3. තතියසඞ්ඝාදිසෙසසික්ඛාපදවණ්ණනා

692. තතියෙ පරික්ඛෙපං අතික්කාමෙන්තියාති ගාමන්තරස්ස පරික්ඛෙපං අතික්කාමෙන්තියා. ‘‘ගාමන්තරං ගච්ඡෙය්‍යා’’ති හි වුත්තං. විකාලගාමප්පවෙසනසික්ඛාපදෙ විය ‘‘අපරික්ඛිත්තස්ස උපචාරං ඔක්කමන්තියා’’ති අවත්වා ‘‘අතික්කාමෙන්තියා’’ති පාළියං වුත්තත්තා ගාමං පවිසන්තියා ඝරූපචාරෙ ඨිතස්ස දුතියලෙඩ්ඩුපාතසඞ්ඛාතස්ස උපචාරස්ස අතික්කමො නාම පඨමලෙඩ්ඩුපාතට්ඨානසඞ්ඛාතස්ස පරික්ඛෙපාරහට්ඨානස්ස අතික්කමො එවාති ආහ ‘‘පරික්ඛෙපාරහට්ඨානං එකෙන පාදෙන අතික්කමතී’’ති.

මජ්ඣෙති ගාමමජ්ඣෙ. පච්ඡාති අපරකාලෙ. ‘‘චතුගාමසාධාරණත්තා’’ති ඉමිනා විහාරතො චතූසු ගාමෙසු යත්ථ කත්ථචි පවිසිතුං වට්ටතීති එත්ථ කාරණමාහ.

පරතීරමෙව අක්කමන්තියාති නදිං අනොතරිත්වා ඔරිමතීරතො ලඞ්ඝිත්වා වා ආකාසාදිනා වා පරතීරමෙව අතික්කාමෙන්තියා. ඔරිමතීරමෙව ආගච්ඡති, ආපත්තීති පාරගමනාය ඔතිණ්ණත්තා වුත්තං.

තාදිසෙ අරඤ්ඤෙති ඉන්දඛීලතො බහිභාවලක්ඛණෙ අරඤ්ඤෙ. ‘‘තෙනෙවා’’තිආදිනා දස්සනූපචාරෙ විරහිතෙ සවනූපචාරස්ස විජ්ජමානත්තෙපි ආපත්ති හොතීති දස්සෙති. අඤ්ඤං මග්ගං ගණ්හාතීති මග්ගමූළ්හත්තා ගණ්හාති, න දුතියිකං ඔහියිතුං. තස්මා අනාපත්ති. අනන්තරායෙන එකභාවො, අනාපදාය ගාමන්තරගමනාදීසු එකන්ති ද්වෙ අඞ්ගානි.

තතියසඞ්ඝාදිසෙසසික්ඛාපදවණ්ණනා නිට්ඨිතා.