10. නන්දසික්ඛාපදං

547. තෙන සමයෙන බුද්ධො භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ආයස්මා නන්දො භගවතො මාතුච්ඡාපුත්තො අභිරූපො හොති දස්සනීයො පාසාදිකො චතුරඞ්ගුලොමකො භගවතා [භගවතො (ක.)]. සො සුගතචීවරප්පමාණං චීවරං ධාරෙති. අද්දසංසු ඛො ථෙරා භික්ඛූ ආයස්මන්තං නන්දං දූරතොව ආගච්ඡන්තං. දිස්වාන – ‘‘භගවා ආගච්ඡතී’’ති ආසනා වුට්ඨහන්ති. තෙ උපගතෙ ජානිත්වා [උපගතං සඤ්ජානිත්වා (ස්‍යා.), උපගතෙ සඤ්ජානිත්වා (සී.)] උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ආයස්මා නන්දො සුගතචීවරප්පමාණං චීවරං ධාරෙස්සතී’’ති…පෙ… සච්චං කිර ත්වං, නන්ද, සුගතචීවරප්පමාණං චීවරං ධාරෙසීති? ‘‘සච්චං, භගවා’’ති. විගරහි බුද්ධො භගවා…පෙ… කථඤ්හි නාම ත්වං, නන්ද, සුගතචීවරප්පමාණං චීවරං ධාරෙස්සසි! නෙතං, නන්ද, අප්පසන්නානං වා පසාදාය…පෙ… එවඤ්ච පන, භික්ඛවෙ, ඉමං සික්ඛාපදං උද්දිසෙය්‍යාථ –

548. ‘‘යො පන භික්ඛු සුගතචීවරප්පමාණං චීවරං කාරාපෙය්‍ය අතිරෙකං වා, ඡෙදනකං පාචිත්තියං. තත්‍රිදං සුගතස්ස සුගතචීවරප්පමාණං – දීඝසො නව විදත්ථියො, සුගතවිදත්ථියා; තිරියං ඡ විදත්ථියො. ඉදං සුගතස්ස සුගතචීවරප්පමාණ’’න්ති.

549. යො පනාති යො යාදිසො…පෙ… භික්ඛූති…පෙ… අයං ඉමස්මිං අත්ථෙ අධිප්පෙතො භික්ඛූති.

සුගතචීවරප්පමාණං [සුගතචීවරං (ක.)] නාම දීඝසො නව විදත්ථියො, සුගතවිදත්ථියා; තිරියං ඡ විදත්ථියො.

කාරාපෙය්‍යාති කරොති වා කාරාපෙති වා, පයොගෙ දුක්කටං. පටිලාභෙන ඡින්දිත්වා පාචිත්තියං දෙසෙතබ්බං.

550. අත්තනා විප්පකතං අත්තනා පරියොසාපෙති, ආපත්ති පාචිත්තියස්ස. අත්තනා විප්පකතං පරෙහි පරියොසාපෙති, ආපත්ති පාචිත්තියස්ස. පරෙහි විප්පකතං අත්තනා පරියොසාපෙති, ආපත්ති පාචිත්තියස්ස. පරෙහි විප්පකතං පරෙහි පරියොසාපෙති, ආපත්ති පාචිත්තියස්ස.

අඤ්ඤස්සත්ථාය කරොති වා කාරාපෙති වා, ආපත්ති දුක්කටස්ස. අඤ්ඤෙන කතං පටිලභිත්වා පරිභුඤ්ජති, ආපත්ති දුක්කටස්ස.

551. අනාපත්ති ඌනකං කරොති, අඤ්ඤෙන කතං පටිලභිත්වා ඡින්දිත්වා පරිභුඤ්ජති, විතානං වා භූමත්ථරණං වා සාණිපාකාරං වා භිසිං වා බිබ්බොහනං වා කරොති, උම්මත්තකස්ස, ආදිකම්මිකස්සාති.

නන්දසික්ඛාපදං නිට්ඨිතං දසමං.

රතනවග්ගො [රාජවග්ගො (සී.)] නවමො.

තස්සුද්දානං –

රඤ්ඤො ච රතනං සන්තං, සූචි මඤ්චඤ්ච තූලිකං;

නිසීදනඤ්ච කණ්ඩුඤ්ච, වස්සිකා සුගතෙන චාති.

උද්දිට්ඨා ඛො, ආයස්මන්තො, ද්වෙනවුති පාචිත්තියා ධම්මා. තත්ථායස්මන්තෙ පුච්ඡාමි – ‘‘කච්චිත්ථ පරිසුද්ධා’’? දුතියම්පි පුච්ඡාමි – ‘‘කච්චිත්ථ පරිසුද්ධා’’? තතියම්පි පුච්ඡාමි – ‘‘කච්චිත්ථ පරිසුද්ධා’’? පරිසුද්ධෙත්ථායස්මන්තො, තස්මා තුණ්හී, එවමෙතං ධාරයාමීති.

ඛුද්දකං සමත්තං.

පාචිත්තියකණ්ඩං නිට්ඨිතං.