සමාරොපනහාරවණ්ණනා

ආඝාතාදීනමකරණීයතාවචනෙන ඛන්තිසම්පදා දස්සිතා හොති. ‘‘අප්පමත්තකං ඛො පනෙත’’න්තිආදිනා සොරච්චසම්පදා. ‘‘අත්ථි භික්ඛවෙ’’තිආදිනා ඤාණසම්පදා. ‘‘අපරාමසතො චස්ස පච්චත්තඤ්ඤෙව නිබ්බුති විදිතා’’ති, ‘‘වෙදනානං…පෙ… යථාභූතං විදිත්වා අනුපාදාවිමුත්තො’’ති ච එතෙහි සමාධිසම්පදාය සද්ධිං විජ්ජාවිමුත්තිවසීභාවසම්පදා දස්සිතා. තත්ථ ඛන්තිසම්පදා පටිසඞ්ඛානබලසිද්ධිතො සොරච්චසම්පදාය පදට්ඨානං, සොරච්චසම්පදා පන අත්ථතො සීලමෙව, සීලං සමාධිසම්පදාය පදට්ඨානං. සමාධි ඤාණසම්පදාය පදට්ඨානන්ති අයං පදට්ඨානසමාරොපනා.

පාණාතිපාතාදීහි පටිවිරතිවචනං සීලස්ස පරියායවිභාගදස්සනං. සස්සතවාදාදිවිභාගදස්සනං පන දිට්ඨියා පරියායවචනන්ති අයං වෙවචනසමාරොපනා.

සීලෙන වීතික්කමප්පහානං, තදඞ්ගප්පහානං, දුච්චරිතසංකිලෙසප්පහානඤ්ච සිජ්ඣති. සමාධිනා පරියුට්ඨානප්පහානං, වික්ඛම්භනප්පහානං, තණ්හාසංකිලෙසප්පහානඤ්ච සිජ්ඣති. පඤ්ඤාය දිට්ඨිසංකිලෙසප්පහානං, සමුච්ඡෙදප්පහානං, අනුසයප්පහානඤ්ච සිජ්ඣතීති අයං පහානසමාරොපනා.

සීලාදිධම්මක්ඛන්ධෙහි සමථවිපස්සනාභාවනාපාරිපූරිං ගච්ඡති පහානත්තයසිද්ධිතොති අයං භාවනාසමාරොපනා. අයං සුත්තෙ ආගතධම්මානං පදට්ඨානවෙවචනපහානභාවනාසමාරොපනවිචාරණලක්ඛණො සමාරොපනහාරො නාම. වුත්තඤ්හෙතං ‘‘යෙ ධම්මා යං මූලා, යෙ චෙකත්ථා පකාසිතා මුනිනා’’තිආදි, (නෙත්ති. 4.16) අයං සොළසහාරයොජනා.

සොළසහාරවණ්ණනා නිට්ඨිතා.