66. ආපත්තියා අදස්සනෙ උක්ඛිත්තකවත්ථූනි

130. තෙන ඛො පන සමයෙන අඤ්ඤතරො භික්ඛු ආපත්තියා අදස්සනෙ උක්ඛිත්තකො විබ්භමි. සො පුන පච්චාගන්ත්වා භික්ඛූ උපසම්පදං යාචි. භගවතො එතමත්ථං ආරොචෙසුං.

ඉධ පන, භික්ඛවෙ, භික්ඛු ආපත්තියා අදස්සනෙ උක්ඛිත්තකො විබ්භමති. සො පුන පච්චාගන්ත්වා භික්ඛූ උපසම්පදං යාචති. සො එවමස්ස වචනීයො – ‘‘පස්සිස්සසි තං ආපත්ති’’න්ති? සචාහං පස්සිස්සාමීති, පබ්බාජෙතබ්බො. සචාහං න පස්සිස්සාමීති, න පබ්බාජෙතබ්බො. පබ්බාජෙත්වා වත්තබ්බො – ‘‘පස්සිස්සසි තං ආපත්ති’’න්ති? සචාහං පස්සිස්සාමීති, උපසම්පාදෙතබ්බො. සචාහං න පස්සිස්සාමීති, න උපසම්පාදෙතබ්බො. උපසම්පාදෙත්වා වත්තබ්බො – ‘‘පස්සිස්සසි තං ආපත්ති’’න්ති? සචාහං පස්සිස්සාමීති, ඔසාරෙතබ්බො. සචාහං න පස්සිස්සාමීති, න ඔසාරෙතබ්බො. ඔසාරෙත්වා වත්තබ්බො – ‘‘පස්සසි [පස්සාහි (සී.)] තං ආපත්ති’’න්ති? සචෙ පස්සති, ඉච්චෙතං කුසලං. නො චෙ පස්සති, ලබ්භමානාය සාමග්ගියා පුන උක්ඛිපිතබ්බො. අලබ්භමානාය සාමග්ගියා අනාපත්ති සම්භොගෙ සංවාසෙ.

ඉධ පන, භික්ඛවෙ, භික්ඛු ආපත්තියා අප්පටිකම්මෙ උක්ඛිත්තකො විබ්භමති. සො පුන පච්චාගන්ත්වා භික්ඛූ උපසම්පදං යාචති. සො එවමස්ස වචනීයො – ‘‘පටිකරිස්සසි තං ආපත්ති’’න්ති? සචාහං පටිකරිස්සාමීති, පබ්බාජෙතබ්බො. සචාහං න පටිකරිස්සාමීති, න පබ්බාජෙතබ්බො. පබ්බාජෙත්වා වත්තබ්බො – ‘‘පටිකරිස්සසි තං ආපත්ති’’න්ති? සචාහං පටිකරිස්සාමීති, උපසම්පාදෙතබ්බො. සචාහං න පටිකරිස්සාමීති, න උපසම්පාදෙතබ්බො. උපසම්පාදෙත්වා වත්තබ්බො – ‘‘පටිකරිස්සසි තං ආපත්ති’’න්ති? සචාහං පටිකරිස්සාමීති, ඔසාරෙතබ්බො. සචාහං න පටිකරිස්සාමීති, න ඔසාරෙතබ්බො. ඔසාරෙත්වා වත්තබ්බො – ‘‘පටිකරොහි තං ආපත්ති’’න්ති. සචෙ පටිකරොති, ඉච්චෙතං කුසලං. නො චෙ පටිකරොති ලබ්භමානාය සාමග්ගියා පුන උක්ඛිපිතබ්බො. අලබ්භමානාය සාමග්ගියා අනාපත්ති සම්භොගෙ සංවාසෙ.

ඉධ පන, භික්ඛවෙ, භික්ඛු පාපිකාය දිට්ඨියා අප්පටිනිස්සග්ගෙ උක්ඛිත්තකො විබ්භමති. සො පුන පච්චාගන්ත්වා භික්ඛූ උපසම්පදං යාචති. සො එවමස්ස වචනීයො – ‘‘පටිනිස්සජ්ජිස්සසි තං පාපිකං දිට්ඨි’’න්ති? සචාහං පටිනිස්සජ්ජිස්සාමීති, පබ්බාජෙතබ්බො. සචාහං න පටිනිස්සජ්ජිස්සාමීති, න පබ්බාජෙතබ්බො. පබ්බාජෙත්වා වත්තබ්බො – ‘‘පටිනිස්සජ්ජිස්සසි තං පාපිකං දිට්ඨි’’න්ති? සචාහං පටිනිස්සජ්ජිස්සාමීති, උපසම්පාදෙතබ්බො. සචාහං න පටිනිස්සජ්ජිස්සාමීති, න උපසම්පාදෙතබ්බො. උපසම්පාදෙත්වා වත්තබ්බො – ‘‘පටිනිස්සජ්ජිස්සසි තං පාපිකං දිට්ඨි’’න්ති? සචාහං පටිනිස්සජ්ජිස්සාමීති, ඔසාරෙතබ්බො. සචාහං න පටිනිස්සජ්ජිස්සාමීති, න ඔසාරෙතබ්බො. ඔසාරෙත්වා වත්තබ්බො – ‘‘පටිනිස්සජ්ජෙහි තං පාපිකං දිට්ඨි’’න්ති. සචෙ පටිනිස්සජ්ජති, ඉච්චෙතං කුසලං. නො චෙ පටිනිස්සජ්ජති, ලබ්භමානාය සාමග්ගියා පුන උක්ඛිපිතබ්බො. අලබ්භමානාය සාමග්ගියා අනාපත්ති සම්භොගෙ සංවාසෙති.

මහාඛන්ධකො පඨමො.