239. ද්වෙනිස්සාරණාදිකථා

395. ද්වෙමා, භික්ඛවෙ, නිස්සාරණා. අත්ථි, භික්ඛවෙ, පුග්ගලො අප්පත්තො නිස්සාරණං. තඤ්චෙ සඞ්ඝො නිස්සාරෙති, එකච්චො සුනිස්සාරිතො, එකච්චො දුන්නිස්සාරිතො. කතමො ච, භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති – දුන්නිස්සාරිතො? ඉධ පන, භික්ඛවෙ, භික්ඛු සුද්ධො හොති අනාපත්තිකො. තඤ්චෙ සඞ්ඝො නිස්සාරෙති – දුන්නිස්සාරිතො. අයං වුච්චති, භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති – දුන්නිස්සාරිතො.

කතමො ච, භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති – සුනිස්සාරිතො? ඉධ පන, භික්ඛවෙ, භික්ඛු බාලො හොති අබ්‍යත්තො ආපත්තිබහුලො අනපදානො, ගිහිසංසට්ඨො විහරති අනනුලොමිකෙහි ගිහිසංසග්ගෙහි, තඤ්චෙ සඞ්ඝො නිස්සාරෙති – සුනිස්සාරිතො. අයං වුච්චති, භික්ඛවෙ, පුග්ගලො අප්පත්තො නිස්සාරණං, තඤ්චෙ සඞ්ඝො නිස්සාරෙති – සුනිස්සාරිතො.

396. ද්වෙමා, භික්ඛවෙ, ඔසාරණා. අත්ථි, භික්ඛවෙ, පුග්ගලො අප්පත්තො ඔසාරණං තඤ්චෙ සඞ්ඝො ඔසාරෙති, එකච්චො සොසාරිතො, එකච්චො දොසාරිතො. කතමො ච, භික්ඛවෙ, පුග්ගලො අප්පත්තො ඔසාරණං, තඤ්චෙ සඞ්ඝො ඔසාරෙති – දොසාරිතො? පණ්ඩකො, භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති – දොසාරිතො. ථෙය්‍යසංවාසකො, භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති – දොසාරිතො. තිත්ථියපක්කන්තකො, භික්ඛවෙ…පෙ… තිරච්ඡානගතො, භික්ඛවෙ… මාතුඝාතකො, භික්ඛවෙ… පිතුඝාතකො, භික්ඛවෙ… අරහන්තඝාතකො, භික්ඛවෙ… භික්ඛුනිදූසකො, භික්ඛවෙ… සඞ්ඝභෙදකො, භික්ඛවෙ… ලොහිතුප්පාදකො, භික්ඛවෙ… උභතොබ්‍යඤ්ජනකො, භික්ඛවෙ, අප්පත්තො, ඔසාරණං, තඤ්චෙ සඞ්ඝො ඔසාරෙති – දොසාරිතො. අයං වුච්චති, භික්ඛවෙ, පුග්ගලො අප්පත්තො ඔසාරණං, තඤ්චෙ සඞ්ඝො ඔසාරෙති – දොසාරිතො. ඉමෙ වුච්චන්ති, භික්ඛවෙ, පුග්ගලා අප්පත්තා ඔසාරණං, තෙ චෙ සඞ්ඝො ඔසාරෙති – දොසාරිතා.

කතමො ච, භික්ඛවෙ, පුග්ගලො අප්පත්තො ඔසාරණං, තඤ්චෙ සඞ්ඝො ඔසාරෙති – සොසාරිතො? හත්ථච්ඡින්නො, භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති, සොසාරිතො. පාදච්ඡින්නො, භික්ඛවෙ…පෙ… හත්ථපාදච්ඡින්නො, භික්ඛවෙ… කණ්ණච්ඡින්නො, භික්ඛවෙ… නාසච්ඡින්නො, භික්ඛවෙ… කණ්ණනාසච්ඡින්නො, භික්ඛවෙ… අඞ්ගුලිච්ඡින්නො, භික්ඛවෙ… අළච්ඡින්නො, භික්ඛවෙ… කණ්ඩරච්ඡින්නො, භික්ඛවෙ… ඵණහත්ථකො, භික්ඛවෙ… ඛුජ්ජො, භික්ඛවෙ… වාමනො, භික්ඛවෙ… ගලගණ්ඩී, භික්ඛවෙ… ලක්ඛණාහතො, භික්ඛවෙ… කසාහතො, භික්ඛවෙ… ලිඛිතකො, භික්ඛවෙ… සීපදිකො, භික්ඛවෙ… පාපරොගී, භික්ඛවෙ… පරිසදූසකො, භික්ඛවෙ… කාණො, භික්ඛවෙ… කුණී, භික්ඛවෙ… ඛඤ්ජො, භික්ඛවෙ… පක්ඛහතො, භික්ඛවෙ… ඡින්නිරියාපථො, භික්ඛවෙ… ජරාදුබ්බලො, භික්ඛවෙ… අන්ධො, භික්ඛවෙ… මූගො, භික්ඛවෙ… බධිරො, භික්ඛවෙ… අන්ධමූගො, භික්ඛවෙ… අන්ධබධිරො, භික්ඛවෙ… මූගබධිරො, භික්ඛවෙ… අන්ධමූගබධිරො, භික්ඛවෙ, අප්පත්තො ඔසාරණං, තඤ්චෙ සඞ්ඝො ඔසාරෙති – සොසාරිතො. අයං වුච්චති, භික්ඛවෙ, පුග්ගලො අප්පත්තො ඔසාරණං, තඤ්චෙ සඞ්ඝො ඔසාරෙති – සොසාරිතො. ඉමෙ වුච්චන්ති, භික්ඛවෙ, පුග්ගලා අප්පත්තා ඔසාරණං, තෙ චෙ සඞ්ඝො ඔසාරෙති – සොසාරිතා.

ද්වෙනිස්සාරණාදිකථා නිට්ඨිතා.

වාසභගාමභාණවාරො නිට්ඨිතො පඨමො.