236. ඤත්තිවිපන්නකම්මාදිකථා

385. තෙන ඛො පන සමයෙන ඡබ්බග්ගියා භික්ඛූ එවරූපානි කම්මානි කරොන්ති – අධම්මෙන වග්ගකම්මං කරොන්ති, අධම්මෙන සමග්ගකම්මං කරොන්ති; ධම්මෙන වග්ගකම්මං කරොන්ති, ධම්මපතිරූපකෙන වග්ගකම්මං කරොන්ති, ධම්මපතිරූපකෙන සමග්ගකම්මං කරොන්ති; ඤත්තිවිපන්නම්පි කම්මං කරොන්ති අනුස්සාවනසම්පන්නං, අනුස්සාවනවිපන්නම්පි කම්මං කරොන්ති ඤත්තිසම්පන්නං, ඤත්තිවිපන්නම්පි අනුස්සාවනවිපන්නම්පි කම්මං කරොන්ති; අඤ්ඤත්‍රාපි ධම්මා කම්මං කරොන්ති, අඤ්ඤත්‍රාපි විනයා කම්මං කරොන්ති, අඤ්ඤත්‍රාපි සත්ථුසාසනා කම්මං කරොන්ති; පටිකුට්ඨකතම්පි කම්මං කරොන්ති අධම්මිකං කුප්පං අට්ඨානාරහං. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම ඡබ්බග්ගියා භික්ඛූ එවරූපානි කම්මානි කරිස්සන්ති – අධම්මෙන වග්ගකම්මං කරිස්සන්ති, අධම්මෙන සමග්ගකම්මං කරිස්සන්ති; ධම්මෙන වග්ගකම්මං කරිස්සන්ති, ධම්මපතිරූපකෙන වග්ගකම්මං කරිස්සන්ති, ධම්මපතිරූපකෙන සමග්ගකම්මං කරිස්සන්ති; ඤත්තිවිපන්නම්පි කම්මං කරිස්සන්ති අනුස්සාවනසම්පන්නං, අනුස්සාවනවිපන්නම්පි කම්මං කරිස්සන්ති ඤත්තිසම්පන්නං, ඤත්තිවිපන්නම්පි අනුස්සාවනවිපන්නම්පි කම්මං කරිස්සන්ති; අඤ්ඤත්‍රාපි ධම්මා කම්මං කරිස්සන්ති, අඤ්ඤත්‍රාපි විනයා කම්මං කරිස්සන්ති, අඤ්ඤත්‍රාපි සත්ථුසාසනා කම්මං කරිස්සන්ති; පටිකුට්ඨකතම්පි කම්මං කරිස්සන්ති අධම්මිකං කුප්පං අට්ඨානාරහ’’න්ති. අථ ඛො තෙ භික්ඛූ භගවතො එතමත්ථං ආරොචෙසුං…පෙ… ‘‘සච්චං කිර, භික්ඛවෙ, ඡබ්බග්ගියා භික්ඛූ එවරූපානි කම්මානි කරොන්ති – අධම්මෙන වග්ගකම්මං කරොන්ති…පෙ… පටිකුට්ඨකතම්පි කම්මං කරොන්ති අධම්මිකං කුප්පං අට්ඨානාරහ’’න්ති? ‘‘සච්චං, භගවා’’ති. විගරහි බුද්ධො භගවා…පෙ… විගරහිත්වා ධම්මිං කථං කත්වා භික්ඛූ ආමන්තෙසි –

386. ‘‘අධම්මෙන චෙ, භික්ඛවෙ, වග්ගකම්මං අකම්මං න ච කරණීයං; අධම්මෙන සමග්ගකම්මං අකම්මං න ච කරණීයං; ධම්මෙන වග්ගකම්මං අකම්මං න ච කරණීයං; ධම්මපතිරූපකෙන වග්ගකම්මං අකම්මං න ච කරණීයං; ධම්මපතිරූපකෙන සමග්ගකම්මං අකම්මං න ච කරණීයං. ඤත්තිවිපන්නඤ්චෙ, භික්ඛවෙ, කම්මං අනුස්සාවනසම්පන්නං අකම්මං න ච කරණීයං; අනුස්සාවනවිපන්නඤ්චෙ, භික්ඛවෙ, කම්මං ඤත්තිසම්පන්නං අකම්මං න ච කරණීයං; ඤත්තිවිපන්නඤ්චෙ, භික්ඛවෙ, කම්මං අනුස්සාවනවිපන්නං අකම්මං න ච කරණීයං; අඤ්ඤත්‍රාපි ධම්මා කම්මං අකම්මං න ච කරණීයං; අඤ්ඤත්‍රාපි විනයා කම්මං අකම්මං න ච කරණීයං; අඤ්ඤත්‍රාපි සත්ථුසාසනා කම්මං අකම්මං න ච කරණීයං; පටිකුට්ඨකතඤ්චෙ, භික්ඛවෙ, කම්මං අධම්මිකං කුප්පං අට්ඨානාරහං අකම්මං න ච කරණීයං.

387. ඡයිමානි, භික්ඛවෙ, කම්මානි – අධම්මකම්මං, වග්ගකම්මං, සමග්ගකම්මං, ධම්මපතිරූපකෙන වග්ගකම්මං, ධම්මපතිරූපකෙන සමග්ගකම්මං, ධම්මෙන සමග්ගකම්මං.

කතමඤ්ච, භික්ඛවෙ, අධම්මකම්මං? ඤත්තිදුතියෙ චෙ, භික්ඛවෙ, කම්මෙ එකාය ඤත්තියා කම්මං කරොති, න ච කම්මවාචං අනුස්සාවෙති – අධම්මකම්මං. ඤත්තිදුතියෙ චෙ, භික්ඛවෙ, කම්මෙ ද්වීහි ඤත්තීහි කම්මං කරොති, න ච කම්මවාචං අනුස්සාවෙති – අධම්මකම්මං. ඤත්තිදුතියෙ චෙ, භික්ඛවෙ, කම්මෙ එකාය කම්මවාචාය කම්මං කරොති, න ච ඤත්තිං ඨපෙති – අධම්මකම්මං. ඤත්තිදුතියෙ චෙ, භික්ඛවෙ, කම්මෙ ද්වීහි කම්මවාචාහි කම්මං කරොති, න ච ඤත්තිං ඨපෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ එකාය ඤත්තියා කම්මං කරොති, න ච කම්මවාචං අනුස්සාවෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ ද්වීහි ඤත්තීහි කම්මං කරොති, න ච කම්මවාචං අනුස්සාවෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ තීහි ඤත්තීහි කම්මං කරොති, න ච කම්මවාචං අනුස්සාවෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ චතූහි ඤත්තීහි කම්මං කරොති, න ච කම්මවාචං අනුස්සාවෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ එකාය කම්මවාචාය කම්මං කරොති, න ච ඤත්තිං ඨපෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ ද්වීහි කම්මවාචාහි කම්මං කරොති, න ච ඤත්තිං ඨපෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ තීහි කම්මවාචාහි කම්මං කරොති, න ච ඤත්තිං ඨපෙති – අධම්මකම්මං. ඤත්තිචතුත්ථෙ චෙ, භික්ඛවෙ, කම්මෙ චතූහි කම්මවාචාහි කම්මං කරොති, න ච ඤත්තිං ඨපෙති – අධම්මකම්මං. ඉදං වුච්චති, භික්ඛවෙ, අධම්මකම්මං.

කතමඤ්ච, භික්ඛවෙ, වග්ගකම්මං? ඤත්තිදුතියෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – වග්ගකම්මං. ඤත්තිදුතියෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – වග්ගකම්මං. ඤත්තිදුතියෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා පටික්කොසන්ති – වග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – වග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – වග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා පටික්කොසන්ති – වග්ගකම්මං. ඉදං වුච්චති, භික්ඛවෙ, වග්ගකම්මං.

කතමඤ්ච, භික්ඛවෙ, සමග්ගකම්මං? ඤත්තිදුතියෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති – සමග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති – සමග්ගකම්මං. ඉදං වුච්චති, භික්ඛවෙ, සමග්ගකම්මං.

කතමඤ්ච, භික්ඛවෙ, ධම්මපතිරූපකෙන වග්ගකම්මං? ඤත්තිදුතියෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – ධම්මපතිරූපකෙන වග්ගකම්මං. ඤත්තිදුතියෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – ධම්මපතිරූපකෙන වග්ගකම්මං. ඤත්තිදුතියෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා පටික්කොසන්ති – ධම්මපතිරූපකෙන වග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ අනාගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – ධම්මපතිරූපකෙන වග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො අනාහටො හොති, සම්මුඛීභූතා පටික්කොසන්ති – ධම්මපතිරූපකෙන වග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා පටික්කොසන්ති – ධම්මපතිරූපකෙන වග්ගකම්මං. ඉදං වුච්චති, භික්ඛවෙ, ධම්මපතිරූපකෙන වග්ගකම්මං.

කතමඤ්ච, භික්ඛවෙ, ධම්මපතිරූපකෙන සමග්ගකම්මං? ඤත්තිදුතියෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති – ධම්මපතිරූපකෙන සමග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ පඨමං කම්මවාචං අනුස්සාවෙති, පච්ඡා ඤත්තිං ඨපෙති, යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති – ධම්මපතිරූපකෙන සමග්ගකම්මං. ඉදං වුච්චති, භික්ඛවෙ, ධම්මපතිරූපකෙන සමග්ගකම්මං.

කතමඤ්ච, භික්ඛවෙ, ධම්මෙන සමග්ගකම්මං? ඤත්තිදුතියෙ චෙ, භික්ඛවෙ, කම්මෙ පඨමං ඤත්තිං ඨපෙති, පච්ඡා එකාය කම්මවාචාය කම්මං කරොති, යාවතිකා භික්ඛූ කම්මප්පත්තා තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති – ධම්මෙන සමග්ගකම්මං. ඤත්තිචතුත්ථෙ චෙ, භික්ඛවෙ, කම්මෙ පඨමං ඤත්තිං ඨපෙති, පච්ඡා තීහි කම්මවාචාහි කම්මං කරොති, යාවතිකා භික්ඛූ කම්මප්පත්තා, තෙ ආගතා හොන්ති, ඡන්දාරහානං ඡන්දො ආහටො හොති, සම්මුඛීභූතා න පටික්කොසන්ති, ධම්මෙන සමග්ගකම්මං. ඉදං වුච්චති, භික්ඛවෙ, ධම්මෙන සමග්ගකම්මං.

ඤත්තිවිපන්නකම්මාදිකථා නිට්ඨිතා.