230. සඞ්ඝෙ භින්නෙ චීවරුප්පාදකථා

376. ඉධ පන, භික්ඛවෙ, වස්සංවුට්ඨානං භික්ඛූනං අනුප්පන්නෙ චීවරෙ සඞ්ඝො භිජ්ජති. තත්ථ මනුස්සා එකස්මිං පක්ඛෙ උදකං දෙන්ති, එකස්මිං පක්ඛෙ චීවරං දෙන්ති – සඞ්ඝස්ස දෙමාති. සඞ්ඝස්සෙවෙතං.

ඉධ පන, භික්ඛවෙ, වස්සංවුට්ඨානං භික්ඛූනං අනුප්පන්නෙ චීවරෙ සඞ්ඝො භිජ්ජති. තත්ථ මනුස්සා එකස්මිං පක්ඛෙ උදකං දෙන්ති, තස්මිංයෙව පක්ඛෙ චීවරං දෙන්ති – සඞ්ඝස්ස දෙමාති. සඞ්ඝස්සෙවෙතං.

ඉධ පන, භික්ඛවෙ, වස්සංවුට්ඨානං භික්ඛූනං අනුප්පන්නෙ චීවරෙ සඞ්ඝො භිජ්ජති. තත්ථ මනුස්සා එකස්මිං පක්ඛෙ උදකං දෙන්ති, එකස්මිං පක්ඛෙ චීවරං දෙන්ති – පක්ඛස්ස දෙමාති. පක්ඛස්සෙවෙතං.

ඉධ පන, භික්ඛවෙ, වස්සංවුට්ඨානං භික්ඛූනං අනුප්පන්නෙ චීවරෙ සඞ්ඝො භිජ්ජති. තත්ථ මනුස්සා එකස්මිං පක්ඛෙ උදකං දෙන්ති, තස්මිංයෙව පක්ඛෙ චීවරං දෙන්ති – පක්ඛස්ස දෙමාති. පක්ඛස්සෙවෙතං.

ඉධ පන, භික්ඛවෙ, වස්සංවුට්ඨානං භික්ඛූනං උප්පන්නෙ චීවරෙ අභාජිතෙ සඞ්ඝො භිජ්ජති. සබ්බෙසං සමකං භාජෙතබ්බන්ති.

සඞ්ඝෙ භින්නෙ චීවරුප්පාදකථා නිට්ඨිතා.