61. ද්වෙඋපසම්පදාපෙක්ඛාදිවත්ථු

123. තෙන ඛො පන සමයෙන ආයස්මතො මහාකස්සපස්ස ද්වෙ උපසම්පදාපෙක්ඛා හොන්ති. තෙ විවදන්ති – අහං පඨමං උපසම්පජ්ජිස්සාමි, අහං පඨමං උපසම්පජ්ජිස්සාමීති. භගවතො එතමත්ථං ආරොචෙසුං. අනුජානාමි, භික්ඛවෙ, ද්වෙ එකානුස්සාවනෙ කාතුන්ති.

තෙන ඛො පන සමයෙන සම්බහුලානං ථෙරානං උපසම්පදාපෙක්ඛා හොන්ති. තෙ විවදන්ති – අහං පඨමං උපසම්පජ්ජිස්සාමි, අහං පඨමං උපසම්පජ්ජිස්සාමීති. ථෙරා එවමාහංසු – ‘‘හන්ද, මයං, ආවුසො, සබ්බෙව එකානුස්සාවනෙ කරොමා’’ති. භගවතො එතමත්ථං ආරොචෙසුං. අනුජානාමි, භික්ඛවෙ, ද්වෙ තයො එකානුස්සාවනෙ කාතුං, තඤ්ච ඛො එකෙන උපජ්ඣායෙන, න ත්වෙව නානුපජ්ඣායෙනාති.