235. අධම්මෙන වග්ගාදිකම්මකථා

382. තෙන ඛො පන සමයෙන චම්පායං භික්ඛූ එවරූපානි කම්මානි කරොන්ති – අධම්මෙන වග්ගකම්මං කරොන්ති, අධම්මෙන සමග්ගකම්මං කරොන්ති; ධම්මෙන වග්ගකම්මං කරොන්ති, ධම්මපතිරූපකෙන වග්ගකම්මං කරොන්ති; ධම්මපතිරූපකෙන සමග්ගකම්මං කරොන්ති; එකොපි එකං උක්ඛිපති, එකොපි ද්වෙ උක්ඛිපති, එකොපි සම්බහුලෙ උක්ඛිපති, එකොපි සඞ්ඝං උක්ඛිපති; ද්වෙපි එකං උක්ඛිපන්ති, ද්වෙපි ද්වෙ උක්ඛිපන්ති, ද්වෙපි සම්බහුලෙ උක්ඛිපන්ති, ද්වෙපි සඞ්ඝං උක්ඛිපන්ති; සම්බහුලාපි එකං උක්ඛිපන්ති; සම්බහුලාපි ද්වෙ උක්ඛිපන්ති, සම්බහුලාපි සම්බහුලෙ උක්ඛිපන්ති, සම්බහුලාපි සඞ්ඝං උක්ඛිපන්ති; සඞ්ඝොපි සඞ්ඝං උක්ඛිපති. යෙ තෙ භික්ඛූ අප්පිච්ඡා…පෙ… තෙ උජ්ඣායන්ති ඛිය්‍යන්ති විපාචෙන්ති – ‘‘කථඤ්හි නාම චම්පායං භික්ඛූ එවරූපානි කම්මානි කරිස්සන්ති – අධම්මෙන වග්ගකම්මං කරිස්සන්ති, අධම්මෙන සමග්ගකම්මං කරිස්සන්ති, ධම්මෙන වග්ගකම්මං කරිස්සන්ති, ධම්මපතිරූපකෙන වග්ගකම්මං කරිස්සන්ති, ධම්මපතිරූපකෙන සමග්ගකම්මං කරිස්සන්ති, එකොපි එකං උක්ඛිපිස්සති, එකොපි ද්වෙ උක්ඛිපිස්සති, එකොපි සම්බහුලෙ උක්ඛිපිස්සති, එකොපි සඞ්ඝං උක්ඛිපිස්සති, ද්වෙපි එකං උක්ඛිපිස්සන්ති, ද්වෙපි ද්වෙ උක්ඛිපිස්සන්ති, ද්වෙපි සම්බහුලෙ උක්ඛිපිස්සන්ති, ද්වෙපි සඞ්ඝං උක්ඛිපිස්සන්ති, සම්බහුලාපි එකං උක්ඛිපිස්සන්ති, සම්බහුලාපි ද්වෙ උක්ඛිපිස්සන්ති, සම්බහුලාපි සම්බහුලෙ උක්ඛිපිස්සන්ති, සම්බහුලාපි සඞ්ඝං උක්ඛිපිස්සන්ති, සඞ්ඝොපි සඞ්ඝං උක්ඛිපිස්සතී’’ති. අථ ඛො තෙ භික්ඛූ භගවතො එතමත්ථං ආරොචෙසුං…පෙ… ‘‘සච්චං කිර, භික්ඛවෙ, චම්පායං භික්ඛූ එවරූපානි කම්මානි කරොන්ති – අධම්මෙන වග්ගකම්මං කරොන්ති…පෙ… සඞ්ඝොපි සඞ්ඝං උක්ඛිපතී’’ති? ‘‘සච්චං, භගවා’’ති. විගරහි බුද්ධො භගවා – ‘‘අනනුච්ඡවිකං, භික්ඛවෙ, තෙසං මොඝපුරිසානං අනනුලොමිකං අප්පතිරූපං අස්සාමණකං අකප්පියං අකරණීයං. කථඤ්හි නාම තෙ, භික්ඛවෙ, මොඝපුරිසා එවරූපානි කම්මානි කරිස්සන්ති – අධම්මෙන වග්ගකම්මං කරිස්සන්ති…පෙ… සඞ්ඝොපි සඞ්ඝං උක්ඛිපිස්සති. නෙතං, භික්ඛවෙ, අප්පසන්නානං වා පසාදාය…පෙ… විගරහිත්වා…පෙ… ධම්මිං කථං කත්වා භික්ඛූ ආමන්තෙසි –

383. ‘‘අධම්මෙන චෙ, භික්ඛවෙ, වග්ගකම්මං අකම්මං න ච කරණීයං, අධම්මෙන [අධම්මෙන චෙ භික්ඛවෙ (ස්‍යා.)] සමග්ගකම්මං අකම්මං න ච කරණීයං, ධම්මෙන වග්ගකම්මං අකම්මං න ච කරණීයං; ධම්මපතිරූපකෙන වග්ගකම්මං අකම්මං න ච කරණීයං, ධම්මපතිරූපකෙන සමග්ගකම්මං අකම්මං න ච කරණීයං; එකොපි එකං උක්ඛිපති අකම්මං න ච කරණීයං, එකොපි ද්වෙ උක්ඛිපති අකම්මං න ච කරණීයං, එකොපි සම්බහුලෙ උක්ඛිපති අකම්මං න ච කරණීයං, එකොපි සඞ්ඝං උක්ඛිපති අකම්මං න ච කරණීයං; ද්වෙපි එකං උක්ඛිපන්ති අකම්මං න ච කරණීයං, ද්වෙපි ද්වෙ උක්ඛිපන්ති අකම්මං න ච කරණීයං, ද්වෙපි සම්බහුලෙ උක්ඛිපන්ති අකම්මං න ච කරණීයං, ද්වෙපි සඞ්ඝං උක්ඛිපන්ති අකම්මං න ච කරණීයං; සම්බහුලාපි එකං උක්ඛිපන්ති අකම්මං න ච කරණීයං, සම්බහුලාපි ද්වෙ උක්ඛිපන්ති අකම්මං න ච කරණීයං, සම්බහුලාපි සම්බහුලෙ උක්ඛිපන්ති අකම්මං න ච කරණීයං, සම්බහුලාපි සඞ්ඝං උක්ඛිපන්ති අකම්මං න ච කරණීයං; සඞ්ඝොපි සඞ්ඝං උක්ඛිපති අකම්මං න ච කරණීයං.

384. ‘‘චත්තාරිමානි, භික්ඛවෙ, කම්මානි – අධම්මෙන වග්ගකම්මං, අධම්මෙන සමග්ගකම්මං, ධම්මෙන වග්ගකම්මං, ධම්මෙන සමග්ගකම්මං. තත්‍ර, භික්ඛවෙ, යදිදං අධම්මෙන වග්ගකම්මං, ඉදං, භික්ඛවෙ, කම්මං අධම්මත්තා වග්ගත්තා කුප්පං අට්ඨානාරහං; න, භික්ඛවෙ, එවරූපං කම්මං කාතබ්බං, න ච මයා එවරූපං කම්මං අනුඤ්ඤාතං. තත්‍ර, භික්ඛවෙ, යදිදං අධම්මෙන සමග්ගකම්මං, ඉදං, භික්ඛවෙ, කම්මං අධම්මත්තා කුප්පං අට්ඨානාරහං; න, භික්ඛවෙ, එවරූපං කම්මං කාතබ්බං, න ච මයා එවරූපං කම්මං අනුඤ්ඤාතං. තත්‍ර, භික්ඛවෙ, යදිදං ධම්මෙන වග්ගකම්මං, ඉදං, භික්ඛවෙ, කම්මං වග්ගත්තා කුප්පං අට්ඨානාරහං; න, භික්ඛවෙ, එවරූපං කම්මං කාතබ්බං, න ච මයා එවරූපං කම්මං අනුඤ්ඤාතං. තත්‍ර, භික්ඛවෙ, යදිදං ධම්මෙන සමග්ගකම්මං, ඉදං, භික්ඛවෙ, කම්මං ධම්මත්තා සමග්ගත්තා අකුප්පං ඨානාරහං; එවරූපං, භික්ඛවෙ, කම්මං කාතබ්බං, එවරූපඤ්ච මයා කම්මං අනුඤ්ඤාතං. තස්මාතිහ, භික්ඛවෙ, එවරූපං කම්මං කරිස්සාම යදිදං ධම්මෙන සමග්ගන්ති – එවඤ්හි වො, භික්ඛවෙ, සික්ඛිතබ්බ’’න්ති.

අධම්මෙන වග්ගාදිකම්මකථා නිට්ඨිතා.