං දුග්ගතිං විනිපාතං නිරයං උපපජ්ජෙය. ඉතො නිදානඤ්ච ඛො, මොඝපුරිසා, කායස්ස භෙදා පරං මරණා අපායං දුග්ගතිං විනිපාතං නිරයං උපපජ්ජෙය්‍ය. නෙතං, මොඝපුරිසා, අප්පසන්නානං වා පසාදාය’’…පෙ… විගරහිත්වා ධම්මිං කථං කත්වා භික්ඛූ ආමන්තෙසි –

195. ‘‘පඤ්චිමෙ, භික්ඛවෙ, මහාචොරා සන්තො සංවිජ්ජමානා ලොකස්මිං. කතමෙ පඤ්ච? ඉධ, භික්ඛවෙ, එකච්චස්ස මහාචොරස්ස එවං හොති – ‘කුදාස්සු නාමාහං සතෙන වා සහස්සෙන වා පරිවුතො ගාමනිගමරාජධානීසු ආහිණ්ඩිස්සාමි හනන්තො ඝාතෙන්තො ඡින්දන්තො ඡෙදාපෙන්තො පචන්තො පාචෙන්තො’ති! සො අපරෙන සමයෙන සතෙන වා සහස්සෙන වා පරිවුතො ගාමනිගමරාජධානීසු ආහිණ්ඩති හනන්තො ඝාතෙන්තො ඡින්දන්තො ඡෙදාපෙන්තො පචන්තො පාචෙන්තො. එවමෙව ඛො, භික්ඛවෙ, ඉධෙකච්චස්ස පාපභික්ඛුනො එවං හොති – ‘කුදාස්සු නාමාහං සතෙන වා සහස්සෙන වා පරිවුතො ගාමනිගමරාජධානීසු චාරිකං චරිස්සාමි සක්කතො ගරුකතො මානිතො පූජිතො අපචිතො ගහට්ඨානඤ්චෙව පබ්බජිතානඤ්ච, ලාභී චීවරපිණ්ඩපාතසෙනාසනගිලානප්පච්චයභෙසජ්ජපරික්ඛාරාන’න්ති! සො අපරෙන සමයෙන සතෙන වා සහස්සෙන වා පරිවුතො ගාමනිගමරාජධානීසු චාරිකං චරති සක්කතො ගරුකතො මානිතො පූජිතො අපචිතො ගහට්ඨානඤ්චෙව පබ්බජිතානඤ්ච, ලාභී චීවරපිණ්ඩපාතසෙනාසනගිලානප්පච්චයභෙසජ්ජපරික්ඛාරානං. අයං, භික්ඛවෙ, පඨමො මහාචොරො සන්තො සංවිජ්ජමානො ලොකස්මිං.

‘‘පුන චපරං, භික්ඛවෙ, ඉධෙකච්චො පාපභික්ඛු තථාගතප්පවෙදිතං ධම්මවිනයං පරියාපුණිත්වා අත්තනො දහති. අයං, භික්ඛවෙ, දුතියො මහාචොරො සන්තො සංවිජ්ජමානො ලොකස්මිං.

‘‘පුන චපරං, භික්ඛවෙ, ඉධෙකච්චො පාපභික්ඛු සුද්ධං බ්‍රහ්මචාරිං පරිසුද්ධං බ්‍රහ්මචරියං චරන්තං අමූලකෙන අබ්‍රහ්මචරියෙන අනුද්ධංසෙති. අයං, භික්ඛවෙ, තතියො මහාචොරො සන්තො සංවිජ්ජමානො ලොකස්මිං.

‘‘පුන චපරං, භික්ඛවෙ, ඉධෙකච්චො පාපභික්ඛු යානි තානි සඞ්ඝස්ස ගරුභණ්ඩානි ගරුපරික්ඛාරානි, සෙය්‍යථිදං – ආරාමො ආරාමවත්ථු විහාරො විහාරවත්ථු මඤ්චො පීඨං භිසි බිම්බොහනං [බිම්බොහනං (සී. ස්‍යා.)] ලොහකුම්භී ලොහභාණකං ලොහවාරකො ලොහකටාහං වාසී පරසු [ඵරසු (සී. ස්‍යා.)] කුඨාරී කුදාලො නිඛාදනං වල්ලි වෙළු මුඤ්ජං පබ්බජං තිණං මත්තිකා දාරුභණ්ඩං මත්තිකාභණ්ඩං, තෙහි ගිහීං සඞ්ගණ්හාති උපලාපෙති. අයං, භික්ඛවෙ, චතුත්ථො මහාචොරො සන්තො සංවිජ්ජමානො ලොකස්මිං.

‘‘සදෙවකෙ, භික්ඛවෙ, ලොකෙ සමාරකෙ සබ්‍රහ්මකෙ සස්සමණබ්‍රාහ්මණියා පජාය සදෙවමනුස්සාය අයං අග්ගො මහාචොරො යො අසන්තං අභූතං උත්තරිමනුස්සධම්මං උල්ලපති. තං කිස්ස හෙතු? ථෙය්‍යාය වො, භික්ඛවෙ, රට්ඨපිණ්ඩො භුත්තො’’ති.

[සං. නි. 1.35] අඤ්ඤථා සන්තමත්තානං, අඤ්ඤථා යො පවෙදයෙ;

නිකච්ච කිතවස්සෙව, භුත්තං ථෙය්‍යෙන තස්ස තං.

[ධ. ප. 307 ධම්මපදෙපි] කාසාවකණ්ඨා බහවො, පාපධම්මා අසඤ්ඤතා;

පාපා පාපෙහි කම්මෙහි, නිරයං තෙ උපපජ්ජරෙ.

[ධ. ප. 307 ධම්මපදෙපි] සෙය්‍යො අයොගුළො භුත්තො, තත්තො අග්ගිසිඛූපමො;

යඤ්චෙ භුඤ්ජෙය්‍ය දුස්සීලො, රට්ඨපිණ්ඩං අසඤ්ඤතොති.

අථ ඛො භගවා තෙ වග්ගුමුදාතීරියෙ භික්ඛූ අනෙකපරියායෙන විගරහිත්වා දුබ්භරතාය දුප්පොසතාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –

‘‘යො පන භික්ඛු අනභිජානං උත්තරිමනුස්සධම්මං අත්තුපනායිකං අලමරියඤාණදස්සනං සමුදාචරෙය්‍ය – ‘ඉති ජානාමි ඉති පස්සාමී’ති, තතො අපරෙන සමයෙන සමනුග්ගාහීයමානො වා අසමනුග්ගාහීයමානො වා ආපන්නො විසුද්ධාපෙක්ඛො එවං වදෙය්‍ය – ‘අජානමෙවං, ආවුසො, අවචං ජානාමි, අපස්සං පස්සාමි. තුච්ඡං මුසා විලපි’න්ති, අයම්පි පාරාජිකො හොති අසංවාසො’’ති.

එවඤ්චිදං භගවතා භික්ඛූනං සික්ඛාපදං පඤ්ඤත්තං හොති.

196. තෙන ඛො පන සමයෙන සම්බහුලා භික්ඛූ අදිට්ඨෙ දිට්ඨසඤ්ඤිනො අපත්තෙ පත්තසඤ්ඤිනො අනධිගතෙ අධිගතසඤ්ඤිනො අසච්ඡිකතෙ සච්ඡිකතසඤ්ඤිනො අධිමානෙන අඤ්ඤං බ්‍යාකරිංසු. තෙසං අපරෙන සමයෙන රාගායපි චිත්තං නමති දොසායපි චිත්තං නමති මොහායපි චිත්තං නමති. තෙසං කුක්කුච්චං අහොසි – ‘‘භගවතා සික්ඛාපදං පඤ්ඤත්තං. මයඤ්චම්හ අදිට්ඨෙ දිට්ඨසඤ්ඤිනො අපත්තෙ පත්තසඤ්ඤිනො අනධිගතෙ අධිගතසඤ්ඤිනො අසච්ඡිකතෙ සච්ඡිකතසඤ්ඤිනො, අධිමානෙන අඤ්ඤං බ්‍යාකරිම්හා. කච්චි නු ඛො මයං පාරාජිකං ආපත්තිං ආපන්නා’’ති? තෙ ආයස්මතො ආනන්දස්ස එතමත්ථං ආරොචෙසුං. ආයස්මා ආනන්දො භගවතො එතමත්ථං ආරොචෙසි. ‘‘හොන්ති යෙ තෙ, ආනන්ද [හොන්ති යෙවානන්ද (ස්‍යා.), හොන්ති තෙ ආනන්ද (සී.)], භික්ඛූ අදිට්ඨෙ දිට්ඨසඤ්ඤිනො අපත්තෙ පත්තසඤ්ඤිනො අනධිගතෙ අධිගතසඤ්ඤිනො අසච්ඡිකතෙ සච්ඡිකතසඤ්ඤිනො අධිමානෙන අඤ්ඤං බ්‍යාකරොන්ති. තඤ්ච ඛො එතං අබ්බොහාරික’’න්ති.

‘‘එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –

197. ‘‘යො පන භික්ඛු අනභිජානං උත්තරිමනුස්සධම්මං අත්තුපනායිකං අලමරියඤාණදස්සනං සමුදාචරෙය්‍ය – ‘ඉති ජානාමි ඉති පස්සාමී’ති, තතො අපරෙන සමයෙන සමනුග්ගාහීයමානො වා අසමනුග්ගාහීයමානො වා ආපන්නො විසුද්ධාපෙක්ඛො එවං වදෙය්‍ය – ‘අජානමෙවං, ආවුසො, අවචං ජානාමි, අපස්සං පස්සාමි. තුච්ඡං මුසා විලපි’න්ති, අඤ්ඤත්‍ර අධිමානා, අයම්පි පාරාජිකො හොති අසංවාසො’’ති.

198. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.

අනභිජානන්ති අසන්තං අභූතං අසංවිජ්ජමානං අජානන්තො අපස්සන්තො අත්තනි කුසලං ධම්මං – අත්ථි මෙ කුසලො ධම්මොති.

[පාචි. 70] උත්තරිමනුස්සධම්මො නාම ඣානං විමොක්ඛො [විමොක්ඛං (සී. ස්‍යා.)] සමාධි සමාපත්ති ඤාණදස්සනං මග්ගභාවනා ඵලසච්ඡිකිරියා කිලෙසප්පහානං විනීවරණතා චිත්තස්ස සුඤ්ඤාගාරෙ අභිරති.

අත්තුපනායිකන්ති තෙ වා කුසලෙ ධම්මෙ අත්තනි උපනෙති අත්තානං වා තෙසු කුසලෙසු ධම්මෙසු උපනෙති.

ඤාණන්ති තිස්සො විජ්ජා. දස්සනන්ති යං ඤාණං තං දස්සනං. යං දස්සනං තං ඤාණං.

සමුදාචරෙය්‍යාති ආරොචෙය්‍ය ඉත්ථියා වා පුරිසස්ස වා ගහට්ඨස්ස වා පබ්බජිතස්ස වා.

ඉති ජානාමි ඉති පස්සාමීති ජානාමහං එතෙ ධම්මෙ, පස්සාමහං එතෙ ධම්මෙ අත්ථි ච එතෙ ධම්මා මයි, අහඤ්ච එතෙසු ධම්මෙසු සන්දිස්සාමීති.

තතො අපරෙන සමයෙනාති යස්මිං ඛණෙ සමුදාචිණ්ණං හොති තං ඛණං තං ලයං තං මුහුත්තං වීතිවත්තෙ.

සමනුග්ගාහීයමානොති යං වත්ථු පටිඤ්ඤාතං හොති තස්මිං වත්ථුස්මිං සමනුග්ගාහීයමානො – ‘‘කින්තෙ අධිගතං, කින්ති තෙ අධිගතං, කදා තෙ අධිගතං, කත්ථ තෙ අධිගතං, කතමෙ තෙ කිලෙසා පහීනා, කතමෙසං ත්වං ධම්මානං ලාභී’’ති.

අසමනුග්ගාහීයමානොති න කෙනචි වුච්චමානො.

ආපන්නොති පාපිච්ඡො ඉච්ඡාපකතො අසන්තං අභූතං උත්තරිමනුස්සධම්මං උල්ලපිත්වා පාරාජිකං ආපත්තිං ආපන්නො හොති.

විසුද්ධාපෙක්ඛොති ගිහී වා හොතුකාමො උපාසකො වා හොතුකාමො ආරාමිකො වා හොතුකාමො සාමණෙරො වා හොතුකාමො.

අජානමෙවං, ආවුසො, අවචං – ජානාමි, අපස්සං පස්සාමීති නාහං එතෙ ධම්මෙ ජානාමි, නාහං එතෙ ධම්මෙ පස්සාමි, නත්ථි ච එතෙ ධම්මා මයි, න චාහං එතෙසු ධම්මෙසු සන්දිස්සාමීති.

තුච්ඡං මුසා විලපින්ති තුච්ඡකං මයා භණිතං, මුසා මයා භණිතං, අභූතං මයා භණිතං, අජානන්තෙන මයා භණිතං.

අඤ්ඤත්‍ර අධිමානාති ඨපෙත්වා අධිමානං.

අයම්පීති පුරිමෙ උපාදාය වුච්චති.

පාරාජිකො හොතීති සෙය්‍යථාපි නාම තාලො මත්ථකච්ඡින්නො අභබ්බො පුන විරූළ්හියා, එවමෙව භික්ඛු පාපිච්ඡො ඉච්ඡාපකතො අසන්තං අභූතං උත්තරිමනුස්සධම්මං උල්ලපිත්වා අස්සමණො හොති අසක්‍යපුත්තියො. තෙන වුච්චති – ‘‘පාරාජිකො හොතී’’ති.

අසංවාසොති සංවාසො නාම එකකම්මං එකුද්දෙසො සමසික්ඛතා – එසො සංවාසො නාම. සො තෙන සද්ධිං නත්ථි. තෙන වුච්චති – ‘‘අසංවාසො’’ති.

199. උත්තරිමනුස්සධම්මො නාම ඣානං විමොක්ඛො සමාධි සමාපත්ති ඤාණදස්සනං මග්ගභාවනා ඵලසච්ඡිකිරියා කිලෙසප්පහානං විනීවරණතා චිත්තස්ස සුඤ්ඤාගාරෙ අභිරති.

[පාචි. 70] ඣානන්ති පඨමං ඣානං දුතියං ඣානං තතියං ඣානං චතුත්ථං ඣානං.

[පාචි. 70] විමොක්ඛොති සුඤ්ඤතො විමොක්ඛො අනිමිත්තො විමොක්ඛො අප්පණිහිතො විමොක්ඛො.

[පාචි. 70] සමාධීති සුඤ්ඤතො සමාධි අනිමිත්තො සමාධි අප්පණිහිතො සමාධි.

[පාචි. 70] සමාපත්තීති සුඤ්ඤතා සමාපත්ති අනිමිත්තා සමාපත්ති අප්පණිහිතා සමාපත්ති.

[පාචි. 70] ඤාණදස්සනන්ති තිස්සො විජ්ජා.

[පාචි. 70] මග්ගභාවනාති චත්තාරො සතිපට්ඨානා, චත්තාරො සම්මප්පධානා, චත්තාරො ඉද්ධිපාදා, පඤ්චින්ද්‍රියානි, පඤ්ච බලානි, සත්ත බොජ්ඣඞ්ගා, අරියො අට්ඨඞ්ගිකො මග්ගො.

[පාචි. 70] ඵලසච්ඡිකිරියාති සොතාපත්තිඵලස්ස සච්ඡිකිරියා, සකදාගාමිඵලස්ස සච්ඡිකිරියා, අනාගාමිඵලස්ස සච්ඡිකිරියා, අරහත්තස්ස [අරහත්තඵලස්ස (ස්‍යා.)] සච්ඡිකිරියා.

[පාචි. 70] කිලෙසප්පහානන්ති රාගස්ස පහානං දොසස්ස පහානං මොහස්ස පහානං.

[පාචි. 70] විනීවරණතා චිත්තස්සාති රාගා චිත්තං විනීවරණතා, දොසා චිත්තං විනීවරණතා, මොහා චිත්තං විනීවරණතා.

[පාචි. 70] සුඤ්ඤාගාරෙ අභිරතීති පඨමෙන ඣානෙන සුඤ්ඤාගාරෙ අභිරති, දුතියෙන ඣානෙන සුඤ්ඤාගාරෙ අභිරති, තතියෙන ඣානෙන සුඤ්ඤාගාරෙ අභිරති, චතුත්ථෙන ඣානෙන සුඤ්ඤාගාරෙ අභිරති.

200. තීහාකාරෙහි පඨමං ඣානං සමාපජ්ජින්ති සම්පජානමුසා භණන්තස්ස ආපත්ති පාරාජිකස්ස, පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති.

චතූහාකාරෙහි පඨමං ඣානං සමාපජ්ජින්ති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං.

පඤ්චහාකාරෙහි පඨමං ඣානං සමාපජ්ජින්ති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං විනිධාය ඛන්තිං.

ඡහාකාරෙහි පඨමං ඣානං සමාපජ්ජින්ති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං.

සත්තහාකාරෙහි පඨමං ඣානං සමාපජ්ජින්ති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

201. තීහාකාරෙහි පඨමං ඣානං සමාපජ්ජාමීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති.

චතූහාකාරෙහි පඨමං ඣානං සමාපජ්ජාමීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං.

පඤ්චහාකාරෙහි පඨමං ඣානං සමාපජ්ජාමීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං.

ඡහාකාරෙහි පඨමං ඣානං සමාපජ්ජාමීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං.

සත්තහාකාරෙහි පඨමං ඣානං සමාපජ්ජාමීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

202. තීහාකාරෙහි පඨමං ඣානං සමාපන්නොති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති.

චතූහාකාරෙහි පඨමං ඣානං සමාපන්නොති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං.

පඤ්චහාකාරෙහි පඨමං ඣානං සමාපන්නොති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං.

ඡහාකාරෙහි පඨමං ඣානං සමාපන්නොති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං.

සත්තහාකාරෙහි පඨමං ඣානං සමාපන්නොති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

203. තීහාකාරෙහි පඨමස්ස ඣානස්ස ලාභීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති.

චතූහාකාරෙහි පඨමස්ස ඣානස්ස ලාභීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං.

පඤ්චහාකාරෙහි පඨමස්ස ඣානස්ස ලාභීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං.

ඡහාකාරෙහි පඨමස්ස ඣානස්ස ලාභීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං.

සත්තහාකාරෙහි පඨමස්ස ඣානස්ස ලාභීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

204. තීහාකාරෙහි පඨමස්ස ඣානස්ස වසීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති.

චතූහාකාරෙහි පඨමස්ස ඣානස්ස වසීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං.

පඤ්චහාකාරෙහි පඨමස්ස ඣානස්ස වසීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං.

ඡහාකාරෙහි පඨමස්ස ඣානස්ස වසීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං.

සත්තහාකාරෙහි පඨමස්ස ඣානස්ස වසීම්හීති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

205. තීහාකාරෙහි පඨමං ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති.

චතූහාකාරෙහි පඨමං ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං.

පඤ්චහාකාරෙහි පඨමං ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං.

ඡහාකාරෙහි පඨමං ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං.

සත්තහාකාරෙහි පඨමං ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

යථා ඉදං පඨමං ඣානං විත්ථාරිතං තං සබ්බම්පි විත්ථාරෙතබ්බං.

206. තීහාකාරෙහි…පෙ… සත්තහාකාරෙහි දුතියං ඣානං…පෙ… තතියං ඣානං…පෙ… චතුත්ථං ඣානං සමාපජ්ජිං… සමාපජ්ජාමි… සමාපන්නො… චතුත්ථස්ස ඣානස්ස ලාභීම්හි… වසීම්හි… චතුත්ථං ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස. පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

207. තීහාකාරෙහි සුඤ්ඤතං විමොක්ඛං… අනිමිත්තං විමොක්ඛං… අප්පණිහිතං විමොක්ඛං… සමාපජ්ජිං… සමාපජ්ජාමි… සමාපන්නො… අප්පණිහිතස්ස විමොක්ඛස්ස ලාභීම්හි… වසීම්හි… අප්පණිහිතො විමොක්ඛො සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස…පෙ….

තීහාකාරෙහි සුඤ්ඤතං සමාධිං… අනිමිත්තං සමාධිං… අප්පණිහිතං සමාධිං සමාපජ්ජිං… සමාපජ්ජාමි… සමාපන්නො… අප්පණිහිතස්ස සමාධිස්ස ලාභීම්හි… වසීම්හි… අප්පණිහිතො සමාධි සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි සුඤ්ඤතං සමාපත්තිං… අනිමිත්තං සමාපත්තිං… අප්පණිහිතං සමාපත්තිං සමාපජ්ජිං… සමාපජ්ජාමි… සමාපන්නො… අප්පණිහිතාය සමාපත්තියා ලාභීම්හි… වසීම්හි… අප්පණිහිතා සමාපත්ති සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි තිස්සො විජ්ජා සමාපජ්ජිං… සමාපජ්ජාමි සමාපන්නො… තිස්සන්නං විජ්ජානං ලාභීම්හි… වසීම්හි… තිස්සො විජ්ජා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි චත්තාරො සතිපට්ඨානෙ… චත්තාරො සම්මප්පධානෙ… චත්තාරො ඉද්ධිපාදෙ සමාපජ්ජිං… සමාපජ්ජාමි… සමාපන්නො… චතුන්නං ඉද්ධිපාදානං ලාභීම්හි… වසීම්හි… චත්තාරො ඉද්ධිපාදා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඤ්චින්ද්‍රියානි… පඤ්ච බලානි සමාපජ්ජිං… සමාපජ්ජාමි… සමාපන්නො … පඤ්චන්නං බලානං ලාභීම්හි… වසීම්හි… පඤ්චබලානි සච්ඡිකතානි මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි සත්ත බොජ්ඣඞ්ගෙ සමාපජ්ජිං… සමාපජ්ජාමි… සමාපන්නො… සත්තන්නං බොජ්ඣඞ්ගානං ලාභීම්හි… වසීම්හි… සත්ත බොජ්ඣඞ්ගා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි අරියං අට්ඨඞ්ගිකං මග්ගං සමාපජ්ජිං… සමාපජ්ජාමි… සමාපන්නො… අරියස්ස අට්ඨඞ්ගිකස්ස මග්ගස්ස ලාභීම්හි… වසීම්හි… අරියො අට්ඨඞ්ගිකො මග්ගො සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි සොතාපත්තිඵලං… සකදාගාමිඵලං… අනාගාමිඵලං… අරහත්තං සමාපජ්ජිං… සමාපජ්ජාමි… සමාපන්නො… අරහත්තස්ස ලාභීම්හි වසීම්හි අරහත්තං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි රාගො මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතොති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි දොසො මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතොති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහො මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතොති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි රාගා මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි දොසා මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි …පෙ… සත්තහාකාරෙහි මොහා මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස – පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

සුද්ධිකං නිට්ඨිතං.

208. තීහාකාරෙහි පඨමඤ්ච ඣානං දුතියඤ්ච ඣානං සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස දුතියස්ස ච ඣානස්ස ලාභීම්හි… වසීම්හි… පඨමඤ්ච ඣානං දුතියඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස…පෙ….

තීහාකාරෙහි පඨමඤ්ච ඣානං තතියඤ්ච ඣානං සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස තතියස්ස ච ඣානස්ස ලාභීම්හි… වසීම්හි… පඨමඤ්ච ඣානං තතියඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං චතුත්ථඤ්ච ඣානං සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස චතුත්ථස්ස ච ඣානස්ස ලාභීම්හි… වසීම්හි… පඨමඤ්ච ඣානං චතුත්ථඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං සුඤ්ඤතඤ්ච විමොක්ඛං… පඨමඤ්ච ඣානං අනිමිත්තඤ්ච විමොක්ඛං… පඨමඤ්ච ඣානං අප්පණිහිතඤ්ච විමොක්ඛං සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස අප්පණිහිතස්ස ච විමොක්ඛස්ස ලාභීම්හි… වසීම්හි… පඨමඤ්ච ඣානං අප්පණිහිතො ච විමොක්ඛො සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං සුඤ්ඤතඤ්ච සමාධිං… පඨමඤ්ච ඣානං අනිමිත්තඤ්ච සමාධිං… පඨමඤ්ච ඣානං අප්පණිහිතඤ්ච සමාධිං සමාපජ්ජිං… සමාපජ්ජාමි… සමාපන්නො පඨමස්ස ච ඣානස්ස අප්පණිහිතස්ස ච සමාධිස්ස ලාභීම්හි… වසීම්හි… පඨමඤ්ච ඣානං අප්පණිහිතො ච සමාධි සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං සුඤ්ඤතඤ්ච සමාපත්තිං… පඨමඤ්ච ඣානං අනිමිත්තඤ්ච සමාපත්තිං… පඨමඤ්ච ඣානං අප්පණිහිතඤ්ච සමාපත්තිං සමාපජ්ජිං… සමාපජ්ජාමි… සමාපන්නො පඨමස්ස ච ඣානස්ස අප්පණිහිතාය ච සමාපත්තියා ලාභීම්හි… වසීම්හි… පඨමඤ්ච ඣානං අප්පණිහිතා ච සමාපත්ති සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං තිස්සො ච විජ්ජා සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස තිස්සන්නඤ්ච විජ්ජානං ලාභීම්හි… වසීම්හි… පඨමඤ්ච ඣානං තිස්සො ච විජ්ජා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං චත්තාරො ච සතිපට්ඨානෙ… පඨමඤ්ච ඣානං චත්තාරො ච සම්මප්පධානෙ… පඨමඤ්ච ඣානං චත්තාරො ච ඉද්ධිපාදෙ සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස චතුන්නඤ්ච ඉද්ධිපාදානං ලාභීම්හි… වසීම්හි… පඨමඤ්ච ඣානං චත්තාරො ච ඉද්ධිපාදා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං පඤ්ච ච ඉන්ද්‍රියානි… පඨමඤ්ච ඣානං පඤ්ච ච බලානි සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස පඤ්චන්නඤ්ච බලානං ලාභීම්හි… වසීම්හි… පඨමඤ්ච ඣානං පඤ්ච ච බලානි සච්ඡිකතානි මයාති සම්පජානමුසා භණන්තස්ස ආපත්ති පාරාජිකස්ස.

209. තීහාකාරෙහි පඨමඤ්ච ඣානං සත්ත ච බොජ්ඣඞ්ගෙ සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස සත්තන්නඤ්ච බොජ්ඣඞ්ගානං ලාභීම්හි… වසීම්හි… පඨමඤ්ච ඣානං සත්ත ච බොජ්ඣඞ්ගා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං අරියඤ්ච අට්ඨඞ්ගිකං මග්ගං සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස අරියස්ස ච අට්ඨඞ්ගිකස්ස මග්ගස්ස ලාභීම්හි වසීම්හි… පඨමඤ්ච ඣානං අරියො ච අට්ඨඞ්ගිකො මග්ගො සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං සොතාපත්තිඵලඤ්ච… පඨමඤ්ච ඣානං සකදාගාමිඵලඤ්ච… පඨමඤ්ච ඣානං අනාගාමිඵලඤ්ච… පඨමඤ්ච ඣානං අරහත්තඤ්ච සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස අරහත්තස්ස ච ලාභීම්හි… වසීම්හි… පඨමඤ්ච ඣානං අරහත්තඤ්ච සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි පඨමඤ්ච ඣානං සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස ලාභීම්හි… වසීම්හි… පඨමඤ්ච ඣානං සච්ඡිකතං මයා, රාගො ච මෙ චත්තො… දොසො ච මෙ චත්තො… මොහො ච මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතොති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි…පෙ… සත්තහාකාරෙහි පඨමඤ්ච ඣානං සමාපජ්ජිං… සමාපජ්ජාමි… සමාපන්නො… පඨමස්ස ච ඣානස්ස ලාභීම්හි… වසීම්හි… පඨමඤ්ච ඣානං සච්ඡිකතං මයා, රාගා ච මෙ චිත්තං විනීවරණං… දොසා ච මෙ චිත්තං විනීවරණං… මොහා ච මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස. පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

ඛණ්ඩචක්කං නිට්ඨිතං.

210. තීහාකාරෙහි දුතියඤ්ච ඣානං තතියඤ්ච ඣානං සමාපජ්ජිං… සමාපජ්ජාමි… සමාපන්නො… දුතියස්ස ච ඣානස්ස තතියස්ස ච ඣානස්ස ලාභීම්හි… වසීම්හි… දුතියඤ්ච ඣානං තතියඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි දුතියඤ්ච ඣානං චතුත්ථඤ්ච ඣානං සමාපජ්ජිං… සමාපජ්ජාමි… සමාපන්නො… දුතියස්ස ච ඣානස්ස චතුත්ථස්ස ච ඣානස්ස ලාභීම්හි… වසීම්හි… දුතියඤ්ච ඣානං චතුත්ථඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි දුතියඤ්ච ඣානං සුඤ්ඤතඤ්ච විමොක්ඛං… අනිමිත්තඤ්ච විමොක්ඛං… අප්පණිහිතඤ්ච විමොක්ඛං… සුඤ්ඤතඤ්ච සමාධිං… අනිමිත්තඤ්ච සමාධිං… අප්පණිහිතඤ්ච සමාධිං… සුඤ්ඤතඤ්ච සමාපත්තිං… අනිමිත්තඤ්ච සමාපත්තිං… අප්පණිහිතඤ්ච සමාපත්තිං… තිස්සො ච විජ්ජා… චත්තාරො ච සතිපට්ඨානෙ… චත්තාරො ච සම්මප්පධානෙ… චත්තාරො ච ඉද්ධිපාදෙ… පඤ්ච ච ඉන්ද්‍රියානි… පඤ්ච ච බලානි… සත්ත ච බොජ්ඣඞ්ගෙ… අරියඤ්ච අට්ඨඞ්ගිකං මග්ගං… සොතාපත්තිඵලඤ්ච… සකදාගාමිඵලඤ්ච… අනාගාමිඵලඤ්ච… අරහත්තඤ්ච සමාපජ්ජිං… සමාපජ්ජාමි… සමාපන්නො… දුතියස්ස ච ඣානස්ස අරහත්තස්ස ච ලාභීම්හි… වසීම්හි… දුතියඤ්ච ඣානං අරහත්තඤ්ච සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි දුතියඤ්ච ඣානං සමාපජ්ජිං… සමාපජ්ජාමි… සමාපන්නො… දුතියස්ස ච ඣානස්ස ලාභීම්හි… වසීම්හි… දුතියඤ්ච ඣානං සච්ඡිකතං මයා, රාගො ච මෙ චත්තො… දොසො ච මෙ චත්තො… මොහො ච මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතො. රාගා ච මෙ චිත්තං විනීවරණං… දොසා ච මෙ චිත්තං විනීවරණං… මොහා ච මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි …පෙ… සත්තහාකාරෙහි දුතියඤ්ච ඣානං පඨමඤ්ච ඣානං සමාපජ්ජිං… සමාපජ්ජාමි… සමාපන්නො… දුතියස්ස ච ඣානස්ස පඨමස්ස ච ඣානස්ස ලාභීම්හි… වසීම්හි… දුතියඤ්ච ඣානං පඨමඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස…පෙ… විනිධාය භාවං.

බද්ධචක්කං.

එවං එකෙකං මූලං කාතුන බද්ධචක්කං පරිවත්තකං කත්තබ්බං.

ඉදං සංඛිත්තං.

211. තීහාකාරෙහි තතියඤ්ච ඣානං චතුත්ථඤ්ච ඣානං…පෙ… තතියඤ්ච ඣානං අරහත්තඤ්ච සමාපජ්ජිං… සමාපජ්ජාමි… සමාපන්නො… තතියස්ස ච ඣානස්ස අරහත්තස්ස ච ලාභීම්හි… වසීම්හි… තතියඤ්ච ඣානං අරහත්තඤ්ච සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි තතියඤ්ච ඣානං සමාපජ්ජිං… සමාපජ්ජාමි… සමාපන්නො… තතියස්ස ච ඣානස්ස ලාභීම්හි… වසීම්හි… තතියඤ්ච ඣානං සච්ඡිකතං මයා, රාගො ච මෙ චත්තො… දොසො ච මෙ චත්තො… මොහො ච මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතො. රාගා ච මෙ චිත්තං විනීවරණං… දොසා ච මෙ චිත්තං විනීවරණං… මොහා ච මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි තතියඤ්ච ඣානං පඨමඤ්ච ඣානං… තතියඤ්ච ඣානං දුතියඤ්ච ඣානං සමාපජ්ජිං… සමාපජ්ජාමි… සමාපන්නො… තතියස්ස ච ඣානස්ස දුතියස්ස ච ඣානස්ස ලාභීම්හි… වසීම්හි… තතියඤ්ච ඣානං දුතියඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීකාරෙහි මොහා ච මෙ චිත්තං විනීවරණං පඨමඤ්ච ඣානං…පෙ… දුතියඤ්ච ඣානං… තතියඤ්ච ඣානං… චතුත්ථඤ්ච ඣානං සමාපජ්ජිං සමාපජ්ජාමි… සමාපන්නො… මොහා ච මෙ චිත්තං විනීවරණං චතුත්ථස්ස ච ඣානස්ස ලාභීම්හි… වසීම්හි… මොහා ච මෙ චිත්තං විනීවරණං චතුත්ථඤ්ච ඣානං සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

212. තීහාකාරෙහි මොහා ච මෙ චිත්තං විනීවරණං සුඤ්ඤතඤ්ච විමොක්ඛං… අනිමිත්තඤ්ච විමොක්ඛං… අප්පණිහිතඤ්ච විමොක්ඛං සමාපජ්ජිං… සමාපජ්ජාමි… සමාපන්නො… මොහා ච මෙ චිත්තං විනීවරණං අප්පණිහිතස්ස ච විමොක්ඛස්ස ලාභීම්හි… වසීම්හි… මොහා ච මෙ චිත්තං විනීවරණං අප්පණිහිතො ච විමොක්ඛො සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං සුඤ්ඤතඤ්ච සමාධිං… අනිමිත්තඤ්ච සමාධිං… අප්පණිහිතඤ්ච සමාධිං සමාපජ්ජිං… සමාපජ්ජාමි… සමාපන්නො… මොහා ච මෙ චිත්තං විනීවරණං අප්පණිහිතස්ස ච සමාධිස්ස ලාභීම්හි… වසීම්හි… මොහා ච මෙ චිත්තං විනීවරණං අප්පණිහිතො ච සමාධි සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං සුඤ්ඤතඤ්ච සමාපත්තිං… අනිමිත්තඤ්ච සමාපත්තිං… අප්පණිහිතඤ්ච සමාපත්තිං සමාපජ්ජිං සමාපජ්ජාමි… සමාපන්නො… මොහා ච මෙ චිත්තං විනීවරණං අප්පණිහිතාය ච සමාපත්තියා ලාභීම්හි… වසීම්හි… මොහා ච මෙ චිත්තං විනීවරණං අප්පණිහිතා ච සමාපත්ති සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං තිස්සො ච විජ්ජා සමාපජ්ජිං… සමාපජ්ජාමි… සමාපන්නො… ‘මොහා ච මෙ චිත්තං විනීවරණං තිස්සන්නඤ්ච විජ්ජානං ලාභීම්හි… වසීම්හි… මොහා ච මෙ චිත්තං විනීවරණං තිස්සො ච විජ්ජා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං චත්තාරො ච සතිපට්ඨානෙ… චත්තාරො ච සම්මප්පධානෙ… චත්තාරො ච ඉද්ධිපාදෙ සමාපජ්ජිං… සමාපජ්ජාමි… සමාපන්නො… මොහා ච මෙ චිත්තං විනීවරණං චතුන්නඤ්ච ඉද්ධිපාදානං ලාභීම්හි… වසීම්හි… මොහා ච මෙ චිත්තං විනීවරණං චත්තාරො ච ඉද්ධිපාදා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

213. තීහාකාරෙහි මොහා ච මෙ චිත්තං විනීවරණං පඤ්ච ච ඉන්ද්‍රියානි… පඤ්ච ච බලානි සමාපජ්ජිං… සමාපජ්ජාමි… සමාපන්නො… මොහා ච මෙ චිත්තං විනීවරණං පඤ්චන්නඤ්ච බලානං ලාභීම්හි… වසීම්හි… මොහා ච මෙ චිත්තං විනීවරණං පඤ්ච ච බලානි සච්ඡිකතානි මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං සත්ත ච බොජ්ඣඞ්ගෙ සමාපජ්ජිං… සමාපජ්ජාමි… සමාපන්නො… මොහා ච මෙ චිත්තං විනීවරණං සත්තන්නඤ්ච බොජ්ඣඞ්ගානං ලාභීම්හි … වසීම්හි… මොහා ච මෙ චිත්තං විනීවරණං සත්ත ච බොජ්ඣඞ්ගා සච්ඡිකතා මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං අරියඤ්ච අට්ඨඞ්ගිකං මග්ගං සමාපජ්ජිං… සමාපජ්ජාමි… සමාපන්නො… මොහා ච මෙ චිත්තං විනීවරණං අරියස්ස ච අට්ඨඞ්ගිකස්ස මග්ගස්ස ලාභීම්හි… වසීම්හි… මොහා ච මෙ චිත්තං විනීවරණං අරියො ච අට්ඨඞ්ගිකො මග්ගො සච්ඡිකතො මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං සොතාපත්තිඵලඤ්ච… සකදාගාමිඵලඤ්ච… අනාගාමිඵලඤ්ච… අරහත්තඤ්ච සමාපජ්ජිං… සමාපජ්ජාමි… සමාපන්නො… මොහා ච මෙ චිත්තං විනීවරණං අරහත්තස්ස ච ලාභීම්හි… වසීම්හි… මොහා ච මෙ චිත්තං විනීවරණං අරහත්තඤ්ච සච්ඡිකතං මයාති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි මොහා ච මෙ චිත්තං විනීවරණං, රාගො ච මෙ චත්තො… දොසො ච මෙ චත්තො… මොහො ච මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතොති සම්පජානමුසා භණන්තස්ස ආපත්ති පාරාජිකස්ස.

තීහාකාරෙහි…පෙ… සත්තහාකාරෙහි මොහා ච මෙ චිත්තං විනීවරණං රාගා ච මෙ චිත්තං විනීවරණං… දොසා ච මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

එකමූලකං නිට්ඨිතං. [එකමූලකං සඞ්ඛිත්තං නිට්ඨිතං (ස්‍යා.)]

යථා එකමූලකං විත්ථාරිතං එවමෙව දුමූලකාදිපි විත්ථාරෙතබ්බං.

ඉදං සබ්බමූලකං

214. තීහාකාරෙහි …පෙ… සත්තහාකාරෙහි පඨමඤ්ච ඣානං දුතියඤ්ච ඣානං තතියඤ්ච ඣානං චතුත්ථඤ්ච ඣානං සුඤ්ඤතඤ්ච විමොක්ඛං අනිමිත්තඤ්ච විමොක්ඛං අප්පණිහිතඤ්ච විමොක්ඛං සුඤ්ඤතඤ්ච සමාධිං අනිමිත්තඤ්ච සමාධිං අප්පණිහිතඤ්ච සමාධිං සුඤ්ඤතඤ්ච සමාපත්තිං අනිමිත්තඤ්ච සමාපත්තිං අප්පණිහිතඤ්ච සමාපත්තිං තිස්සො ච විජ්ජා චත්තාරො ච සතිපට්ඨානෙ චත්තාරො ච සම්මප්පධානෙ චත්තාරො ච ඉද්ධිපාදෙ පඤ්ච ච ඉන්ද්‍රියානි පඤ්ච ච බලානි සත්ත ච බොජ්ඣඞ්ගෙ අරියඤ්ච අට්ඨඞ්ගිකං මග්ගං සොතාපත්තිඵලඤ්ච සකදාගාමිඵලඤ්ච අනාගාමිඵලඤ්ච අරහත්තඤ්ච සමාපජ්ජිං… සමාපජ්ජාමි… සමාපන්නො…පෙ… රාගො ච මෙ චත්තො, දොසො ච මෙ චත්තො, මොහො ච මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතො. රාගා ච මෙ චිත්තං විනීවරණං, දොසා ච මෙ චිත්තං විනීවරණං, මොහා ච මෙ චිත්තං විනීවරණන්ති සම්පජානමුසා භණන්තස්ස ආපත්ති පාරාජිකස්ස. පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

සබ්බමූලකං නිට්ඨිතං.

සුද්ධිකවාරකථා නිට්ඨිතා.

215. තීහාකාරෙහි පඨමං ඣානං සමාපජ්ජින්ති වත්තුකාමො දුතියං ඣානං සමාපජ්ජින්ති සම්පජානමුසා භණන්තස්ස පටිවිජානන්තස්ස ආපත්ති පාරාජිකස්ස; න පටිවිජානන්තස්ස ආපත්ති ථුල්ලච්චයස්ස.

තීහාකාරෙහි පඨමං ඣානං සමාපජ්ජින්ති වත්තුකාමො තතියං ඣානං සමාපජ්ජින්ති සම්පජානමුසා භණන්තස්ස පටිවිජානන්තස්ස ආපත්ති පාරාජිකස්ස; න පටිවිජානන්තස්ස ආපත්ති ථුල්ලච්චයස්ස.

තීහාකාරෙහි පඨමං ඣානං සමාපජ්ජින්ති වත්තුකාමො චතුත්ථං ඣානං සමාපජ්ජින්ති සම්පජානමුසා භණන්තස්ස පටිවිජානන්තස්ස ආපත්ති පාරාජිකස්ස; න පටිවිජානන්තස්ස ආපත්ති ථුල්ලච්චයස්ස.

තීහාකාරෙහි …පෙ… සත්තහාකාරෙහි පඨමං ඣානං සමාපජ්ජින්ති වත්තුකාමො සුඤ්ඤතං විමොක්ඛං… අනිමිත්තං විමොක්ඛං… අප්පණිහිතං විමොක්ඛං… සුඤ්ඤතං සමාධිං… අනිමිත්තං සමාධිං… අප්පණිහිතං සමාධිං… සුඤ්ඤතං සමාපත්තිං… අනිමිත්තං සමාපත්තිං… අප්පණිහිතං සමාපත්තිං… තිස්සො විජ්ජා… චත්තාරො සතිපට්ඨානෙ… චත්තාරො සම්මප්පධානෙ… චත්තාරො ඉද්ධිපාදෙ… පඤ්චින්ද්‍රියානි… පඤ්ච බලානි… සත්ත බොජ්ඣඞ්ගෙ… අරියං අට්ඨඞ්ගිකං මග්ගං… සොතාපත්තිඵලං… සකදාගාමිඵලං… අනාගාමිඵලං… අරහත්තං සමාපජ්ජිං…පෙ… රාගො මෙ චත්තො… දොසො මෙ චත්තො… මොහො මෙ චත්තො වන්තො මුත්තො පහීනො පටිනිස්සට්ඨො උක්ඛෙටිතො සමුක්ඛෙටිතො. රාගා මෙ චිත්තං විනීවරණං… දොසා මෙ චිත්තං විනීවරණං… මොහා මෙ චිත්තං විනීවරණන්ති සම්පජානමුසා භණන්තස්ස පටිවිජානන්තස්ස ආපත්ති පාරාජිකස්ස; න පටිවිජානන්තස්ස ආපත්ති ථුල්ලච්චයස්ස. පුබ්බෙවස්ස හොති මුසා භණිස්සන්ති, භණන්තස්ස හොති මුසා භණාමීති, භණිතස්ස හොති මුසා මයා භණිතන්ති, විනිධාය දිට්ඨිං, විනිධාය ඛන්තිං, විනිධාය රුචිං, විනිධාය භාවං.

වත්ථුවිසාරකස්ස එකමූලකස්ස ඛණ්ඩචක්කං නිට්ඨිතං.

216. තීහාකාරෙහි දුතියං ඣානං සමාපජ්ජින්ති වත්තුකාමො තතියං ඣානං සමාපජ්ජින්ති සම්පජානමුසා භණන්තස්ස පටිවිජානන්තස්ස ආපත්ති පාරාජිකස්ස; න පටිවිජානන්තස්ස ආපත්ති ථුල්ලච්චයස්ස.

තීහාකාරෙහි දුතියං ඣානං සමාපජ්ජින්ති වත්තුකාමො චතුත්ථං ඣානං සමාපජ්ජින්ති…පෙ… මොහා ච මෙ චිත්තං විනීවරණන්ති සම්පජානමුසා භණන්තස්ස පටිවිජානන්තස්ස ආපත්ති පාරාජිකස්ස; න පටිවිජානන්තස්ස ආපත්ති ථුල්ලච්චයස්ස.