1. සඤ්චිච්චසික්ඛාපදවණ්ණනා

382. සප්පාණකවග්ගස්ස පඨමසික්ඛාපදෙ උසුං සරං අස්සති ඛිපතීති ඉස්සාසො, ධනුසිප්පකුසලොති ආහ ‘‘ධනුග්ගහාචරියො’’ති. පටිසත්තුවිධමනත්ථං ධනුං ගණ්හන්තීති ධනුග්ගහා, තෙසං ආචරියො ධනුග්ගහාචරියො. අප්පමත්තෙන වත්තං කාතබ්බන්ති යථා තෙ පාණා න මරන්ති, එවං සූපට්ඨිතස්සතිනා සෙනාසනෙ වත්තං කාතබ්බං. සෙසමෙත්ථ උත්තානමෙව. අඞ්ගානිපි මනුස්සවිග්ගහෙ වුත්තනයෙන වෙදිතබ්බානීති.

සඤ්චිච්චසික්ඛාපදවණ්ණනා නිට්ඨිතා.