179. කප්පියභූමිඅනුජානනා
295. තෙන ඛො පන සමයෙන වෙසාලී සුභික්ඛා හොති සුසස්සා සුලභපිණ්ඩා, සුකරා උඤ්ඡෙන පග්ගහෙන යාපෙතුං. අථ ඛො භගවතො රහොගතස්ස පටිසල්ලීනස්ස එවං චෙතසො පරිවිතක්කො උදපාදි – ‘‘යානි තානි මයා භික්ඛූනං අනුඤ්ඤාතානි දුබ්භික්ඛෙ දුස්සස්සෙ දුල්ලභපිණ්ඩෙ අන්තො වුට්ඨං අන්තො පක්කං සාමං පක්කං උග්ගහිතපටිග්ගහිතකං තතො නීහටං පුරෙභත්තං පටිග්ගහිතං වනට්ඨං පොක්ඛරට්ඨං, අජ්ජාපි නු ඛො තානි භික්ඛූ පරිභුඤ්ජන්තී’’ති. අථ ඛො භගවා සායන්හසමයං පටිසල්ලානා වුට්ඨිතො ආයස්මන්තං ආනන්දං ආමන්තෙසි – ‘‘යානි තානි, ආනන්ද, මයා භික්ඛූනං අනුඤ්ඤාතානි දුබ්භික්ඛෙ දුස්සස්සෙ දුල්ලභපිණ්ඩෙ අන්තො වුට්ඨං අන්තො පක්කං සාමං පක්කං උග්ගහිතපටිග්ගහිතකං තතො නීහටං පුරෙභත්තං පටිග්ගහිතං වනට්ඨං පොක්ඛරට්ඨං, අජ්ජාපි නු ඛො තානි භික්ඛූ පරිභුඤ්ජන්තී’’ති? ‘‘පරිභුඤ්ජන්ති භගවා’’ති. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘යානි තානි, භික්ඛවෙ, මයා භික්ඛූනං අනුඤ්ඤාතානි දුබ්භික්ඛෙ දුස්සස්සෙ දුල්ලභපිණ්ඩෙ අන්තො වුට්ඨං අන්තො පක්කං සාමං පක්කං උග්ගහිතපටිග්ගහිතකං තතො නීහටං පුරෙභත්තං පටිග්ගහිතං වනට්ඨං පොක්ඛරට්ඨං, තානාහං අජ්ජතග්ගෙ පටික්ඛිපාමි. න, භික්ඛවෙ, අන්තො වුට්ඨං අන්තො පක්කං සාමං පක්කං උග්ගහිතපටිග්ගහිතකං පරිභුඤ්ජිතබ්බං. යො පරිභුඤ්ජෙය්‍ය, ආපත්ති දුක්කටස්ස. න ච, භික්ඛවෙ, තතො නීහටං පුරෙභත්තං පටිග්ගහිතං වනට්ඨං පොක්ඛරට්ඨං භුත්තාවිනා පවාරිතෙන අනතිරිත්තං පරිභුඤ්ජිතබ්බං. යො පරිභුඤ්ජෙය්‍ය, යථාධම්මො කාරෙතබ්බො’’ති.
තෙන ඛො පන සමයෙන ජානපදා මනුස්සා බහුං ලොණම්පි, තෙලම්පි, තණ්ඩුලම්පි, ඛාදනීයම්පි සකටෙසු ආරොපෙත්වා බහාරාමකොට්ඨකෙ සකටපරිවට්ටං කරිත්වා අච්ඡන්ති – යදා පටිපාටිං ලභිස්සාම, තදා භත්තං කරිස්සාමාති. මහා ච මෙඝො උග්ගතො හොති. අථ ඛො තෙ මනුස්සා යෙනායස්මා ආනන්දො තෙනුපසඞ්කමිංසු, උපසඞ්කමිත්වා ආයස්මන්තං ආනන්දං එතදවොචුං – ‘‘ඉධ, භන්තෙ ආනන්ද, බහුං ලොණම්පි, තෙලම්පි, තණ්ඩුලම්පි, ඛාදනීයම්පි සකටෙසු ආරොපිතා තිට්ඨන්ති, මහා ච මෙඝො උග්ගතො; කථං නු ඛො, භන්තෙ ආනන්ද, පටිපජ්ජිතබ්බ’’න්ති? අථ ඛො ආයස්මා ආනන්දො භගවතො එතමත්ථං ආරොචෙසි. ‘‘තෙන හානන්ද, සඞ්ඝො පච්චන්තිමං විහාරං කප්පියභූමිං සම්මන්නිත්වා තත්ථ වාසෙතු, යං සඞ්ඝො ආකඞ්ඛති විහාරං වා අඩ්ඪයොගං වා පාසාදං වා හම්මියං වා ගුහං වා. එවඤ්ච පන, භික්ඛවෙ, සම්මන්නිතබ්බා. බ්‍යත්තෙන භික්ඛුනා පටිබලෙන සඞ්ඝො ඤාපෙතබ්බො –
‘‘සුණාතු මෙ, භන්තෙ, සඞ්ඝො. යදි සඞ්ඝස්ස පත්තකල්ලං, සඞ්ඝො ඉත්ථන්නාමං විහාරං කප්පියභූමිං සම්මන්නෙය්‍ය, එසා ඤත්ති.
‘‘සුණාතු මෙ, භන්තෙ, සඞ්ඝො. සඞ්ඝො ඉත්ථන්නාමං විහාරං කප්පියභූමිං සම්මන්නති. යස්සායස්මතො ඛමති ඉත්ථන්නාමස්ස විහාරස්ස කප්පියභූමියා සම්මුති, සො තුණ්හස්ස; යස්ස නක්ඛමති, සො භාසෙය්‍ය.
‘‘සම්මතො සඞ්ඝෙන ඉත්ථන්නාමො විහාරො කප්පියභූමි. ඛමති සඞ්ඝස්ස, තස්මා තුණ්හී, එවමෙතං ධාරයාමී’’ති.
තෙන ඛො පන සමයෙන මනුස්සා තත්ථෙව සම්මුතියා [සම්මතිකාය (ස්‍යා.)] කප්පියභූමියා යාගුයො පචන්ති, භත්තානි පචන්ති, සූපානි සම්පාදෙන්ති, මංසානි කොට්ටෙන්ති, කට්ඨානි ඵාලෙන්ති. අස්සොසි ඛො භගවා රත්තියා පච්චූසසමයං පච්චුට්ඨාය උච්චාසද්දං මහාසද්දං කාකොරවසද්දං, සුත්වාන ආයස්මන්තං ආනන්දං ආමන්තෙසි – ‘‘කිං නු ඛො සො, ආනන්ද, උච්චාසද්දො මහාසද්දො කාකොරවසද්දො’’ති? ‘‘එතරහි, භන්තෙ, මනුස්සා තත්ථෙව සම්මුතියා කප්පියභූමියා යාගුයො පචන්ති, භත්තානි පචන්ති, සූපානි සම්පාදෙන්ති, මංසානි කොට්ටෙන්ති, කට්ඨානි ඵාලෙන්ති. සො එසො, භගවා, උච්චාසද්දො මහාසද්දො කාකොරවසද්දො’’ති. අථ ඛො භගවා එතස්මිං නිදානෙ එතස්මිං පකරණෙ ධම්මිං කථං කත්වා භික්ඛූ ආමන්තෙසි – ‘‘න, භික්ඛවෙ, සම්මුති [සම්මතිකා (ස්‍යා.)] කප්පියභූමි පරිභුඤ්ජිතබ්බා. යො පරිභුඤ්ජෙය්‍ය, ආපත්ති දුක්කටස්ස. අනුජානාමි, භික්ඛවෙ, තිස්සො කප්පියභූමියො – උස්සාවනන්තිකං ගොනිසාදිකං ගහපති’’න්ති.
තෙන ඛො පන සමයෙන ආයස්මා යසොජො ගිලානො හොති. තස්සත්ථාය භෙසජ්ජානි ආහරියන්ති. තානි භික්ඛූ බහි වාසෙන්ති. උක්කපිණ්ඩිකාපි ඛාදන්ති, චොරාපි හරන්ති. භගවතො එතමත්ථං ආරොචෙසුං. අනුජානාමි, භික්ඛවෙ, සම්මුතිං කප්පියභූමිං පරිභුඤ්ජිතුං. අනුජානාමි, භික්ඛවෙ, චතස්සො කප්පියභූමියො – උස්සාවනන්තිකං ගොනිසාදිකං ගහපතිං සම්මුතින්ති.
කප්පියභූමිඅනුජානනා නිට්ඨිතා.
සීහභාණවාරො නිට්ඨිතො චතුත්ථො.