4-6. ඛීරරුක්ඛොපමසුත්තාදිවණ්ණනා
231-233. අප්පහීනට්ඨෙනාති මග්ගෙන අසමුග්ඝාටිතභාවෙන. අත්ථීති විජ්ජති. සති පච්චයෙ විජ්ජමානකිච්චකරණතො පරියුට්ඨානං අප්පකං මූසිකාවිසං විය පරිත්තං නාම හොති අප්පානුභාවත්තා. එවරූපාපීති අප්පකාපි. අස්සාති අප්පහීනකිලෙසස්ස. අධිමත්තානන්ති ඉට්ඨානං රජනීයානං, වත්ථුවසෙන පරිත්තකම්පි ඉට්ඨාරම්මණං අධිමත්තමෙව. තෙනාහ ‘‘නඛපිට්ඨිප්පමාණම්පී’’තිආදි. දහරොතිආදීනි තීණිපි පදානි. ආභින්දෙය්‍යාති භින්දෙය්‍ය. තං උභයන්ති තං චක්ඛුරූපන්ති උභයම්පි ආයතනං.
ඛීරරුක්ඛොපමසුත්තාදිවණ්ණනා නිට්ඨිතා.