5. අචෙලකවග්ගො

1. අචෙලකසික්ඛාපදවණ්ණනා

273. පඤ්චමවග්ගස්ස පඨමෙ මය්හං නාමාති භික්ඛුනා භූමියං ඨපෙත්වා දින්නම්පි සන්ධාය වදති. අඤ්ඤතිත්ථියතා, අනනුඤ්ඤාතතා, අජ්ඣොහරණීයතා, අජ්ඣොහරණත්ථාය සහත්ථා අනික්ඛිත්තභාජනෙ දානන්ති ඉමානෙත්ථ චත්තාරි අඞ්ගානි.

අචෙලකසික්ඛාපදවණ්ණනා නිට්ඨිතා.

2. උය්‍යොජනසික්ඛාපදවණ්ණනා

274. දුතියෙ අනාචාරං ආචරිතුකාමතා, තදත්ථමෙව උපසම්පන්නස්ස උය්‍යොජනා, තස්ස උපචාරාතික්කමොති ඉමානෙත්ථ තීණි අඞ්ගානි.

උය්‍යොජනසික්ඛාපදවණ්ණනා නිට්ඨිතා.

3. සභොජනසික්ඛාපදවණ්ණනා

281. තතියෙ පාළියං ඛුද්දකෙ ඝරෙති එත්ථ ඛුද්දකං ඝරං නාම පඤ්චහත්ථතො ඌනකවිත්ථාරං අධිප්පෙතං. තත්ථ ච පිට්ඨසඞ්ඝාටතො හත්ථපාසෙ අවිජහිතෙපි පිට්ඨිවංසාතික්කමො හොතීති ආහ ‘‘පිට්ඨිවංසං අතික්කමිත්වා’’ති. යථා තථා වා කතස්සාති පිට්ඨිවංසං ආරොපෙත්වා වා අනාරොපෙත්වා වා කතස්ස.

283. පාළියං වීතරාගාති අපරියුට්ඨිතරාගානං, අනාගාමීනඤ්ච සඞ්ගහො. සචිත්තකන්ති අනුපවිසිත්වා නිසීදනචිත්තෙන සචිත්තකං. පරියුට්ඨිතරාගජායම්පතිකානං සන්නිහිතතා, සයනිඝරතා, දුතියස්ස භික්ඛුනො අභාවො, අනුපඛජ්ජ නිසීදනන්ති ඉමානෙත්ථ චත්තාරි අඞ්ගානි.

සභොජනසික්ඛාපදවණ්ණනා නිට්ඨිතා.

284-289. චතුත්ථපඤ්චමානි වුත්තත්ථානි.

6. චාරිත්තසික්ඛාපදවණ්ණනා

298. ඡට්ඨෙ ‘‘පරියෙසිත්වා ආරොචනකිච්චං නාම නත්ථී’’ති වුත්තත්තා යො අපරියෙසිතබ්බො උපසඞ්කමිතුං යුත්තට්ඨානෙ දිස්සති, සො සචෙපි පකතිවචනස්ස සවනූපචාරං අතික්කම්ම ඨිතො උපගන්ත්වා ආපුච්ඡිතබ්බො. තෙනාහ ‘‘අපි ච…පෙ… යං පස්සති, සො ආපුච්ඡිතබ්බො’’තිආදි.

302. අනාපත්තිවාරෙ චෙත්ථ අන්තරාරාමාදීනඤ්ඤෙව වුත්තත්තා විහාරතො ගාමවීථිං අනුඤ්ඤාතකාරණං විනා අතික්කමන්තස්සාපි ආපත්ති හොති, න පන ඝරූපචාරං අතික්කමන්තස්සෙව.

යං පන පාළියං ‘‘අඤ්ඤස්ස ඝරූපචාරං ඔක්කමන්තස්ස…පෙ… පඨමං පාදං උම්මාරං අතික්කාමෙතී’’තිආදි වුත්තං. තං ගාමෙ පවිට්ඨං සන්ධාය වුත්තං, තථාපි අඤ්ඤස්ස ඝරූපචාරං අනොක්කමිත්වා වීථිමජ්ඣෙනෙව ගන්ත්වා ඉච්ඡිතිච්ඡිතඝරද්වාරාභිමුඛෙ ඨත්වා මනුස්සෙ ඔලොකෙත්වා ගච්ඡන්තස්සාපි පාචිත්තියමෙව. තත්ථ කෙචි ‘‘වීථියං අතික්කමන්තස්ස ඝරූපචාරගණනාය ආපත්තියො’’ති වදන්ති. අඤ්ඤෙ පන ‘‘යානි කුලානි උද්දිස්ස ගතො, තෙසං ගණනායා’’ති. පඤ්චන්නං භොජනානං අඤ්ඤතරෙන නිමන්තනසාදියනං, සන්තං භික්ඛුං අනාපුච්ඡනා, භත්තියඝරතො අඤ්ඤඝරූපසඞ්කමනං, මජ්ඣන්හිකානතික්කමො, සමයාපදානං අභාවොති ඉමානෙත්ථ පඤ්ච අඞ්ගානි.

චාරිත්තසික්ඛාපදවණ්ණනා නිට්ඨිතා.

7. මහානාමසික්ඛාපදවණ්ණනා

303. සත්තමෙ මහානාමොති සුක්කොදනස්ස පුත්තො අනුරුද්ධත්ථෙරස්ස, සත්ථු ච ජෙට්ඨභාතා. ආනන්දත්ථෙරො අමිතොදනස්ස පුත්තො, නන්දත්ථෙරො පන සුද්ධොදනස්සෙව.

305. පාළියං කාලං ආහරිස්සථාති අජ්ජතනං කාලං වීතිනාමෙස්සථ, ස්වෙ භෙසජ්ජං හරිස්සථාති වා අත්ථො. ‘‘අත්ථි පවාරණා භෙසජ්ජපරියන්තා ච රත්තිපරියන්තා චා’’ති තතියකොට්ඨාසෙ නියමිතමෙව භෙසජ්ජං නියමිතකාලන්තරෙයෙව ගහෙතබ්බං, න තතො බහි. ඉතරථා විසුං පයොජනං නත්ථීති දට්ඨබ්බං. සපරියන්තා සඞ්ඝපවාරණා, තදුත්තරි භෙසජ්ජවිඤ්ඤත්ති, අගිලානතාති ඉමානෙත්ථ තීණි අඞ්ගානි.

මහානාමසික්ඛාපදවණ්ණනා නිට්ඨිතා.

8. උය්‍යුත්තසෙනාසික්ඛාපදවණ්ණනා

315. අට්ඨමෙ එකමෙකන්ති එත්ථ දුවඞ්ගිනීපි තිවඞ්ගිනීපි සෙනා සඞ්ගය්හති. උය්‍යුත්තචතුරඞ්ගසෙනාදස්සනාය තථාරූපපච්චයාදිං විනා ගමනං, අනනුඤ්ඤාතොකාසෙ දස්සනන්ති ඉමානෙත්ථ ද්වෙ අඞ්ගානි.

උය්‍යුත්තසෙනාසික්ඛාපදවණ්ණනා නිට්ඨිතා.

9. සෙනාවාසසික්ඛාපදවණ්ණනා

319. නවමෙ සෙනාය චතුත්ථො සූරියත්ථඞ්ගමො, අගිලානතාති ඉමානෙත්ථ ද්වෙ අඞ්ගානි.

සෙනාවාසසික්ඛාපදවණ්ණනා නිට්ඨිතා.

10. උය්‍යොධිකසික්ඛාපදවණ්ණනා

322. දසමෙ පාළියං කති තෙ ලක්ඛානි ලද්ධානීති කිත්තකා තයා ලද්ධාති අත්ථො. උය්‍යොධිකාදිදස්සනාය තථාරූපපච්චයං විනා ගමනං, අනනුඤ්ඤාතොකාසෙ දස්සනන්ති ඉමානෙත්ථ ද්වෙ අඞ්ගානි.

උය්‍යොධිකසික්ඛාපදවණ්ණනා නිට්ඨිතා.

නිට්ඨිතො අචෙලකවග්ගො පඤ්චමො.