231. දුග්ගහිතසුග්ගහිතාදිකථා

377. තෙන ඛො පන සමයෙන ආයස්මා රෙවතො අඤ්ඤතරස්ස භික්ඛුනො හත්ථෙ ආයස්මතො සාරිපුත්තස්ස චීවරං පාහෙසි – ‘‘ඉමං චීවරං ථෙරස්ස දෙහී’’ති. අථ ඛො සො භික්ඛු අන්තරාමග්ගෙ ආයස්මතො රෙවතස්ස විස්සාසා තං චීවරං අග්ගහෙසි. අථ ඛො ආයස්මා රෙවතො ආයස්මතා සාරිපුත්තෙන සමාගන්ත්වා පුච්ඡි – ‘‘අහං, භන්තෙ, ථෙරස්ස චීවරං පාහෙසිං. සම්පත්තං තං චීවර’’න්ති? ‘‘නාහං තං, ආවුසො, චීවරං පස්සාමී’’ති. අථ ඛො ආයස්මා රෙවතො තං භික්ඛුං එතදවොච – ‘‘අහං, ආවුසො, ආයස්මතො හත්ථෙ ථෙරස්ස චීවරං පාහෙසිං. කහං තං චීවර’’න්ති? ‘‘අහං, භන්තෙ, ආයස්මතො විස්සාසා තං චීවරං අග්ගහෙසි’’න්ති. භගවතො එතමත්ථං ආරොචෙසුං.

378. ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දෙහී’’ති. සො අන්තරාමග්ගෙ යො පහිණති තස්ස විස්සාසා ගණ්හාති. සුග්ගහිතං. යස්ස පහිය්‍යති තස්ස විස්සාසා ගණ්හාති. දුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දෙහී’’ති. සො අන්තරාමග්ගෙ යස්ස පහිය්‍යති තස්ස විස්සාසා ගණ්හාති. දුග්ගහිතං. යො පහිණති තස්ස විස්සාසා ගණ්හාති. සුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දෙහී’’ති. සො අන්තරාමග්ගෙ සුණාති – යො පහිණති සො කාලඞ්කතොති. තස්ස මතකචීවරං අධිට්ඨාති. ස්වාධිට්ඨිතං. යස්ස පහිය්‍යති තස්ස විස්සාසා ගණ්හාති. දුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දෙහී’’ති. සො අන්තරාමග්ගෙ සුණාති – යස්ස පහිය්‍යති සො කාලඞ්කතොති. තස්ස මතකචීවරං අධිට්ඨාති. ද්වාධිට්ඨිතං. යො පහිණති තස්ස විස්සාසා ගණ්හාති. සුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දෙහී’’ති. සො අන්තරාමග්ගෙ සුණාති – උභො කාලඞ්කතාති. යො පහිණති තස්ස මතකචීවරං අධිට්ඨාති. ස්වාධිට්ඨිතං. යස්ස පහිය්‍යති තස්ස මතකචීවරං අධිට්ඨාති. ද්වාධිට්ඨිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දම්මී’’ති. සො අන්තරාමග්ගෙ යො පහිණති තස්ස විස්සාසා ගණ්හාති. දුග්ගහිතං. යස්ස පහිය්‍යති තස්ස විස්සාසා ගණ්හාති. සුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දම්මී’’ති. සො අන්තරාමග්ගෙ යස්ස පහිය්‍යති තස්ස විස්සාසා ගණ්හාති. සුග්ගහිතං. යො පහිණති තස්ස විස්සාසා ගණ්හාති. දුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දම්මී’’ති. සො අන්තරාමග්ගෙ සුණාති – ‘‘යො පහිණති සො කාලඞ්කතො’’ති. තස්ස මතකචීවරං අධිට්ඨාති. ද්වාධිට්ඨිතං. යස්ස පහිය්‍යති තස්ස විස්සාසා ගණ්හාති. සුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දම්මී’’ති. සො අන්තරාමග්ගෙ සුණාති – ‘‘යස්ස පහිය්‍යති සො කාලඞ්කතො’’ති. තස්ස මතකචීවරං අධිට්ඨාති. ස්වාධිට්ඨිතං. යො පහිණති තස්ස විස්සාසා ගණ්හාති. දුග්ගහිතං.

ඉධ පන, භික්ඛවෙ, භික්ඛු භික්ඛුස්ස හත්ථෙ චීවරං පහිණති – ‘‘ඉමං චීවරං ඉත්ථන්නාමස්ස දම්මී’’ති. සො අන්තරාමග්ගෙ සුණාති ‘‘උභො කාලඞ්කතා’’ති. යො පහිණති තස්ස මතකචීවරං අධිට්ඨාති. ද්වාධිට්ඨිතං. යස්ස පහිය්‍යති තස්ස මතකචීවරං අධිට්ඨාති. ස්වාධිට්ඨිතං.

දුග්ගහිතසුග්ගහිතාදිකථා නිට්ඨිතා.