චූළසඞ්ගාමවණ්ණනා

අනුවිජ්ජකස්සපටිපත්තිවණ්ණනා

365. ඨානනිසජ්ජවත්ථාදිනිස්සිතාති ‘‘එවං ඨාතබ්බං එවං නිසීදිතබ්බ’’න්ති එවමාදිකා. සඤ්ඤාජනනත්ථන්ති ‘‘එවං වත්තබ්බ’’න්ති එවං සඤ්ජානනත්ථං. අනුවිධියන්තෙනාති චිත්තෙ ඨපෙන්තෙනාති අත්ථො. ලජ්ජා සා නු ඛොති කිං සා ලජ්ජා අයං පරිසාති අධිප්පායො. අනුයොගවත්තං කථාපෙත්වාති ‘‘කිමනුයොගවත්තං ජානාසී’’ති පුච්ඡිත්වා තෙනෙව කථාපෙත්වා. අජානනප්පසඞ්ගා නාම අඤ්ඤාණං.

367. ‘‘භයෙන භයා ගච්ඡතී’’ති භයෙන භයහෙතු භයා ගච්ඡතීති හෙතුවසෙන වුත්තං. යථා ‘‘රත්තත්තා පන දුට්ඨත්තා ච ඡන්දා දොසා ච ගච්ඡතී’’ති හි වුත්තං, එවං.