67. තස්සුද්දානං

131. විනයම්හි මහත්ථෙසු, පෙසලානං සුඛාවහෙ;

නිග්ගහානඤ්ච පාපිච්ඡෙ, ලජ්ජීනං පග්ගහෙසු ච.

සාසනාධාරණෙ චෙව, සබ්බඤ්ඤුජිනගොචරෙ;

අනඤ්ඤවිසයෙ ඛෙමෙ, සුපඤ්ඤත්තෙ අසංසයෙ.

ඛන්ධකෙ විනයෙ චෙව, පරිවාරෙ ච මාතිකෙ;

යථාත්ථකාරී කුසලො, පටිපජ්ජති යොනිසො.

යො ගවං න විජානාති, න සො රක්ඛති ගොගණං;

එවං සීලං අජානන්තො, කිං සො රක්ඛෙය්‍ය සංවරං.

පමුට්ඨම්හි ච සුත්තන්තෙ, අභිධම්මෙ ච තාවදෙ;

විනයෙ අවිනට්ඨම්හි, පුන තිට්ඨති සාසනං.

තස්මා සඞ්ගාහණාහෙතුං [සඞ්ගාහනාහෙතුං (ක.)], උද්දානං අනුපුබ්බසො;

පවක්ඛාමි යථාඤායං, සුණාථ මම භාසතො.

වත්ථු නිදානං ආපත්ති, නයා පෙය්‍යාලමෙව ච;

දුක්කරං තං අසෙසෙතුං, නයතො තං විජානථාති.

බොධි රාජායතනඤ්ච, අජපාලො සහම්පති;

බ්‍රහ්මා ආළාරො උදකො, භික්ඛු ච උපකො ඉසි.

කොණ්ඩඤ්ඤො වප්පො භද්දියො, මහානාමො ච අස්සජි;

යසො චත්තාරො පඤ්ඤාස, සබ්බෙ පෙසෙසි සො දිසා.

වත්ථු මාරෙහි තිංසා ච, උරුවෙලං තයො ජටී;

අග්‍යාගාරං මහාරාජා, සක්කො බ්‍රහ්මා ච කෙවලා.

පංසුකූලං පොක්ඛරණී, සිලා ච කකුධො සිලා;

ජම්බු අම්බො ච ආමලො, පාරිපුප්ඵඤ්ච ආහරි.

ඵාලියන්තු උජ්ජලන්තු, විජ්ඣායන්තු ච කස්සප;

නිමුජ්ජන්ති මුඛී මෙඝො, ගයා ලට්ඨි ච මාගධො.

උපතිස්සො කොලිතො ච, අභිඤ්ඤාතා ච පබ්බජුං;

දුන්නිවත්ථා පණාමනා, කිසො ලූඛො ච බ්‍රාහ්මණො.

අනාචාරං ආචරති, උදරං මාණවො ගණො;

වස්සං බාලෙහි පක්කන්තො, දස වස්සානි නිස්සයො.

න වත්තන්ති පණාමෙතුං, බාලා පස්සද්ධි පඤ්ච ඡ;

යො සො අඤ්ඤො ච නග්ගො ච, අච්ඡින්නජටිලසාකියො.

මගධෙසු පඤ්චාබාධා, එකො රාජා [භටො චොරො (ස්‍යා.)] ච අඞ්ගුලි;

මාගධො ච අනුඤ්ඤාසි, කාරා ලිඛි කසාහතො.

ලක්ඛණා ඉණා දාසො ච, භණ්ඩුකො උපාලි අහි;

සද්ධං කුලං කණ්ටකො ච, ආහුන්දරිකමෙව ච.

වත්ථුම්හි දාරකො සික්ඛා, විහරන්ති ච කිං නු ඛො;

සබ්බං මුඛං උපජ්ඣායෙ, අපලාළන කණ්ටකො.

පණ්ඩකො ථෙය්‍යපක්කන්තො, අහි ච මාතරී පිතා;

අරහන්තභික්ඛුනීභෙදා, රුහිරෙන ච බ්‍යඤ්ජනං.

අනුපජ්ඣායසඞ්ඝෙන, ගණපණ්ඩකපත්තකො;

අචීවරං තදුභයං, යාචිතෙනපි යෙ තයො.

හත්ථා පාදා හත්ථපාදා, කණ්ණා නාසා තදූභයං;

අඞ්ගුලිඅළකණ්ඩරං, ඵණං ඛුජ්ජඤ්ච වාමනං.

ගලගණ්ඩී ලක්ඛණා චෙව, කසා ලිඛිතසීපදී;

පාපපරිසදූසී ච, කාණං කුණි තථෙව ච.

ඛඤ්ජං පක්ඛහතඤ්චෙව, සච්ඡින්නඉරියාපථං;

ජරාන්ධමූගබධිරං, අන්ධමූගඤ්ච යං තහිං.

අන්ධබධිරං යං වුත්තං, මූගබධිරමෙව ච;

අන්ධමූගබධිරඤ්ච, අලජ්ජීනඤ්ච නිස්සයං.

වත්ථබ්බඤ්ච තථාද්ධානං, යාචමානෙන ලක්ඛණා [පෙක්ඛනා (සබ්බත්ථ)];

ආගච්ඡතු විවදන්ති, එකුපජ්ඣායෙන කස්සපො.

දිස්සන්ති උපසම්පන්නා, ආබාධෙහි ච පීළිතා;

අනනුසිට්ඨා විත්ථෙන්ති, තත්ථෙව අනුසාසනා.

සඞ්ඝෙපි ච අථො බාලා, අසම්මතා ච එකතො;

උල්ලුම්පතුපසම්පදා, නිස්සයො එකකො තයොති.

ඉමම්හි ඛන්ධකෙ වත්ථූනි එකසතඤ්ච ද්වාසත්තති.

මහාඛන්ධකො නිට්ඨිතො.