62. ගබ්භවීසූපසම්පදානුජානනා

124. තෙන ඛො පන සමයෙන ආයස්මා කුමාරකස්සපො ගබ්භවීසො උපසම්පන්නො අහොසි. අථ ඛො ආයස්මතො කුමාරකස්සපස්ස එතදහොසි – ‘‘භගවතා පඤ්ඤත්තං ‘න ඌනවීසතිවස්සො පුග්ගලො උපසම්පාදෙතබ්බො’ති. අහඤ්චම්හි ගබ්භවීසො උපසම්පන්නො. උපසම්පන්නො නු ඛොම්හි, නනු ඛො උපසම්පන්නො’’ති? භගවතො එතමත්ථං ආරොචෙසුං. යං, භික්ඛවෙ, මාතුකුච්ඡිස්මිං පඨමං චිත්තං උප්පන්නං, පඨමං විඤ්ඤාණං පාතුභූතං, තදුපාදාය සාවස්ස ජාති. අනුජානාමි, භික්ඛවෙ, ගබ්භවීසං උපසම්පාදෙතුන්ති.