240. අධම්මකම්මාදිකථා

397. ඉධ පන, භික්ඛවෙ, භික්ඛුස්ස න හොති ආපත්ති දට්ඨබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්ති’’න්ති? සො එවං වදෙති – ‘‘නත්ථි මෙ, ආවුසො, ආපත්ති, යමහං පස්සෙය්‍ය’’න්ති. තං සඞ්ඝො ආපත්තියා අදස්සනෙ උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස න හොති ආපත්ති පටිකාතබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පටිකරොහි තං ආපත්ති’’න්ති. සො එවං වදෙති – ‘‘නත්ථි මෙ, ආවුසො, ආපත්ති, යමයං පටිකරෙය්‍ය’’න්ති. තං සඞ්ඝො ආපත්තියා අප්පටිකම්මෙ උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස න හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘පාපිකා තෙ, ආවුසො, දිට්ඨි, පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘නත්ථි මෙ, ආවුසො, පාපිකා දිට්ඨි, යමහං පටිනිස්සජ්ජෙය්‍ය’’න්ති. තං සඞ්ඝො පාපිකාය දිට්ඨියා අප්පටිනිස්සග්ගෙ උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස න හොති ආපත්ති දට්ඨබ්බා, න හොති ආපත්ති පටිකාතබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්ති? පටිකරොහි තං ආපත්ති’’න්ති. සො එවං වදෙති – ‘‘නත්ථි මෙ, ආවුසො, ආපත්ති, යමහං පස්සෙය්‍යං. නත්ථි මෙ, ආවුසො, ආපත්ති, යමහං පටිකරෙය්‍ය’’න්ති. තං සඞ්ඝො අදස්සනෙ වා අප්පටිකම්මෙ වා උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස න හොති ආපත්ති දට්ඨබ්බා, න හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්තිං? පාපිකා තෙ දිට්ඨි, පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘නත්ථි මෙ, ආවුසො, ආපත්ති, යමහං පස්සෙය්‍යං; නත්ථි මෙ, ආවුසො, පාපිකා දිට්ඨි, යමහං පටිනිස්සජ්ජෙය්‍ය’’න්ති. තං සඞ්ඝො අදස්සනෙ වා අප්පටිනිස්සග්ගෙ වා උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස න හොති ආපත්ති පටිකාතබ්බා, න හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පටිකරොහි තං ආපත්තිං; පාපිකා තෙ දිට්ඨි, පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘නත්ථි මෙ, ආවුසො, ආපත්ති, යමහං පටිකරෙය්‍යං. නත්ථි මෙ, ආවුසො, පාපිකා දිට්ඨි, යමහං පටිනිස්සජ්ජෙය්‍ය’’න්ති. තං සඞ්ඝො අප්පටිකම්මෙ වා අප්පටිනිස්සග්ගෙ වා උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස න හොති ආපත්ති දට්ඨබ්බා, න හොති ආපත්ති පටිකාතබ්බා, න හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්තිං? පටිකරොහි තං ආපත්තිං; පාපිකා තෙ දිට්ඨි, පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘නත්ථි මෙ, ආවුසො, ආපත්ති, යමහං පස්සෙය්‍යං. නත්ථි මෙ, ආවුසො, ආපත්ති, යමහං පටිකරෙය්‍යං. නත්ථි මෙ, ආවුසො, පාපිකා දිට්ඨි, යමහං පටිනිස්සජ්ජෙය්‍ය’’න්ති. තං සඞ්ඝො අදස්සනෙ වා අප්පටිකම්මෙ වා අප්පටිනිස්සග්ගෙ වා උක්ඛිපති – අධම්මකම්මං.

398. ඉධ පන, භික්ඛවෙ, භික්ඛුස්ස හොති ආපත්ති දට්ඨබ්බා. තමෙනං චොදෙති. සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්ති’’න්ති? සො එවං වදෙති – ‘‘ආමාවුසො, පස්සාමී’’ති. තං සඞ්ඝො ආපත්තියා අදස්සනෙ උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස හොති ආපත්ති පටිකාතබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පටිකරොහි තං ආපත්ති’’න්ති. සො එවං වදෙති – ‘‘ආමාවුසො, පටිකරිස්සාමී’’ති. තං සඞ්ඝො ආපත්තියා අප්පටිකම්මෙ උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘පාපිකා තෙ, ආවුසො, දිට්ඨි; පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘ආමාවුසො, පටිනිස්සජ්ජිස්සාමී’’ති. තං සඞ්ඝො පාපිකාය දිට්ඨියා අප්පටිනිස්සග්ගෙ උක්ඛිපති – අධම්මකම්මං.

ඉධ පන, භික්ඛවෙ, භික්ඛුස්ස හොති ආපත්ති දට්ඨබ්බා, හොති ආපත්ති පටිකාතබ්බා…පෙ… හොති ආපත්ති දට්ඨබ්බා, හොති පාපිකා දිට්ඨි පටිනිස්සජ්ජෙතා…පෙ… හොති ආපත්ති පටිකාතබ්බා, හොති පාපිකා දිට්ඨි පටිනිස්සජ්ජෙතා…පෙ… හොති ආපත්ති දට්ඨබ්බා, හොති ආපත්ති පටිකාතබ්බා, හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්තිං? පටිකරොහි තං ආපත්තිං; පාපිකා තෙ දිට්ඨි, පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘ආමාවුසො, පස්සාමි, ආම පටිකරිස්සාමි, ආම පටිනිස්සජ්ජිස්සාමී’’ති. තං සඞ්ඝො අදස්සනෙ වා අප්පටිකම්මෙ වා අප්පටිනිස්සග්ගෙ වා උක්ඛිපති – අධම්මකම්මං.

399. ඉධ පන, භික්ඛවෙ, භික්ඛුස්ස හොති ආපත්ති දට්ඨබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්ති’’න්ති? සො එවං වදෙති – ‘‘නත්ථි මෙ, ආවුසො, ආපත්ති, යමහං පස්සෙය්‍ය’’න්ති. තං සඞ්ඝො ආපත්තියා අදස්සනෙ උක්ඛිපති – ධම්මකම්මං.

ඉධ පන, භික්ඛවෙ, භික්ඛුස්ස හොති ආපත්ති පටිකාතබ්බා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පටිකරොහි තං ආපත්ති’’න්ති. සො එවං වදෙති – ‘‘නත්ථි මෙ, ආවුසො, ආපත්ති, යමහං පටිකරෙය්‍ය’’න්ති. තං සඞ්ඝො ආපත්තියා අප්පටිකම්මෙ උක්ඛිපති – ධම්මකම්මං.

ඉධ පන, භික්ඛවෙ, භික්ඛුස්ස හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘පාපිකා තෙ, ආවුසො, දිට්ඨි, පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘නත්ථි මෙ, ආවුසො, පාපිකා දිට්ඨි, යමහං පටිනිස්සජ්ජෙය්‍ය’’න්ති. තං සඞ්ඝො පාපිකාය දිට්ඨියා අප්පටිනිස්සග්ගෙ උක්ඛිපති – ධම්මකම්මං.

ඉධ පන, භික්ඛවෙ, භික්ඛුස්ස හොති ආපත්ති දට්ඨබ්බා, හොති ආපත්ති පටිකාතබ්බා…පෙ…

හොති ආපත්ති දට්ඨබ්බා, හොති පාපිකා දිට්ඨි පටිනිස්සජ්ජෙතා…පෙ… හොති ආපත්ති පටිකාතබ්බා, හොති පාපිකා දිට්ඨි පටිනිස්සජ්ජෙතා …පෙ… හොති ආපත්ති දට්ඨබ්බා, හොති ආපත්ති පටිකාතබ්බා, හොති පාපිකා දිට්ඨි පටිනිස්සජ්ජෙතා. තමෙනං චොදෙති සඞ්ඝො වා සම්බහුලා වා එකපුග්ගලො වා – ‘‘ආපත්තිං ත්වං, ආවුසො, ආපන්නො, පස්සසෙතං ආපත්තිං? පටිකරොහි තං ආපත්තිං. පාපිකා තෙ දිට්ඨි, පටිනිස්සජ්ජෙතං පාපිකං දිට්ඨි’’න්ති. සො එවං වදෙති – ‘‘නත්ථි මෙ, ආවුසො, ආපත්ති, යමහං පස්සෙය්‍යං. නත්ථි මෙ, ආවුසො, ආපත්ති යමහං පටිකරෙය්‍යං. නත්ථි මෙ, ආවුසො, පාපිකා දිට්ඨි, යමහං පටිනිස්සජ්ජෙය්‍ය’’න්ති. තං සඞ්ඝො අදස්සනෙ වා අප්පටිකම්මෙ වා අප්පටිනිස්සග්ගෙ වා උක්ඛිපති – ධම්මකම්මන්ති.

අධම්මකම්මාදිකථා නිට්ඨිතා.