11. පඤ්චසතිකක්ඛන්ධකං

1. ඛුද්දානුඛුද්දකසික්ඛාපදකථා

441. පඤ්චසතිකක්ඛන්ධකෙ ‘‘චත්තාරි…පෙ… ඛුද්දකානී’’ති එවමාදි වුත්තන්ති සම්බන්ධො. පරියායෙනාති කාරණෙන. ධූමකාලිකන්ති එත්ථ ධූමස්ස කාලො ධූමකාලො, ධූමස්ස උට්ඨිතකාලොති අත්ථො. සො එතස්සත්ථීති ධූමකාලිකං, සික්ඛාපදපඤ්ඤත්තං. ඉති ඉමමත්ථං දස්සෙන්තො ආහ ‘‘යාවා’’තිආදි.

443. ඉදන්ති ‘‘කතමානි පන භන්තෙ ඛුද්දානුඛුද්දකානි සික්ඛාපදානී’’ති අපුච්ඡනං. ‘‘තයා’’ති ඉමිනා ඉදං තෙති එත්ථ තෙසද්දස්ස ‘‘තුය්හං, තවා’’ති අත්ථෙ පටික්ඛිපති. ආපත්තින්ති දුක්කටාපත්තිං. හීති සච්චං, යස්මා වා. තෙති ථෙරා. ‘‘සඞ්ඝො…පෙ… න සමුච්ඡින්දතී’’ති එතං වචනං අනුස්සාවිතන්ති යොජනා. ‘‘දෙසෙහි තං ආවුසො දුක්කට’’න්ති ඉදම්පි ච වුත්තන්ති සම්බන්ධො. ථෙරො පනාති ආනන්දත්ථෙරො පන ආහාති සම්බන්ධො. තත්ථාති අපුච්ඡනෙ. යථාති යෙනාකාරෙන. චතූසු ඨානෙසූති ‘‘භගවතො වස්සිකසාටිකං අක්කමිත්වා සිබ්බෙසී’’තිආදීසු චතූසු ඨානෙසු. එත්ථාති පඤ්චසතිකක්ඛන්ධකෙ.

ඉති පඤ්චසතිකක්ඛන්ධකවණ්ණනාය යොජනා සමත්තා.