9. පරිපාචිතසික්ඛාපදවණ්ණනා

192. චෙටකෙති දාරකෙ. තරුණපොතකෙති පොරාණා. ‘‘පාපභික්ඛූනං පක්ඛුපච්ඡෙදාය ඉදං පඤ්ඤත්තං, තස්මා පඤ්ච භොජනෙයෙවාපත්ති වුත්තා’’ති ලිඛිතං.

194-7. නිප්ඵාදිතන්ති විඤ්ඤත්තියා න හොති, කින්තු පරිකථාදීහි, තස්මා ඉමිනා සික්ඛාපදෙන අනාපත්ති, තං සන්ධාය ‘‘සබ්බත්ථ අනාපත්තී’’ති වුත්තං. ‘‘කථානුසාරෙන තත්ථ පසීදිත්වා දෙන්ති, ඉදං පරිපාචිතං න හොති, වට්ටන්තී’’ති පඨමසික්ඛාපදෙ වුත්තත්තාති ධම්මසිරිත්ථෙරො, උපතිස්සත්ථෙරො පන ‘‘ඉතරම්පි වට්ටතියෙවා’’ති ආහ. පොරාණගණ්ඨිපදෙ පන ‘‘යස්මා දෙවදත්තො පකතියා තත්ථ භික්ඛුනිපරිපාචිතං භුඤ්ජති, තස්මා ඉමං අට්ඨුප්පත්තිං නිදානං කත්වා ඉදං සික්ඛාපදං පඤ්ඤත්ත’’න්ති වුත්තං.

පරිපාචිතසික්ඛාපදවණ්ණනා නිට්ඨිතා.