237. චතුවග්ගකරණාදිකථා
388. පඤ්ච සඞ්ඝා – චතුවග්ගො භික්ඛුසඞ්ඝො පඤ්චවග්ගො භික්ඛුසඞ්ඝො, දසවග්ගො භික්ඛුසඞ්ඝො, වීසතිවග්ගො භික්ඛුසඞ්ඝො, අතිරෙකවීසතිවග්ගො භික්ඛුසඞ්ඝො. තත්‍ර, භික්ඛවෙ, ය්වායං චතුවග්ගො භික්ඛුසඞ්ඝො, ඨපෙත්වා තීණි කම්මානි – උපසම්පදං පවාරණං අබ්භානං, ධම්මෙන සමග්ගො සබ්බකම්මෙසු කම්මප්පත්තො. තත්‍ර, භික්ඛවෙ, ය්වායං පඤ්චවග්ගො භික්ඛුසඞ්ඝො, ඨපෙත්වා ද්වෙ කම්මානි – මජ්ඣිමෙසු ජනපදෙසු උපසම්පදං අබ්භානං, ධම්මෙන සමග්ගො සබ්බකම්මෙසු කම්මප්පත්තො. තත්‍ර, භික්ඛවෙ, ය්වායං දසවග්ගො භික්ඛුසඞ්ඝො, ඨපෙත්වා එකං කම්මං – අබ්භානං, ධම්මෙන සමග්ගො සබ්බකම්මෙසු කම්මප්පත්තො. තත්‍ර, භික්ඛවෙ, ය්වායං වීසතිවග්ගො භික්ඛුසඞ්ඝො ධම්මෙන සමග්ගො සබ්බකම්මෙසු කම්මප්පත්තො. තත්‍ර, භික්ඛවෙ, ය්වායං අතිරෙකවීසතිවග්ගො භික්ඛුසඞ්ඝො ධම්මෙන සමග්ගො සබ්බකම්මෙසු කම්මප්පත්තො.
389. චතුවග්ගකරණඤ්චෙ, භික්ඛවෙ, කම්මං භික්ඛුනිචතුත්ථො කම්මං කරෙය්‍ය – අකම්මං න ච කරණීයං. චතුවග්ගකරණඤ්චෙ, භික්ඛවෙ, කම්මං සික්ඛමානචතුත්ථො කම්මං කරෙය්‍ය… අකම්මං න ච කරණීයං…පෙ…. සාමණෙරචතුත්ථො කම්මං කරෙය්‍ය… අකම්මං න ච කරණීයං. සාමණෙරිචතුත්ථො කම්මං කරෙය්‍ය… අකම්මං න ච කරණීයං. සික්ඛං පච්චක්ඛාතකචතුත්ථො කම්මං කරෙය්‍ය… අකම්මං න ච කරණීයං. අන්තිමවත්ථුං අජ්ඣාපන්නකචතුත්ථො කම්මං කරෙය්‍ය… අකම්මං න ච කරණීයං. ආපත්තියා අදස්සනෙ උක්ඛිත්තකචතුත්ථො කම්මං කරෙය්‍ය… අකම්මං න ච කරණීයං. ආපත්තියා අප්පටිකම්මෙ උක්ඛිත්තකචතුත්ථො කම්මං කරෙය්‍ය… අකම්මං න ච කරණීයං. පාපිකාය දිට්ඨියා අප්පටිනිස්සග්ගෙ උක්ඛිත්තකචතුත්ථො කම්මං කරෙය්‍ය… අකම්මං න ච කරණීයං. පණ්ඩකචතුත්ථො කම්මං කරෙය්‍ය… අකම්මං න ච කරණීයං. ථෙය්‍යසංවාසකචතුත්ථො කම්මං කරෙය්‍ය… අකම්මං න ච කරණීයං. තිත්ථියපක්කන්තකචතුත්ථො කම්මං කරෙය්‍ය… අකම්මං න ච කරණීයං. තිරච්ඡානගතචතුත්ථො කම්මං කරෙය්‍ය… අකම්මං න ච කරණීයං. මාතුඝාතකචතුත්ථො කම්මං කරෙය්‍ය… අකම්මං න ච කරණීයං. පිතුඝාතකචතුත්ථො කම්මං කරෙය්‍ය… අකම්මං න ච කරණීයං. අරහන්තඝාතකචතුත්ථො කම්මං කරෙය්‍ය… අකම්මං න ච කරණීයං. භික්ඛුනිදූසකචතුත්ථො කම්මං කරෙය්‍ය… අකම්මං න ච කරණීයං. සඞ්ඝභෙදකචතුත්ථො කම්මං කරෙය්‍ය… අකම්මං න ච කරණීයං. ලොහිතුප්පාදකචතුත්ථො කම්මං කරෙය්‍ය… අකම්මං න ච කරණීයං. උභතොබ්‍යඤ්ජනකචතුත්ථො කම්මං කරෙය්‍ය… අකම්මං න ච කරණීයං. නානාසංවාසකචතුත්ථො කම්මං කරෙය්‍ය… අකම්මං න ච කරණීයං. නානාසීමාය ඨිතචතුත්ථො කම්මං කරෙය්‍ය… අකම්මං න ච කරණීයං. ඉද්ධියා වෙහාසෙ ඨිතචතුත්ථො කම්මං කරෙය්‍ය… අකම්මං න ච කරණීයං. යස්ස සඞ්ඝො කම්මං කරොති, තංචතුත්ථො කම්මං කරෙය්‍ය … අකම්මං න ච කරණීයං.
චතුවරණං.
390. පඤ්චවග්ගකරණඤ්චෙ, භික්ඛවෙ, කම්මං භික්ඛුනිපඤ්චමො කම්මං කරෙය්‍ය… අකම්මං න ච කරණීයං. පඤ්චවග්ගකරණඤ්චෙ, භික්ඛවෙ, කම්මං සික්ඛමානපඤ්චමො කම්මං කරෙය්‍ය…පෙ…. සාමණෙරපඤ්චමො කම්මං කරෙය්‍ය… සාමණෙරිපඤ්චමො කම්මං කරෙය්‍ය … සික්ඛං පච්චක්ඛාතකපඤ්චමො කම්මං කරෙය්‍ය… අන්තිමවත්ථුං අජ්ඣාපන්නකපඤ්චමො කම්මං කරෙය්‍ය… ආපත්තියා අදස්සනෙ උක්ඛිත්තකපඤ්චමො කම්මං කරෙය්‍ය… ආපත්තියා අප්පටිකම්මෙ උක්ඛිත්තකපඤ්චමො කම්මං කරෙය්‍ය… පාපිකාය දිට්ඨියා අප්පටිනිස්සග්ගෙ උක්ඛිත්තකපඤ්චමො කම්මං කරෙය්‍ය… පණ්ඩකපඤ්චමො කම්මං කරෙය්‍ය… ථෙය්‍යසංවාසකපඤ්චමො කම්මං කරෙය්‍ය… තිත්ථියපක්කන්තකපඤ්චමො කම්මං කරෙය්‍ය… තිරච්ඡානගතපඤ්චමො කම්මං කරෙය්‍ය… මාතුඝාතකපඤ්චමො කම්මං කරෙය්‍ය… පිතුඝාතකපඤ්චමො කම්මං කරෙය්‍ය… අරහන්තඝාතකපඤ්චමො කම්මං කරෙය්‍ය… භික්ඛුනිදූසකපඤ්චමො කම්මං කරෙය්‍ය… සඞ්ඝභෙදකපඤ්චමො කම්මං කරෙය්‍ය… ලොහිතුප්පාදකපඤ්චමො කම්මං කරෙය්‍ය… උභතොබ්‍යඤ්ජනකපඤ්චමො කම්මං කරෙය්‍ය… නානාසංවාසකපඤ්චමො කම්මං කරෙය්‍ය… නානාසීමාය ඨිතපඤ්චමො කම්මං කරෙය්‍ය… ඉද්ධියා වෙහාසෙ ඨිතපඤ්චමො කම්මං කරෙය්‍ය… යස්ස සඞ්ඝො කම්මං කරොති, තංපඤ්චමො කම්මං කරෙය්‍ය – අකම්මං න ච කරණීයං.
පඤ්චවග්ගකරණං.
391. දසවග්ගකරණඤ්චෙ, භික්ඛවෙ, කම්මං භික්ඛුනිදසමො කම්මං කරෙය්‍ය, අකම්මං න ච කරණීයං. දසවග්ගකරණඤ්චෙ, භික්ඛවෙ, කම්මං සික්ඛමානදසමො කම්මං කරෙය්‍ය, අකම්මං න ච කරණීයං…පෙ…. දසවග්ගකරණඤ්චෙ, භික්ඛවෙ, කම්මං යස්ස සඞ්ඝො කම්මං කරොති, තංදසමො කම්මං කරෙය්‍ය – අකම්මං න ච කරණීයං.
දසවග්ගකරණං.
392. වීසතිවග්ගකරණඤ්චෙ, භික්ඛවෙ, කම්මං භික්ඛුනිවීසො කම්මං කරෙය්‍ය – අකම්මං න ච කරණීයං. වීසතිවග්ගකරණඤ්චෙ, භික්ඛවෙ, කම්මං සික්ඛමානවීසො කම්මං කරෙය්‍ය …පෙ… සාමණෙරවීසො කම්මං කරෙය්‍ය… සාමණෙරිවීසො කම්මං කරෙය්‍ය… සික්ඛං පච්චක්ඛාතකවීසො කම්මං කරෙය්‍ය… අන්තිමවත්ථුං අජ්ඣාපන්නකවීසො කම්මං කරෙය්‍ය… ආපත්තියා අදස්සනෙ උක්ඛිත්තකවීසො කම්මං කරෙය්‍ය… ආපත්තියා අප්පටිකම්මෙ උක්ඛිත්තකවීසො කම්මං කරෙය්‍ය… පාපිකාය දිට්ඨියා අප්පටිනිස්සග්ගෙ උක්ඛිත්තකවීසො කම්මං කරෙය්‍ය… පණ්ඩකවීසො කම්මං කරෙය්‍ය… ථෙය්‍යසංවාසකවීසො කම්මං කරෙය්‍ය… තිත්ථියපක්කන්තකවීසො කම්මං කරෙය්‍ය… තිරච්ඡානගතවීසො කම්මං කරෙය්‍ය… මාතුඝාතකවීසො කම්මං කරෙය්‍ය… පිතුඝාතකවීසො කම්මං කරෙය්‍ය… අරහන්තඝාතකවීසො කම්මං කරෙය්‍ය… භික්ඛුනිදූසකවීසො කම්මං කරෙය්‍ය… සඞ්ඝභෙදකවීසො කම්මං කරෙය්‍ය… ලොහිතුප්පාදකවීසො කම්මං කරෙය්‍ය… උභතොබ්‍යඤ්ජනකවීසො කම්මං කරෙය්‍ය… නානාසංවාසකවීසො කම්මං කරෙය්‍ය… නානාසීමාය ඨිතවීසො කම්මං කරෙය්‍ය… ඉද්ධියා වෙහාසෙ ඨිතවීසො කම්මං කරෙය්‍ය… යස්ස සඞ්ඝො කම්මං කරොති, තංවීසො කම්මං කරෙය්‍ය – අකම්මං න ච කරණීයං.
වීසතිවග්ගකරණං.
චතුවග්ගකරණාදිකථා නිට්ඨිතා.