200. පලිබොධාපලිබොධකථා

325. ද්වෙමෙ, භික්ඛවෙ, කථිනස්ස පලිබොධා, ද්වෙ අපලිබොධා. කතමෙ ච, භික්ඛවෙ, ද්වෙ කථිනස්ස පලිබොධා? ආවාසපලිබොධො ච චීවරපලිබොධො ච. කථඤ්ච, භික්ඛවෙ, ආවාසපලිබොධො හොති? ඉධ, භික්ඛවෙ, භික්ඛු වසති වා තස්මිං ආවාසෙ, සාපෙක්ඛො වා පක්කමති ‘‘පච්චෙස්ස’’න්ති. එවං ඛො, භික්ඛවෙ, ආවාසපලිබොධො හොති. කථඤ්ච, භික්ඛවෙ, චීවරපලිබොධො හොති? ඉධ, භික්ඛවෙ, භික්ඛුනො චීවරං අකතං වා හොති විප්පකතං වා, චීවරාසා වා අනුපච්ඡින්නා. එවං ඛො, භික්ඛවෙ, චීවරපලිබොධො හොති. ඉමෙ ඛො, භික්ඛවෙ, ද්වෙ කථිනස්ස පලිබොධා.

කතමෙ ච, භික්ඛවෙ, ද්වෙ කථිනස්ස අපලිබොධා? ආවාසඅපලිබොධො ච චීවරඅපලිබොධො ච. කථඤ්ච, භික්ඛවෙ, ආවාසඅපලිබොධො හොති? ඉධ, භික්ඛවෙ, භික්ඛු පක්කමති තම්හා ආවාසා චත්තෙන වන්තෙන මුත්තෙන අනපෙක්ඛො [අනපෙක්ඛෙන (ක.)] ‘‘න පච්චෙස්ස’’න්ති. එවං ඛො, භික්ඛවෙ, ආවාසඅපලිබොධො හොති. කථඤ්ච, භික්ඛවෙ, චීවරඅපලිබොධො හොති? ඉධ, භික්ඛවෙ, භික්ඛුනො චීවරං කතං වා හොති, නට්ඨං වා විනට්ඨං වා දඩ්ඪං වා, චීවරාසා වා උපච්ඡින්නා. එවං ඛො, භික්ඛවෙ, චීවරඅපලිබොධො හොති. ඉමෙ ඛො, භික්ඛවෙ, ද්වෙ කථිනස්ස අපලිබොධාති.

පලිබොධාපලිබොධකථා නිට්ඨිතා.

කථිනක්ඛන්ධකො නිට්ඨිතො සත්තමො.